اليحبك ماتمسه النار

[خضير المسيباوي]

[align=center]علي الكرار ... يغدرونك يداحي الباب
علي الكرار ... يصب دمك على المحراب
وليد الكعبة ياحيدر ...عليك إتحزموا بالشر
وراسك بالغدر ينصاب ... علي الكرار
**************************
(1)
عگب عينك يبو اليمه صبحنه أيتام
نهل أدموع على أمصابك مدى الأيام
ألف وسفه تطيح وشيعتك تنضام
ومن بعدك تهدم ياعلي الأسلام

منيتك ساجد إتوافيك ... بأشرف موضع أتخليك
وراسك بالغدر ينصاب ... علي الكرار
(2)
كل ظنهم تطيح ونورك أيطفون
وبالمحراب يحيدر راسك أيصيبون
يصوبونك حسافه وقدرك أيجهلون
يظلمونك علي وشيبك دمه أيخضبون

نزل سيف المنية وطاح ... وجبريل بسمانه صاح
وراسك بالغدر ينصاب ... علي الكرار
(3)
نظل خدام ألك ونشمشم أترابك
عليك إنوح ونشم بلهفه محرابك
نظل كل عام نجدد ياعلي إمصابك
وتعنينه أو وگفنه بعتبت أبوابك

ننادي بلهفة وبأصرار ... اليحبك ماتمسه النار
وراسك بالغدر ينصاب ... علي الكرار
(4)
علي نورك يهل إينور الأكوان
يمن علمك بحر وتعلم الأنسان
وأثر سيفك يظل أيخوف العدوان
وصدى خيبر يظل أعله الظلم بركان

حسافه ينجهل علمك ... وتطيح مخضب بدمك
وراسك بالغدر ينصاب ... علي الكرار
(5)
وبالخندق تراجع كل شجاع إهناك
وشفه بيده الرسول إمن الرمد عيناك
ومن عمرو برز للحمومة وإتلگاك
إنكفه شر القتال بضربه من يمناك

حسافه من يجهلونك ... وعلى المنبر يشتمونك
وراسك بالغدر ينصاب ... علي الكرار
(6)
نسولفلك ظلم واقعنه ياحيدر
ونشكيلك جروح البلگلب تكبر
ذبحوا كل مراجعنه سيوف الشر
ومن يومك مصايب بينه تتكرر

كل يوم الگلب ملچوم ... من يوم الرحت لليوم
وراسك بالغدر ينصاب ... علي الكرار
(7)
نظل وياك يحيدر بيك متمسكين
رغم الأرهاب ألك ياوالي متعنين
أحتلونه بوطنه أنعيش متغربين
صحنه بالشدايد يا أبو الحسنين

نظل للمحشر أحبابك ... ونبچي بحرگة لمصابك
وراسك بالغدر ينصاب ... علي الكرار [/align]

[AL7USSINE]

الحبيب المسيباوي
لك كل اعجابي على هذا الابداع
مع خالص امنياتي
اخوك مناف

[عباس الركابي]

[align=center]خضير المسيباوي حياك الله احسنت كلماتك جدا جميله حماك الله تقبل تحياتي عباس الركابي[/align]

[خضير المسيباوي]

الأخ الرائع مناف الحسيني والأخ المبدع عباس الركابي
شكراً جزيلاً لكم على هذه الردود الرائعة مثلكم أحبائي
وأعتذر عن التأخير

المسيباوي