تمنيتك
...........

تمنيتك ا ضني ابشوفتك ارتاح
يا ماي المطر عطشان إلك عمري
وأنا صحرا جبيرة و خاليه من الواح
وسموم العواذل ما تهز صبري
حجر يدمي اليسري والنبت مالاح
اعلى حد الشوف بس رمل القهر يذري
لفيت وصحت حيا والكلب هم صاح
ولكيتك شرجي تذي وبيه ما تدري
تمنيتك ورد وبروضتك فلاح
وتظل اعروك هرشك نابته بصدري
وظل خيمة محبه لعطرك الفواح
أداريك ابترافة ولايذ ابكتري
لجن فزيت لنه بس دمع ونواح
وضحكات الشماتة ونارهن حدري
اطفي ابماي صبري والجروح صياح
يسح دمي اعلى صدري هموم من يجري
تمنيتك وطن ويلوكله المرواح
وتعفي عن ذنوبي وتقبل بعذري
لان كلبه رحيم وجفه مو سفاح
إذا مجبل بوجهي ومدبر بظهري
صلب كلش صلب بضلوعه عجلة أرماح
يدور لي شفاعة ويغفر ألغدري
لجن ما حسبيتك تكسر المفتاح
تطردني ابليل وتسعى الهجري
تذبحني انتباهه بسمك الذباح
وتضيع معالم اسمي من كبري
تمنيتك خسارة ما اريد أرباح
تمنيتك اعذيبي الكعدة العصري
تمنيتك وهيه الأمنيات أرياح
وتمزك الحقيقة ثوبها الوبري
وخسرت العمر ها طاح هذا وراح
محصولي عصاتي ومنحني ظهري


عيال الظالمي
21\ 6\1998