احنا ما نسينا الوطن
بس الوطن ناسينا
ولا چنه ربينا زغار
ولعبنا بدرابينه
ولا چنه العشگنا كبار
انهاره وبساتينه
وعلى سطوحه ليالينا
وسوالفنه واغانينا
وسهرنا وياه حد الفجر
وشمس الصبح تچوينا
غدار الوطن غدار
طردنا وما رحم بينا
وعگب لمتنه سوه
صفينا بغربه تالينه
وكلما نحن لترابه
ينكرنه ويجافينا
وجباله ونخله كلهه تصيح
شيسوي الوطن بينا ؟
هلكنا ولا مطر طفـَا
نيرانه وبراكينه
حسافه اللي لعبنه وياه
تاليهه لعب بينه
حسافه يا وطن بذات
نحبك .. وانت تآذينا
حسافه يا عراق الخير
تشمت العدا بينه
حسافه تشيلنا وتحط
تموتنا ..وترد تحيينا
هواي العتب وياك
بس كلمه وفه بينه
تعلمناهه واحنا زغار
منك تعلمنا وتربينا
محشوم يالكلك وفه
وطبع الغدر بينا
يوميه النا فكره ورآي
محتارين تدرينا
لا ويه الغرب طرنا
ولا عد جرفك ارسينا
افكار تجرفنا وحسبات
حسبه تجيبنا
وحسبه تودينا
والنكبه التمر بينا
لا بديك ولا بدينا
انذال ماغزر وطن بيهم
ولا طيبته و شيمة دواوينه
ولا رضعوا حليب الوفه
ولا انعجنوا بمايه وطينه
اغراب والله اغراب
وطنـَا منـَا...وبينا
ولو جارت علينه سنين
ومات الحب والامل بينا
وطوانا حقد عالدنيا
وربك يبقى ناسينا
ويبقى الوطن محكوم
بشياطينه وملاعينه
يبقى صوتنه يهدر
حب الوطن سابينا
هذا الوطن...سابينا
