شهادت ألإمام الحسن (ع) السيد كاظم الشرع

نعي
==============
جني بزينب تنادي بكلب مـــــالوم
يمي فاطمه ريتج تجين اليــــــــوم
تشوفين الحسن جبده وذرمسموم
يون من ألألم ونته خفيه
======
يمي مــن حضرته وردت أشوفنه
تماثل للشفــــــــــــــاء وبطل ألونه
آمرهم يوخرون الطشت عنـــــــــه
أيخاف الزينب تصير ألأذيـه
===============
أنا زينب والمصايب علي تنصـــاب
أعاين بالطشت جبد الحس ينصاب
كلبي من المصيبه ذاب ونصـــــاب
مصايب فاطمه أنجمعن عليه
===============
ريتك يبو محمد بالطفوف اتشوف
أبوفاضل طريح وراح منه الشوف
أختك باليسر وبكل بلاد اطــــــوف
واخوك حسين عل غبره رميـه
=========
ولعين
نشف دمع الكلب والجفن ولعين
بكلبي على الحسن نيران ولعـن
يشيعي أللعن جُعيده وشمرولعن
الخليفه الي كسرضلع الزجيه
====================


القصيده

ياشيعة علي دم اجروا المدمع= يلله للمدينه للحسن نفزع
نواسي الطاهره الزهره= نواسي زينب الكبره
نواسي حيدر ألأنزع
====
يشيعه للمدينه اليوم خـــــــل أنروح
ونشوف الحسن بين ألأهل مطــروح
يلله أنساعد حسين ونجيم النــــــوح
خل أعيونكــــم تسجب دمه المدمـع
نواسي حيدر ألأنزع
====
يشيعه خل نروح أنشيع المسموم
ونشوف أشجره وشصار ذاك اليوم
منعوا يندفن يم جده المظـــــــــلوم
وراكبة الجمل عن الدفن تمــــــنع
نواسي حيدر ألأنزع
====
على ألبغله أركبت وتحشم بمروان
أم الفاسقين الخـــــــــاليه الوجدان
لفاها ابن الطريد مفرع ولهفـــــان
وسهام النذل وسط النعش ترتع
نواسي حيدر ألأنزع
======
بكلب عباس وجة وسعرت نـيـران
سل سيفه بيمينه وأعتنه المـروان
صاح حسين يــــاعباس ياريسـان
سيفك مو محله بكربله يطــلع
نواسي حيدر ألأنزع
=========
يشيعه خل نعوف الطيبه خل أنعــود
نتعنه الطفوف ونبذل المجهـــــــود
ونشوف الحُسين شضحه للمعبــود
ضحه مهجة وطفله وهله أجمع
نواسي حيدر ألأنزع
====
مصايب كربله ما تنحسب بحساب
جثيره وشيبت كلب الطفل والشاب
المصــــايب نحلت زينب كلبه ذاب
حتى العين جفت مـــــابعد تدمع
نواسي المرتضى حيدرعلي ألأنزع
=======
يشيعي أتصورالحاله بكلب مالوم
لا تنسه الوداع الصار ذاك اليوم
بين حسين ولأكبرعلي الجيـدوم
وليلى أتعاين الحاله وتهل مدمع
نواسي ا حيدر ألأنزع
======
مـن بعد الوداع أتعنه للحومـــــه
علي يشبه محمد جده برســـومه
مثل حيدر علي حملاته معلومــه
لا جن القــدر يا حيف أله أسرع
نواسي حيدر ألأنزع
====
نزل للحومه أبو اليمه بكلب مهموم
لكه ألأكبرصريع أموذرينه الكـــــوم
حط خده على خده وصاح يم جلثوم
يزينب راح الكبر ما بعد يرجع
نواسي حيدر ألأنزع
===========
لهفي على الغريب من أعتنه بهمه
العلي ألأكبر يجلب جروحه ويشمه
مـــــــــاأنسه العقيله من دنت يمه
عاف أبنه الشهم ليه رجع مسرع
نواسي حيدر ألأنزع
=========
ينادي يا عقيلة والـــــــــدي حيدر
ردي للخيـــــــــم سكـــــتيلي الخدر
أعز خدرج يزينب مــن علي ألأكبر
يختي اساعه أجيبه وللخيم أرجع
نواسي حيدر ألأنزع
========
جمّع كُل قواه وحاول أيشـــــيله
لجن عظم المصيبه أخذ كُل حيله
كلي أشلون حـــــــال ألوالده ليله
شلون ألأم على أفراك ألولد تهجع
نواسي حيدر ألأنزع
=========
رمله تحشم الجاسم يماي العيــن
هذا حسين عمك ما بكاله أمعيـــــن
يبني العرس خله وحامي عن الدين
عرسك بالحشر يـــــم النبي ألأروع
ونواسي حيدر ألأنزع
=========
كأني بجاسم يكلها يبـــــــــعد أجلاي
أضحي دون عمي بيسرتي ويمناي
من عودي الحسن يمي وصيه هاي
شحلات الموت دون حسين والمصرع
نواسي حيدر ألأنزع
=========
مــاأنسه الشباب ابن الحسن جاسم
نزل فرحان للحومه بوجه باســـم
برماح وسيوف أحتاشة الــــــوادم
طاح على ألوطيه وجه يتشعشــــع
نواسي حيدر ألأنزع
==========
وعباس الشهم ما راوده كل خوف
طشرها وجمعه يوزع إلها أحتوف
مثل نسرالبراري وحدّرعلى أرفوف
لاجن ألأمر من السمه مشـــــــرع
نواسي حيدر ألأنزع
=======
كون أيطيح عباس على المسـنايــه
ويطيح الجود والجفين والرايــــــه
لهفي على اليتامه التنـــــتظرمايـــه
ضلت بالخيم تتنطره يرجــــــــــــــع
نواسي حيدر ألأنزع
=======
لهفي على الكمرحامي الظعن عبــاس
ما انسه بعمد مهشوم منه الـراس
من بعده على زينب جسرت ألأرجاس
شمر بالسوط لمتون الحرم لـــوع
نواسي حيدر ألأنزع
=========
ماأنسه الغريب حسـين لمـن راح
تمدد يم عضيده والدمع سفـــاح
أنكسرظهري ينادي ونطفه المصباح
بعد ما شوف دربي ولا بكه مفزع
نواسي حيدر ألأنزع
===========
رد من النهر يتعثر أبهـــــــــــمــه
وعقيلة هاشم أبســرعه لفت يمــه
تنشده وين أخونه راح أبو الهمــه
يكلها على النهر يا زينب المصرع
نواسي حيدر ألأنزع
========
يزينب راح أخوج الجان ما ينجاس
يزينب عالنهرطـــاح العلم والطاس
يزينب خدرج أخلاف الكمر ينداس
وزجر بالسوط لمتونج تره يلوع
نواسي حيدر ألأنزع
======
لفت يمه الرباب تصيح راح أحماي
يبو اليمه الخبر زيد علي بلـــواي
عبدالله رضيعك أيس من المـــــاي
عكب عباس ياهو اليسجي الرضع
نواسي حيدر ألأنزع

خادم الحسين(ع)
سيد كاظم الشرع