ابوي الجان نص الليل يحرثها الارض ويزرع النخلة
تاليها تجيها اغراب من ال وبني وتخرب البصرة
صاحو بيها فرهود ..وباكو حتى التمرة
نفطها وقصرها بام قصر شالو للشطرة
معدان الاجو بزون ...حفاي وغنم ترعى
تالي صارو يحكمون واهل البصرة الفقره
عادل بالزوية كاعد ابغداد ...بالخضرا
يعين اهله ابذيقار واهل البصرة تنتظره
وقصي محبوبة بيده الكاز والمحصول والثمره
عثوك النخل باكوها واراضيها مسح الهم فرد مرة
معارض ومخازن وفلل وكلشي اتصادر بامره
رئيس المجلس واهله يبيع يحوسم ويشره
نهبها من نفط سفوان ومن خور الزبير والف شده راتب بشهره
علمني الوكت من أحچي طـگ بطـگ
ومازامط چذب لو چـان مابيه
ولو ساكت أظل لو أحچي چلمة حگ
وما أمشي ابدرب مجهول تاليه
ماگلك غشيم ولآنه المدگـدگ
أفرزن بالحچي وأفهم معانيه
ولساني عدل والكلمه ماتزلگ
والجمله بشفافي تصير ورديه
الرابي ويالبدو بالبن مايشرك
خوفك عالكبر وبحلگــه مميه
شفت ناس شكثر ماتمشي بس بالدگ
وشفت ناس اعلى راسي اتصير بيريه
آنه ابن التفگلوصار وكت الطـگ
وآنه ابن الكرم لوضيف مر بيه
ابن شط العرب سباح مايغرگ
وأببحر الشعر يرسن قوافيه
ابمنگار الصگـر شديت رجل الرگ
لان شفت الصگر عالي بشواطيه
عذري الهوى صادق إذا اعشك
وإذا افكر أحب كون الا بصريه
لأن حتى الصخر بالبصره هم يعرگ
وتراب الشوارع يحچي أبوذيه
من حقي أفتخر بالبصره ساسي اندگ
ومن دون الاسماء البصره علويه
من صار الوطن بالعيد وجهه ازرگ
ابدم اكبر ولدهه اتبرعت هيه
البصره أم ولد بالعيد ماصفگ
لأن انطه لبلاده جفوفه عيديه
أفصل الليل شيله وشرط ماتعتك
وأصوغ امن الگمر للبصره ترجيه
بالبصره واحن للبصره والهه اشهگ
ومابدل الدنيه ابتمره برحيه