المسرحيه***
من نزيف الجرح الذي لايهدأ ومن حنايا الوجع المستمر
من ابواب الذكريات التي لاتغلق منذ اكثر من عشر سنوات
من الدموع التي رسمت في خدي نهرا من الوفاء
اذن اليك مني **********************
** المسرحيه***
يكفيني فخر فرزنت الوجوه ** اوشفت ياهو ال الي وياهو العليه
شفت كلشي ابحياتي اشكال والوان** وحملت اهموم واهات او اذيه
لگيت گلوب ما مسها الزعل يوم** ولگيت عقول متحجره اوغبيه
غشّاني الوكت بشعيط ومعيط** وانه ادري الاصابع مو سويه
تيهت الرسن والدنيه مركاض** وكت خوف اوشظيه اتطگ شظيه
افوجن بالصبر وتناوش الراگ **واچلّب بالصخر بثنين اديه
اصدّك وامسح ادموع التماسيح** ورد اضحك چذب والبيه بيه
العمر جام اوزماني ايشامر احجار** وحياتك موش كسرت مزهريه
من كظّك سموم الصيف بچّاك** منو غيري وگف وانطاك فيه
گتلك لاتحط بالغربه رجليك** نزيزه الگاع وجدامك رخيه
گتلي العوز يكتل يشده البال** مايعرف فقير اولاخطيه
جاسمتك خبزتي اوگلبي مرتاح** و احن لمسامرك صبح اومسيه
تبللني ابنفط والدنيه شخاط** اعله جدحت عود تلگفني المنيه
اذا يوسف اخوته ابّير ذبّوه** انت انكرت كل معنى الخويه
حسّبتك تجازي الطيب بالطيب** وتگطّر مستحه اوغيره اوحميه
لاگصّتك عرگت وكت العتاب** ولاراويتني انجوم الثريه
اشلون اتريد اجر الحبل مرتين** وانه ال لادغتني بچفّي حيه
عركتنه انكظت والطايح ايگوم** وخل انشوف من بينه الضحيه
احط ترچيه بذنك گبل الوداع ** وگبل لاتمشي اوصيك ابوصيه
لاتاخذ حچي اليحچون وجهين** حچي الودّوه الك جابوه اليه
موش انه التحطني ابين نابين**ولانه الگبّعت روحي ابرديه
عمرنه انكتب سينارست واحداث**ومشاهد من قصصنا الواقعيه
انه انطاني المخرج دور جلاد** و الد اعدائي متهوم ابقضيه
اذن من حقي امثل واقع الحال** واكمل كل فصول المسرحيه
////////////// ///////////// ///////////
اخوكم **حسين الشميساوي
****************************************
رد مع اقتباس
