يظالم لا تهيج الروح = خلها
عساها تموت بعد فراك= خلها
لزم ايدي الطبيب وصحت= خلها
المرض بالكلب جا شلك بدية
*****
حبيبي لا تظن الدهر = سرنا
هجرنا ديارنا و للغربة = سرنا
و حكك ما ظهر للناس = سرنا
لكن دمعي فضحني و عم علية
*****
ايتهجه حروف علمته = و قره بيه
ونكرني و ما رضى بوصلي = و قربي
ادور يا ذنب عندي = و اقر بيه
لكيت الطيب اكبر ذنب بية
*****
و حك الترك بين الناس = ثقلين
و عيوني من السهر بجفاك = ثقلن
احبك من صدك يفلان = ثق لان
احس انك شراكه وياي بية
*****
عذاب الشوك شبك = ساعديني
ساعة انخي الائمة = و ساعة ديني
على نص النوايب = ساعديني
كلف ضيم العشك كله علية
*****
بغرامك لا صرت حايل = و جاني
وسيفك بالغدر طرني = وجاني
صرت انت عليّ حاكم = و جاني
 اظلمتني وشمتيت الناس بية
*****
كلبي اشما يمر عالدار= يسلام
و من نبل العشك ما يوم = يسلم
صدك عيب و حرام العشك= يسلام
لجن حبك فرض واجب عليه
*****
الدهر ما يوم حن كلبه =و لانه
تفاركنه و الف واشي = ولانه
لا انت عرفت الحب= و لا انه
ظلمنه الشوك و العشرة سوية
*****
يواشي الكلب من الولف= لاذك
اكله الدرب هذا يكلي= لا ذاك
تحاسبني يولفي بذنب= لا ذاك
الاصابع ولك مو كلهن سوية
*****
حكمني العشك بالحسرة= و عافاك
و حكه الكلب لو ملّك= و عافاك
دريت الحسن غر كلبك= و عافاك
لجن طول العمر تندم علية
*****
يطارش هاك مكتوبي = و سر بيه
حنين الكلب بسطوره = و سر بيه
اخبره شوكت نتلاكه = و اسر بيه
و على كل بيت اطشن واهلية
*****
الجنت ليهم بيوم الضيج = وناس
صفوا بين اليسد الاذن = و الناسِ
زرعت الوفى لكل الناس= و الناس
زرعتلي المصايب و الاذية
*****
اللي يطب بيتنا يصير= منه
و نكرمه و ما ندور عليه= منه
سالته و جاوبني بغيره= منه
كتله احبك كال البيك بية
*****
كلبي انت ملكته و انت= حر بيه
عليل و طبه عندك = و انت احر بيه
كاس السم اشربه = و انتحر بيه
و لا غيرك يمس جفوف ايدية
*****
اني مهدم لجن وصلك= بناني
ندم عالراح عضيته = بناني
يشوفوني قوي و صاحي = بناني
لكن بداخلي علة خفية
*****
روة الزيتون من دمعي = و لا راك
لغيرك ما نحل جسمي = و لا رك
اخاف تطول مدتنه = و لا راك
كبل وصلك تبادرني المنية
*****
اقدم الروح لحبابي = و اسلم
و اصافح راحتي بجفهم = و اسلم
يا رب العرش صلي = و سلم
على المصطفى و اله بكل مسية
*****
تصد و تروح يبن ادم= شمالك
عجب تصفّك يمينك وي= شمالك
جنوبك هذا دوره = و شمالك
ابد ما تلكه مثل الطيب بية
*****
اكضي الليل كله قهر= وي نوح
و اسمعك كلبي دوم يون= وينوح
نخيت الهادي سيد الخلق= وي نوح
يعابي كل خوي يخون خوية
*****
يباري المرض هد حيلي = و هدني
و لا يوم ابتعد عني = و هدني
ارشدني لرحمتك يا ربي = و هدني
طريح فراش و العلة خفية
****
احس روحي تردلي = و انت يمي
سفينة انه و سافر = و انت يمي
حبيبة انت و عزيز ه = و انت يمي
بفراكج تشب النار بية