[align=center]هذوله احنا

الشاعر الشعبي عبد الحسن ناصر الرويمي

اجيتك روحي فوق الراح
شايلها ابفرح مهتم
اجيتك والكلب مشتاك
صار اسنين اله اميتم
اجيتك ناذر اسنيني
ويارخص العمر والدم
اجيتك يا عراق احسين
لترابك اريد اشتم
اريد اتوسـّــد ابكاعك
وريد ابصبختك انطم
وريد اغسلهن اهمومي
ابفراتك ونسى كلّ الهم
يبو اتراب اليرد الروح
طيبة وللجرح بلسم
شنسة ومن ينسـّــيني
انسة ابفي نخيلك عشت جم وجم
انسه مضايفك والكهوه والكمكم
شنسة ورسمك ابهل العين
دوم اكبالي امجـّــدم
عراق ودوم ازامط بيك
وبهوساتك اترنم
عراق وشملي يلتم بيك
أبغيرك ما شمل يلتم
يمن ذكرك سرور او خير
يجلي من الدليل الهم
ياحلم النسولف بيه
ياهوسة زلم للموت تتبسم
ياعشك الزغر ياشوك المحبين
كلبي بشوكك امتيم
ياكحل العيون ابكل جفن مرسوم
ياغنوة عشك والحانها اتهيم
يالطولك نهار اوما يحظنك ليل المدلهم
يالراضع وفى العباس
وعلى الموزمة امعلم
عراق المرتضى انت
عراق حسين المشيم
عراق الخبزة والتمرة
عراق الدين والفكرة
عراق الثار والثورة
وجذب من عاش بربوعك
على اسنين العمر يندم
ولو مزن الوكت كل يوم تمطر دم
ولو حزنك عليك اسوار
وصار اغذاك بس علكم
ولو جرحك غميج وبيه
تشب نا ر الهظم والهم
لجن عزمك يعالي الشان
من كل ما دهاك اعظم
ياصلّ الحماد
امجرع الضدوك جرعة سم
كلمن كابلك خسران
كلمن كابلك يندم
رعب صرت لجميع اعداك
عدها الصبح صار اظلم
تراها اتكبعت بالعار
وأنته الدومك امشيم
كفوا يالخيبت ظنهم
يراعي الموزمة تسلم
جعلت شما بنوه اعداك
من همـّــتك يتهدم
وحك عيناك يعراقي
عهدنا وياك سطرنا حروفه ابدم
مشينا وياك والتاريخ
عن ممشانه يتكلم
على جتاف الكلايف نصعد
وبالروح نتحزم
ندوس على المنايا ونركضلها اركاض مانهتم
كصدنا الحومة الميدان
كل واحد صخر جلمود كلبه
او بالوغى اتبسم
هذوله احنا اوطبع بينا
نظل نتكامش ويه الموت
ونخلي المافهم يفهم[/align]