باقات من الشعر الشعبي في قلعة صالح / من أعداد الشاعر علي كاظم الدرجال الربيعي
من روائع الشعر الشعبي
قصيدة ( يبس شطنه )
يبس شطنه ونسه ألموحان جاليه
أنعم ألله أعلى المطرونذوك ألميه
**
انعم الله اعلى المطر والماي والمزنه
اولويحصل نظم للصيف وانخزنه
عمت عين الرمال اليبست شطنه
هذاك اليحدر الخيال جاليه
**
جاليه رهيف اويحدر الخيال
ومضايف عامره وتلالي بيه أدلال
اليذب الشبج يترس منه سبع سلال
من بني وعجد مابيه سمتيه
**
من بني وعجد نوبات لو شبوط
وتجينه ويلجرف دزكات مال بطوط
شحلات ويلرطب لو حطوا المسموط
خصوصا لو تمرنخله شويثيه
**
شويثي والمضيف امذهبه ادلاله
ودجاج الماي ضال اومحد ابحاله
كبل ديرتنه جانت تشبه ديالى
أم البرتقال او احسن اشويه
**
ديرتنه جميله وتعجب السواح
ومضايف عامره وتباهي بالمرواح
يكفينه سنه بس تمن المصطاح
عمرنه مشترينه وجبنه كميه
وصية أم صابئيه لأبنها أدم / للشا عر عماد عبد ألرحيم ألماجدي
وصيــّـة أم صابئية لإبنها آدم
عماد عبد الرحيم الماجدي
درفــَـش الـْـيهـْـيا أمانـَه **ـ شـُبـْـكَـَـه يايـُمـَّـه بـديـك
اوكَــَـلبي يـُمـَّه تِـدري يـُـمَّه** ـ ذاب كل عمره عليك
اوروحي تدري يـُمَّـه جانـَت **ـ سِـبحـَه تتلولح بديك
ياحِـلـيـب أمـَّـك رضَعـْـتـَه **ـ طاهِـر اوصّبي يـِـجيـك
فصـَّـلِـتْ رسـْـتـَـه يـَـيـُمّـه **ـ نـوره هيبلزيـوَه بـيـك
يمّـه جـيت اوصوت روحي **ـ صار صفـكـَات أوهِـلاهـل
اشفافي يُمـّه اتـلولي كِلهه **ـ وهِـز روحي ، جنت جاهل
تِـبجـي يـُمـّه اوجـَـنـّه حِـسـَّـك **ـ يـُمـّه تـغـريـد البـِلابل
إقـرَه كَـنـْزتـْـنَه يَـيـُمَّـه **ـ اتعـيش دَهـْـرك يـُمـّه عاقـِل
صبّي إنـْتَ إبن صبّي ** ـ يـاذهـَـــــب لـــون الـْـسنـابـِـل
دلِـلـّـول اللـّـيـل كِـلـّه **ـ وهـِـز كاروكــَـكْ وَغـَـنـّي
دلِـلـّـول أوأكِـظ دمعـَـك **ـ بي شـَعـَر راسي أحـَّـني
دلِـلـّـول انت كـُـبُـرتـِي **ـ لـو نِـوايـِب وهـْـدنـَـنـّي
دلِـلـّـول اوتـُبقـَـه صبي **ـ والـْـسيادِر عـَـلـَّمـَنـّي
كَـالـَن الصبي سِـبـيجـَـه ** ـ ذهـَب تـيزاب اويغـَني
كَِـمِـت تـِزحـَف ياحـَلاتـَـكْ ** ـ يمه روحي اويـاك تِـزحـَـف
اعـيـوني تِـتـْـنطـّر مشيتـَـك** ـ رِمِش عيني إلـَكْ مَـلحـَف
لـو ذبَـل وجـْـهـَـك يـَيـُمـّه **ـ اعـضايْ يُمَّه اتكَـوم ترجف
تِـعـثــَر الـْماري يـِـحِـرسـَك **ـ يـجري دَم اجـلايْ ينـْزف
: هـذي مـِن عِـندي وصِـيـَّه **ـ عـَـهـَـد كَِـشطه يَمَّه إحلف
خـَمسَه احفـُظهـِن يـُمـَّه اوتربح **ـ كِـل وكتـَـك عايش فرحان
إشهـَـد وبـْرخ صوم اوصَـدِّق **ـ واصْـباغـَه اوهذي الأركان
تِـشـْهـَد هـّيي الواحِـد أحـَّد **ـ تِـلبس رسته ، اتـْـشِـد هِـميان
اتـْـشِـدَّه ، وبـْراسـَـك عِـمـَّـه **ـ تِـشـْـرح صَـدرَك لِـلإيـمـان
يـــُمّـه اتـْـزَوج مِـن صَبـيـَّه** ـ أصْـلـَـك يـِتجـوهر ، يـِنصان
يايـُمَّـه الـمارق ، صدَّكَــْـني **ـ عـَن دينه الـْـمـُرتـَد خسران
كِـل وكـْـتـَه اوعايش بالـْـذلــّه **ـ خـايـِـف يايـُمـّه اونـَـدمان
يـُمـَّـه افـْرَح لـو راد الشـَرشَه **ــ ياخِـذ نـَـشمثتي امن الآن
غـَسـِّلـْني او لـَبـِّسني اقـْماشي **ـ هـذا الـحَـق اعلـَه الإنـسان
لاتـبـجي اوتِـحـزن يايـُمـَّه **ـ راح اتـْـلاكَـَه اويـَه الـرحـْمان
إلـْـبـَس أبـْـيض يـُمـّه اوهـَـلهـِـل **ـ بـيـن الـوادم والـْخِـلاّن
إرواهـَدهـَيـّي ، بوثـَـه إقــْراها ** ـ إقـره المِـلـْواشه اوفرحان
واللـّـوفـاني يـُمـّه اتـْـلوفـَه **ـ إدعـي الـْـصّبه كِـلـْـنـَه اخوان
واتـْـذَكـَّـر مِن تــُبـْـرخ يـُمَّـه **ـ دارات الـصَبـّـه الـْـعِــنـْوان
واذكِـر أهـْـلـَـك يـُمَّـه اجـدودَكْ **ـ عـَبـّود اسباهي اوشرهان
اسْـنيجـر زهرون اوكـَـلمـَش ** ـ ماجـِـد وعـنيسي اوسلـمان
وشْـبَـيـّب ، مذكور اولـَفـته **ـ ومـْنادي اورومي اوعـَطوان
صنهير اومزعِـل وخـْـنيفر **ـ جاوي اوحـَسحوس اوسلمان
عبد الزهره ، اكميت اوششتر **ـ عبد الله ، امْسلـَّم ، طوفان
ودخيـّل ـ عسكـر ومناحي **ـ ومْـهنـَّه ، اعـكَـيلي اوغضبان
صالح ، مطلك ، جاني اوناشي **ـ باحـور اوعِـكَـله اوفنجان
عاتي اوشـَدّود اوحسناوي **ـ عِـثـمان ، اجـحـيل اوعِـيدان
ماأذكـِرهـُم كِـلـْهُـم يـُمـَّه **ـ يـرحـَـمهُـم هـَيّـي الـْـحـَنـّـان
كِـلهـُم عـَـمـَّك يـُمـَّه اوخالك ** ـ أصحاب الـْدلـّه اوديـوان
ماردَّو سـايـــِـل يايــُمـَّه **ـ إسْـــأل يـايُــمـّه العـُـربـان
أزهـار أهـْـلـَـك كل الصبَّه **ـ يزهـون ابصَـدر البستـان
هذي يايـُمـَّـه وصيـتـي **ـ صـايـْـمـَـه الـْـماري عـَـليـك
درفــَـش الـْـيهـْـيا أمــانـَه **ـ شـُبـْـكَــَـه يـايـُمـَّـه بـديـك
عماد عبد الرحيم الماجدي
من شعر الأبوذيه للشاعر الصابئي سلمان أ
لفاني خفيف ألطول ** مازر
خمل وزرا فوك ألصدر ** مازر
كلبي من لحاظه يثور ** مازر
نهودك والتفك أوجرن بيه
*******
ومن شعر الشاعر الرائد المرحوم حمدي عبد الرضا ألسيد :
عيونه عيون غزلان صد ليه ورماني ** شوا فزيت مرعوب مدري أشوافكاني
كالولي عنك ياعراق / للشاعر فهيم عيسى ألسليم / منقول
;
فهيم عيسى السليم
( كالولي عنك ياعراق )
*************
الى شجرة الرمان زينة البستان
الى اٍبن العراق القديس الفيلسوف الزاهد الصامت
كالولي عنّك بَقجة البستانْ (1)
كالولي عنّك زهرة الرمانْ
لخدود حمرة وتطك قدّاح ورموشك سعف نعسانْ
كالولي عنّك من تجي ريّانْ , كالولي عنك من تِرِدْ ريّانْ
كالولي عنك شوفتك شوغات من لهفة وعشك ألوانْ
كالولي عنك بيرغك ما ينزل وذبتك ناعس وحيرانْ
كالولي عنك من تريد اٍتكول يخرب صاحبك ما يسمع الينكالْ
يتبلهثْ عيونه اٍتشيهْ وكليبه يدك دكة هاون الجيرانْ
كالولي عنك مو جنس اٍنسانْ
كل الحور مشبوبة بجمالك والأنِسْ والجانْ
كالولي عنك كل غوى الحلواتْ والحلوات من يغون يطك بركانْ
كالولي عنك فلفلك حرّاكْ
كالولي عنك آخ من تشتاكْ
كالولي عنك دجلتك لو راكْ , يعزم للكمر بالليل ويعوفه بحلم هيمانْ (2)
كالولي عنك من جنت من جانْ
كالولي عنك من جنت نِمنه واٍجه الطوفانْ (3)
وك نمنه واٍجه
وك نمنه واٍجه
وكْ لاوردة بقتْ لا عطر لا ريحانْ
واٍنذليتْ واٍندليتْ درب المارجع منّه أبدْ اْنسان
درب أسود نذل مسدود بحجار الغدر والموتْ
جحيل الضيم من جلجل على البستانْ
وراحوا خيرة العشاكْ
مرّوا عالنخل دكّوا سلامْ
مروا عالأمل رفعوا الهامْ
مروا بالفرات ودجلتك والهورْ
وتبعوا عالدرب آلاف تبعوا عالدرب آلافْ
مروا بالدرب محّد نسه البستانْ والبقجة وحلم هيمانْ
وراحوا خيرة العشاك
والبيرغ نزل وأرض الوطن تنباكْ
وظليت بهضم ياعراكْ
وكل الفات جنّه وجانْ
لاجن من اٍشطوط الموت والذلة نبع عنوانْ
بالبَقجة بقت نخلة طويلة مهدّلة وتبجي
وبالبقجة بقت هم شجرة الرمانْ
وبالديرة شبح اٍنسانْ بالديرة شبح اٍنسانْ
وهدّت بالألوف الناس
كلْ واحد نبش كبره كلْ واحد عبر جسره
بقجتنه حديد وزَهَرْ
بقجتنه سكاها نهرْ
من دم او دموع وورّد البارودْ
بقجتنه زمن مهدودْ
وكالولي عنك بركة الأحزانْ
كالولي عنّك خايب وتعبانْ
خل نسكي النخل ونضمّد الرمانْ
خل نغسل جراح البيت بالسكتة ومزن نيسانْ
خل نسكت عساهه اٍتخضّر البقجة
وبلكي اٍنعيد جنّه وجانْ
وهم اٍنكول راح انعمّر الديرة
وترجع شجرة الرمانْ
تتوسط ألف بستانْ
وترجع هيبة الاٍنسانْ
فهيم عيسى السليم
(1) البَقجة هي الحديقة داخل البستان
(2) في العامية العراقية نقول أن القمر (عازم) حين تظهر حوله هالة ضوء
زغيرة ألأمس / للشاعره راهبه ألخميسي
زغيرة ألامس
راهبه الخميسي
________
يمته أرد ياديرتي لحضن ألدفو؟
وأشهك نفس طيب وعشك
زنادي بيدك ياوطن صحوه وغفو
كردانه تترصع شذر وتلامس ألجيد ألترف
يابنية ألعشرين من عمر ألصفو
يا آخر ألعنكود يزغيرة امس
يلي تدللتي بحضن من دللج
مرت عليج سنين هجران وحزن
أمر ألقدر يامدلله؟
لو طالعج هو ألنحس؟
سيره ومضت كلها ألم يلي دفعتي ألعمر بالثمن ألبخس
وينه ألذي يوفي ويكول
هنا يروحي تدللت؟
جا هيه روحي الدللت كل ألبشر
وألحبت الكيعان وأوفت
ماتريد تضوك ساعات ألعرس؟
جنهه ألحلم أيام عمري أللي أنكضت
كلساع أهيسنك رمح
تغرس غرس
وين الوعد يلواعدت؟
جا هو حلم أخضر تريده ألروح لحظات ألهمس؟
عمر ألجفاف وياك ماهو سنين
يلي رخصت ألمدلله برخص ألرخص
وظلت أماني ألروح متعلكه بزمان ألمضى
يامن جنتي زغيره
ويامن دللج من دللج
ماترجع ألايام وسنين ألمضت
وأرجع يروحي مدلله
زغيرة أمس
_____________________________________________
جا كون أرد
_______
ترفه وحنينه رويحتي ماتحمل هموم ألهجر
عمر ألتعب يا روحي شلج بيه؟
موش أنت ألربيتي مدلله نغمه بوتر؟
تالي ألعمر تجوال ,اسفار وسجن
وتكلل ألعمر ألذي بعد ألتعب رح يستقر
تكلل عمر تعبان بآخر جولته
بكسره وخسارات وفشل بمحبته
ليش ألذي يمنح زمانه بلهفته
ويركض يسابك رحلته
يحضى بأمل مقتول
هذي فرحته؟
جا كون أرد يرويحتي
لذاك ألتراب اللمني
ونضحت بيه عركة جبيني ولوعتي
جاكون أرد يرويحتي
يمكن أشوف أيام ولن وأنكظن
تذكرحلاواتج مراراتج رباج ودمعتج
وهي ألتكلي هنا تعاي
كطره بنهر دجله
وترد رويحتج
وخل حضنج ألدافي يلحبيبه يلف اللي عطش
يرتوي بمزنة دمعتج
قصيدة كعب ال حاجي للشاعر علي كاظم درجال الربيعي / منقول
قصيدة كعب إل حاجي الشعبية للشاعر علي كاظم الدرجال الربيعي
أحنا أولاد الأطرش مصطفى ألكعبي
ابيدرنا عجيد اوحاتمي اوعربي
إحنا امنال حاجي اوعمنا ابو الحمره
والبنده فخرنا او نخوة الدبي
احنا عيون حمره ابساعت الشدات
او من نفرح نغني ابطورنا الصبي
احنا غلوم عمنا اليعكد الرايات
مرمر والمضايف للدرب تربي
انه جد الرسول اومن نسل عدنان
لو تبحث انساب العرب للذهبي
انه كعب ابن يشكر سيد الصحراء
والمرجع ربيعه او قاسط او هنبي
انه امتدت اعروكي ابكل كتر بالكاع
كل شبر السكنته يغرك ابحبي
انه الشجره الثمرها الشبع الجوعان
والشاة اللبنها ايرضع اليحبي
انا ابن العماره الما عرفت الخوف
يحفر كبره بيده اليوكف ابدربي
انا المطكوك باليافوخ طكت موت
بس ماعفت ا صلي او ضيعت تعبي
نضل احنا الاباة او بيت عاصي ازلام
لو طك الفشك اتثني وتعبي
والله احنا زلمنا ماتهاب الموت
او حاضركفن دفني او حاضر التابوت
انه الاسد لو هديت وانه الحوت
(نطفيها لو شبت نارك )
هذا عيدك للشاعر علي كاظم درجال (ابو عمار الربيعي )
قصيدة (هذا عيدك ) للشاعر علي كاظم الدرجال الربيعي
غيمه سوده او سنبل اصفر
والحصاد ايريد منجل
وانت خايف وانه خايف
والمصيبه الزرع يذبل
وادري بعيونك وكيحه
اوطير تايه ريشه مبتل
طير كاصد يبني عشه
اوشايل ابدفات صدره
ابذور حنظل
وانه وأنت اوليل اخضر
هم شفت لون الخضار
ابعين تزعل
وانت لونك لون وردي
اوريحتك من تطك صندل
وانت لو دار الزمان
اتصير صوف ابحلك مغزل
هذا عيدك وانت ما تدري
زمانك دار
لو شكلك تبدل !!!!!!!!
مقتبسة من ديوان الشعر الشعبي المخطوط للشاعر
من الشعر الدارمي للشاعر علي كاظم الدرجال الربيعي
صوبت سهم الشوك طيحت طيره**** غنجه اووسيعت عين من الحفيره
2 يلمنحدر بشراع لمريبي زتني **** للواوي للبطاط للسود نتني
3 سيد سعد موجود بالقلعه داره **** كون اْ زلف انه اوياك حط بيه شاره
عمت عين الزمن // للشاعر علي كاظم الدرجال الربيعي
عمت عين الزمن ما أنصف اوياي
لو أدري أبد ما فاركتكم
**
أشتريت ألحزن بس يشهد ألكرار
بعت الدنيا كلها أو ما بعتكم
**
يا ما ذكريات أنكضت ويا ك
ويا ماصور با لحيطان ألكم
**
يعمي أشلون بيه أهواي مشتاك
اتمنى أبلحدكم انه غافي
**
تعبان أو رجيج أو نومي شلون
أنه لو أم أنومك با لعوافي
**
يا جمرة حسرتي وطفرة ألروح
على جمر ألقهر أمشي أنه حافي
**
أيا ما كعدنا أو كمنا وياك
يبو كلب ألجبير ولبن صا في
**
ها عمي أشفت كلي أشجره أوياك
رهبة موت كلي ابحالك شلون
**
بعمي ألحزن يثلم ثلم سجين
ويحتاج الينوح الدمعته عيون
**
تعال أو شوف بيتك والحياطين
على كل أثر منك هم يونون
**
أخوتك لو خواتك من يشوفون
ربعك با لمضايف من يضحكون
**
يهل البيت مزنه أو يشتعل نار
أو كبل لايبجي عمك همه يبجون
**
أنه بيه ألنوايب شجن أرماح
أنحنى ظهري يعمي أبدونك أنته
**
صا حبتك جرح من عمري ظنيت
توفيني ألتعب ذاك ألتعبته
**
ما ضنتي أنتفارك وحدي ضليت
ولا كلبي يهود من حسرته
**
شسولفلك يعمي أشسوه ألفراك
بغيابك أتغار الهم حملته
**
شفت ألموت عمي وحالك شلون
الشريف اشما تعب ما يلكه راحه
**
هلك عمي أو مرارالحزن مربيك
تلكه أوجوه مليانه سما حه
**
أنه الردتك يعمي ألساعه ألعوز
لجن طبع الوكت بس الكبا حه
**
بعد عمي حجرتك شايله أهموم
أو بعد كل ذكريا تك طيف بيها
**
من نشتاك الك تا خذنا الهموم
نجي او بجروحنا انسولف عليها
**
يعمي الموت اخذكم وانه ضليت
ابحسرتي الزمن دك دكات وياي
**
الف موته اموت او كلت ارتاح
يا عمي اشكبرها اهموم دنياي
**
أذكر مشيتك والطيب الوياك
يهزني الشوك جنك من صدك جاي
**
افز مرعوب واتعثر با لأشوا ك
احس با لنار تلجمني ابثنا ياي
**
ما ضن الكه مثلك بعد هيهات
انه ابشيمة العدك ارهب اعداي
**
ألف وسفه طواك الموت يا حيد
والف وسفه ايتخطى الفاسد الراي
**
أمس عنكم يعمي ** راحلينه
ولاشفنا بعدكم ** راحلينه
اهواي اعزاز مثلك ** راحلينه
أمن صدورألمجر ألكم تحيه
((((())))))
مع تحيات الشاعر أبو عمار ألربيعي
الشعر الدارمي للشاعر علي كاظم درجال الربيعي
هيله أشكبرها ألعين من تصد ليه ** أنشغ سبع نشغات وتموت أديه 1
2هيله وثلث تنعام بيكم ولهدوم * * من كثر وني هيله وثلث تنعام منج يهيله
من الشعر الدارمي للشاعر علي كاظم الدرجال الربيعي
هيله وثلث تنعام منج يهيله ** كلج وفه وطيبات كحيله وأصيله
أغنيه للأطفال / راهبه ألخميسي / منقول
يايمه جانا العيد عيدينا
نقشي رسوم الحنه بايدينا
أصحابي مزهريات
جنهم ورد بطاقات
صرنا شموس ونضوي شوفينا
كل بيت نهديله ورد
نتفائل بيوم السعد
غنوة فرح يايمه غنينا
إحنا كبرنا شبساع
إحنا نبع هاي الكَاع
مطراتك انت ياوطن هيه اللي تسكَينا
مثل العشب أيامنا وسنابل
تظفر محبتنا عشك جدايل
دجله وفرات بميها تروينا
تضحك شمسنا للعيد
ضوّت سمانا من جديد
صاح النخل يادنيا هنينا
من الشعر الدارمي للشاعر علي كاظم درجال الربيعي
هيله وثلث تنعام بيكم وله دوم ** من كثر نوحي عليك سردت ألهدوم
*****
ومن ألأبوذيه ::
أجروحي دوم تدي ** وانه داوي
وتهب رياح صرصر ** وانه داوي
ربح كل داو يسمر ** وانه داوي
خسر وهل الهوى يلومون بيه
*****
.
ومن مطلع اغانيه المشهوره :
ياهوى الجلعه امنشمك وانه عابر علجسر
انسه روحي أنسى نفسي أسكر بليه خمر
من الشعر الدارمي للشاعر علي كاظم درجال
ما عندي عين تشوف كسرك يعمي ** خلني بحزن وبعيد غارج بهمي
لون من ألأبوذيه للسيد محمد ألنوري
يطارش خذ كتابي اويا ك ** وصله
على المعرف عما مه امنين ** وصله
اخبره الكلب صار اثنعش ** وصله
وكل وصله تطالب جيبه لي
لون من ألأبوذيه لفرج ألله وهاب كطان
شموس وصال خلي البان ** غربان
جفا و آمال عهد الگرب ** غربان
ما اشوف بسما الحظ غير** غربان
تحوم بنايحه و تنعب عليه
