من يكول حسين ذبحوه بالطفوف

[رحيم الحسناوي]

من يكول حسين ذبحوه بالطفوف .. عمي ذاك حسين عرشه بكربلا

تسجد بديوانه للباري الالوف .. وحتى مشلول الجسد هم يوصله

ولا تضن عباس مكطوع الزنود .. وهوه بجفوفه الحضر يستقبله

وراية الحك دوم ما مسهه التراب .. البيرغ بروحه ابو فاضل شايله

ومن يكول انجتفت الحره بسناسل .. جا صرح سفيان ياهو الزلزله

شلون كالو كيدو جتف العليل .. وهوه مرمر جيش اميه وعلعله

وخلهه اميه تصيح لوعنه الرضيع .. الاصغر بكل يوم يذبح حرمله

ويا سؤال الدوم ما صحله جواب .. وياهو يكدر ينطي حل للمساله

شلون جان الحال من كام العضيد .. ولملم غيومه وضلامه وجلجله

شلون من جففه افترك غيره وحميه .. ومن زعل غيض وغضب قلبه انمله

حششمت عباس زينب يالعضيد .. ويا هله بعباس صاحت يا هله

من صرخ الله اكبر يا فرات .. احتار هذه الكون واركانه بهله

طب عليهم موت وبسيفه الحتوف .. وصار مشراد الخوارج بلبله

بيه تناثر جيشهم مثل الجراد .. وجاوز المعكود بيده وجلجله

ثببت اوتاد القضاء على ال اميه .. ورتل القراان بيهم رتله

كثرت اللوعات وي صوت المنايح .. بججه دم عيون خصمه ورمله

صاح انه العباس جتتال الرجال .. وضعن ابو الاحرار انه الجافله

صاح انه العباس جتتال الرجال .. وضعن ابو الاحرار انه الجافله

رحيم الحسناوي

[الخفاجـي]

الاخ الحسناوي شكرا للقصيدة ولو سمحتم نشرها في احدى الصحف التي نحررها محبة لال الرسول بثواب الامام قربة الى تعالى لكم ولنا الاجر والثواب

[رحيم الحسناوي]

الاخ ابو احمد البصراوي المحترم السلام عليكم , انتم مخولون مولاي بنشر كل ما يرزقني الله به وجزاكم الله الف خير ووفقكم لخدمة ابي عبد الله الحسين وال البيت عليهم افضل الصلوات واتم التسليم , خادم خدامكم