صرخات من المقابر الجماعية
ــــــــــــــــــــــــــــــــــــــــــــــــــ ــــــــ
جم طفل ضل ينتظر جيت ابوه يعود
وجم ام تعد بصبر تعد وبنفسهه تجود
وجم حرمة الترملت بذيج الليالي السود
وجم اخ يتاني يرد جيت اخو مفكود
وتنطيرينه شكثر شبان عدنه ورود
فرهدهه حزب البعث يالتحجي عالفرهود
ومن طاح شفنه الصنم كلنه الامل موجود
اخوتنه باجر ترد باجر ترد اردود
ولن صوت يصرخ غضب يامن تدور عود
اخوتكم بلا رحم صارو طعم للدود
لا تعتب اعله المضه باب العتب مسدود
لركاب كل الشعب جان الحبل ممدود
*******************
بعيوني شفته امس وكحل بجيته العين
وشميت بيه الوفه وطيبة هلي الطيبين
ها خوية كتله هله شهل الغيبه صار سنين
اشلون ليلك كضة وخلصت عمرك وين
تبسم اخوي وبجه وصب دمعه عالخدين
كال انه طيف وجذب بعينك امر الحين
حي ودفني البعث بالواحد وتسعين
يا طيف كتله انتظر وخليني اسمعك زين
ورايد اعرف السبب كال الاسباب اثنين
واحد احب الوطن والثاني احب حسين
يا طيف وبيا كتر دليني مدفونين
جر حسره من الكلب وصب دمعه عالخدين
كال العراق انترس من العراقيين
الي انعدم والي اندفن والاف متشردين
كلهه اعله حب الوطن الهل الوطن مطوعين
غالي علينه الوطن بي سته معصومين
بدمنه اشترينه الوطن وبدمنه متطوعين
تروح الرجال وتجي ويلحك عليهه البين
بس دين عدنه وزلم ردنه التوفي الدين
هل الكاع كاع الصدر متريد بعثيين
هالكاع كاع الشرف كاع اليوالي حسين
يا طيف وين البقو ذيج الزلم عدلين
ذيج الشباب المشت يا طيف راحو وين
ما رد عليه وسكت وما حرك الشفتين
بعيوني مات الحلم ذكرته بالميتين
الشاعر
محمد العيساوي