(( المصحف ))

بسم الله أبدء والقلم كبر .. أرتلها سوّر من مصحف المنحر
هبط وحي الشِعر أقرء يعيش احسين .. واتوضه بدمع والفاتحة الكوثر
قرع طبل الطفوف القارعة العباس .. وشمسٌ والضحى والواقعة الخِدر
والنور ونجم والتين للأطفال .. والفيل ومسد والجاثية العسكر
وطريق التضحية الإسراء والمعراج .. ونفخ الصوّر صيحة وكربله المحشر
لا بد ما أجرد شاعريتي بصوت .. بغمد حلكَي اللسان من الصمت زنجر
أنا شاعر وادور جوهر الموضوع .. عن احسين شكتب مظهره الجوهر
قد آنستُ نوراً قبة المعصوم .. خط يا حبر عيني وجتني الدفتر
أكتب.لا.شرط تنعرف لاء احسين .. الرددها القدس والطور والمشعر
لاء البردت نيران إبراهيم .. وعصا موسى بلفظها البلعت المنكر
بحر منظر الجيش وموج يلحكَـ موج .. صاح احسين لاء وبيه برزخ طر
حسين اشما اذكرك تنهدم أوثان .. ينشق خندق الها وينقلع خيبر
يا أبن الأمير أنته الأمير اليوم .. وعزرائيل صار الحضرتك قنبر
ردت شايله بوجه الصنم نيشان .. حمزة انته ولكن بالسطر أجسر
عدى سر النبوة كل محمد بيك .. وبفراش النهر عباس.بل.حيدر
مو راية أشوف بجف كَمر عدنان .. شيلة فاطمة واتخيل المنظر
تعركَـ كَصتي وحي القصيدة أعجاز .. على اصواني الشمع آيات تتسطر
أكتب يا زهير وتنكَلب عمار .. وأكتب يا حبيب وتطلع الأشتر
أكتب معركة والخصم بيها إبليس .. رسمن ملحمتها السيف والخنجر
وانته الراجفة الجرت ازياكَـ الجيش .. تسحكَ بالخشوم بخطوة القسور
نعم فرسان اكو تشهد لها الهيجاء .. لكن تنكَلب فئران من تزأر
يكتلها العطش والماي يمها اشطوط .. وانته الريج ناشف والدليل أخضر
حسين بلايه هاي وهاي انته احسين .. رحه بلا لهوم وعله الزلم تفتر
بس مدري اشصرت في لحظة التوديع ..وثدي اللسان العقيلة بحلكَـ اذنك در
زينب هلهلت كزبر جلدها الكَاع .. ها لمن صحت جلد السمه كزبر
صاحت خيل اشوفن.صحت زينب وين؟.. على باب الخيم.كَتلها ما تكَدر
أنا راسم ابابج خطة العباس .. الخياله الوحدها من تمر تعثر
وأسمع يا أمير الطف نداء الدين .. دخيلك والرسالة يحيط بيها الشر
صد وصكَور عينه جفلت غربان .. منو يوكَف اكَباله حسين لو خنزر
وحط بالدين روحه كي يعيش الدين .. وبعث للناس ثورة مصحف المنحر
......................




بقلمي / الشاعر احمد ماضي