ليش اجيت؟
هو العمر ناقص دموع ؟
لو صار الي فتره
ما بجيت؟
لو يمكن امس
اضحكت وي نفسي
وانت دريت
وجنك ما صدكت
وبسرعه اجيت
ليش اجيت؟


تدري آنه كل ضحكي
بجي
وتدري آنه
لو من صدك اضحك
تصير
كعده زلم و دواوين
وفصول
وملاسن وهوسات وحجي
وليش يضحك؟
وشنو اللي ضحَكه؟
وشلون هاي الضحكه
ردت لشفـَته
وشلون بعد كل هذا العمر
وسنين البسمه عافته ؟
يرد يضحك !!
شافك بالحلم ؟
لو انته حنيت ؟
ولطيفه بغفله ليل
تالي الليل
امشيت

وشفته شجره ميبسه
مكطوع جذعه
وتحت غصنه غفيت
وتاليهه يحسبونه ذنب
آنه جنيت
ويحسبوني عمد
آنه الك رديت
جا ليـــــــــــش اجيت ؟


اني صدك سديت الدفاتر
بس دريت
انت قبل ما اكتب سطور حبنا
قريت
والذكريات ..
مكلوبه هاي الذكريات
هدمت كل البنيته
وبعدني ما بنيت

كتبناهه سوه
حتى كبل ما نفترك
وآنه اذكر زين
آني كتبت الخاتمه
وانت البديت
وآنه خليت الفواصل
وبكل فاصله
قطره دمع انت صبيت
وبقطره من دمي
آني محيت
ذكريات الدمع والدم
سميناهه سوه
وجففت بيدي دمعك
وجرحي انت داويت
جا ليـــــش اجيت؟



وتذكر من يوم انت بجيت
وسالتك ليش تبجي حبيبي ؟
كتلي
البارحه اتعرفت بيك
والبارحه حبيت
واليوم امفارك
وللبارحه حنيت
وهسه اجيت ؟
اترجاك
يلأسمك نفس
يتنازع
بين الدمع والروح
ويلشوفك سفر
غابات وجبال
و وديان وسفوح
ويلوجهك دوى
والعمر
مليان هذا العمر
بس جروح
ولوآني لشوفتك عطشان
وسنين من الله ارتجيت
بس
لخاطري ولخاطرك
قبل ما تشوفني....
روح
وآني اعتبر جيتك نذر
وانت وفيت
مو عتب والله
ولا زعل
بس خلهه تعيش
وتحبك الروح
لان بشوفتك
مثل ذوبان الملح بالبحر
تذوب بيك الروح




تدري ليش امس اضحكت
ضحكت على حظي
الما صدك وياي مره
حتى بالجذب ما نصح وياي
شوفني الحلم جنه صدك
ولعد بيتك مشيت
وشفتك
والله شفتك
وجنت بشوفتك سكرااااان
وبنشوة سكر صليت
ومدري شقريت
ومدري شدعيت
سبع ركعات
وعشر سجدات
لو سهيت عنهن
لو نسيت
واستجاب الله دعائي
رفعت ايدي وبجيت
تراوتلي الملايكه
على سطحك تغني
والشيطان
يعزف بركن البيت
وكل ساعه اكلك صب الخمر
وتكلي يا صلاة انت صليت؟
اريدن مثلك اصلي
صلاة سكران بنص البيت
وغنينا سوه
وركصنا سوه
بس من ردت ابوسك
من الحلم فزيت
وشفت نفسي
مغمض و انجفيت
لو عيوني متعلكه بالحلم
لو عميت
وهسه اجيــــت ؟


ارجع
احلفك بكل دمع عيوني
ترجع
ارجع قبل ما تجي
خلينا نخلص قبل ما نبتدي
ولا من شاف
ولا من سمع
وخلي الضحكه منسيه
وخلي الفرحه منسيه
مرات الفرح مثل الحزن
يوجع
ولا جنك شفتني
ولاجني عرفتك
ارجع طفل
يالعمري يكضي
وانا اشوفك طفل
ومن دمي يرضع
ارجع
مو تالي العمر
حنيت
ليش اجيت ؟؟