اخي العزيز انت واضح والاخ مروان محروك قلبه وملجوم
اقتباس:
المشاركة الأصلية كتبت بواسطة محمد الربيعى
يا أخي تيل أنا طالع بيدي شيء شوف قلت كلمة أتحدى أكبر واحد من أهل الموصل كان يكدر يقولها والاقتباس موجود : كايل :: حذاء المالكي يشرفهم ويشرف أبوهم أي كل الخونة من أهل الأعتصامات والوهابية الذين أنا وياهم عدو والسكين على رقبتي ووحيد أنا بالموصل مالي قربة هواي ومن طكت روحي لما بعيني شفت الدواعش والله وأقسم يمين الله كنت أطلع العصرية قبل المغرب كالعادة إلى جوله شوية خارج الحي قرب مكان كان مقر فصيل للجيش شهر السادس 2014 بعد أن ترك الجيش ودخلوا الدواعش , أجا واحد حديدي من البو كضيب قال ها أبو فلان ما صار عندك 100 مليون قلت له من وين ؟؟ أشو الفليسات حاطهن ببنك الجامعة وتصادرت البنوك والراتب أنقطع بعد منين لي :: كال هه !! جلس يمي أنا من طكت روحي قلت : لعنة على أبوهم لا أبو حظ الجابهم .... كمز من مكانه قال تسب دولة الإسلام ؟؟؟ كانت أكو صخرة بقربي صرت أباوع عليها حتى ألقيها برأسه ... وهددنني قال سأخبر عنك دولة الإسلام ... قلت له لا يقطع الرأس إلا مركبه .. اجيت للبيت الأولاد باعوا بوجههي أبني الكبير قال يابه عوفه .. بعد يومين أبن عم له صديق لي خوش رجال قال شوداك يم هذا الخبل ومنها وإلى الآن ذاك الرجل الذي هددنني ما شفته لكن الله طلعه بيه طلعوا ويلاده أثنين مبايعين واحد منهم قيادي كتلته الطيارة بصاروخ مستهدف وألاخر في بعشيقة وكان عنده ست بيوت وجامع قرب تلك المنطقة التي كنت أروح يمها كلهن تركهن لما سمع الجيش أجا يحرر وما أدري وين وله مات طاب ما أدري لكن ما كنت أعرف يوم العركه وياه عنده ولد مبايعين وهو نفسه مؤيد لهؤلاء ... المهم الله ما شوفني صورته من ذاك اليوم ولو موجود شسويله أخي الآن منطقتي كلها حديين ووين أروح ما عندي أمكانية أروح أشتري بيت بمنطقة راقية البيوت بالنار بزمن داعش حاولت أشتري بيت بمنطقة راقية شوي لكن كنا نخاف يطلع صاحبه داعشي وفعلا لما سألنا عن ذاك البيت الذي كنا نحاول شراءه طلع أبنها داعشي , ذاك البيت الذي كان سعره 160 مليون أيضا ما كان عدنا لكن قلنا نبيع البيت وشريك أبني بالمحل شوي متمكن كال أداينكم 50 مليون لو أشكد ما تردون .. الأن ذاك البيت ما يجي ب 300 مليون فمن وين ... والله يا أخي تيل أخاف على نفسي وعلى ولدي بهذه المنطقة والمنطقة كان فيها دواعش .... العام برمضان صارت فاتحة برأس الشارع رحت هناك منا كلام منا كلام وعن أصابتي ولما داعش سجني وصادر صيدلية أبني ب 2016 واحد سألني أمام الناس الجالسين (مجلس وصار كلام ) أنا مدري شلون قلت أخبر عليهم من خلال النت واحد كان جالس حديدي شيخ وصار حشد كان أخوه داعشي صار يباوع علي ... فشوف شلون دولة تخلي واحد كان يد بيد مع الدواعش يصير آمر بالحشد العشائري وبعيني أنا مره كنت رايح لمستشفى صدام وشايفه مع رجالات من داعش هناك .. ما أستطيع أقول عنه داعشي لكن والله أخاف منه وهو بنفس فرعنا .... . وأنا لا قرابة ولا أبن عم حولي
فشوف كيف حالنا وأخونا مروان يدور وياي على كلمة أنت كاتب هيج أي من الخوف والله مرات يتلعثم قلمي لو أسد الباب على نفسي لما أكتب لأن وضعنا ما يرحم ... فضايعين لا منا ولا منا ... وخلي أقولها مرة حاولت أكتب بموقع منتديات أهل الأنبار قبل سقوط الموصل وتداخلت بموضوع لأحدهم وقلت إرهاب وكذا وما فرقت بين مللل الإسلام غير الوهابية واحد منهم قال وكتبها بالتايتل تطلع كتابة تتحرك فوق أحذروا من فلان ترى مندس ..... أمس هنا مروان طفر روحي على مود عبارة ب 2014 قلت فيها أجو من سوريا أول مرة وهو راح جلب صفحتهم (طبعا أعرف بيها ) من الموصل وما حواليها أي طبعا بالتالي صاروا عراقيين لكن الشيشاني والأفغاني والمصري والسوري .. أول مرة كانوا عددهم قليل لكن أكيد عددهم بحكم المدة يزود
صحيح أول مرة أجو بخمسين سياره ورادو يطبون لسامره بعدين ما أدري خطة تمويه منهم أجو للموصل وصار اللي صار ..... طبعا بايعتهم الناس بالتدريج اللي محتاج لعمل لراتب لمعيشة أو من هو متونس على معتقدهم , ولعنة الله عل الكاذب لو كانوا ألف صاروا ألفين وما شرط كلهم من الموصل أو القرى لكن اللي جو أول مرة وحسب ما تقول معظم المصادر والناس ما كان يزيد عددهم عن 300 لكن وصلتهم تعزيزات أيضا عن طريق سوريا كما يقول البعض بحدود 3000 ....
المهم مصيبة ولا نريد نستذكرها لكن يا أخي والله أغلب الناس مغلوبة على أمرها ماذا تستطيع أن تفعل ... الحكومة أيضا وقبل شوية رديت على الأخ ضد البعثيين مشكلة مع الشعب ما تحاول تحلها بالبداية حتى تستسصعب وتتعقد ..
استاد الربيعي انت صريح وواضح والاخ مروان ملجوم مثلي ومثلك واحيانا تاخذه الحمية على وطنه وما اصابه من دمار ادعوكم بالعودة الى الحوار الهاديء فانتم تمثلون ايقونة المنتدى والشبكة فلا تحرمونا من حواراتكم تحياتي