يا عراق الله

ياعراق الله صبرآ علدهاك وأدري بهمومك تهد حتى الجبال
لاجن أنته يلوكلك حمل الثجيل وماتطخ راسك أبد والله ومحال
صار صبرك فرع من صبر الحسين أتعلمت منه الصبر والأمتثال
شنهو ذنب اللي جنيته ياعراق وبلفتاوي يصير دم شعبك حلال
ليش كل هاي الأرامل والدموع وكلي عليمن تيتمت هلأطفال
يفجروك وتطلع أنته المعتدي ويعدون الفجروك أهل النضال
والله لو شعبك يصير أمن اليهود جان من العرب يتدلل دلال
لجن شعبك ذنبه حب آل النبي ولجل هذا الحب تتقطع أوصال
أمن العروبة كلي أنته شحصلت غير بس جروحك ودمك السال
بسم الاسلام أنته كلسا تنطعن عفى كلبك أنته شتحمل نبال
طعنه علطعنه وجرح فوك الجرح شبه الحسين الشهيد أعله الرمال
منهو غيرك للعرب سد المنيع وعله راس العرب صرت أنته العكال
والعرب لولاك ماتكدر تعيش أنته أله الهوه والماي الزلال
يافدائي العرب يارفعة الراس الك تشهد بلفخر سوح النزال
نسوا وكفاتك اللي أستنجدوا بيك ونسوا صولاتك بساحات القتال
وين عمان ودمشق أمن الأحسان أشجازوا أحسانك دخل ننظر تعال
حرر الجولان عار أنته عليك هاي جولانك تره أبسط مثال
والمباديئ يطبقوها بس عليك وهمه واحدهم يخاف أمن الخيال
أنتوا بعتوها العروبه يلأوغاد وأنتوا بعتوا القدس ياشبه الرجال
وبعواصمكم علم أسرائيل رف وأله أحنيتوا الروس كلكم يلأنذال
الدوحه نعذرها لأن متصهينه لجن آنه أهنا أريد أسأل سؤال
مصر ليش أتصهينت وهم بعد أعليها أم العرب هلكلمه تقال
خدم لأمريكا العرب يتفاخرون شرق غرب أمن الجنوب وللشمال
عيروك العرب وهذا أنته بريئ همه فتحوا بوبهم صاروا وبال
السويس المنها دخلت بارجات والسليه القاعدة الأنطت مجال
نسوا أنفسهم وأجوك يعيروك وهمه عار وأنته كل معنى الكمال
تاج للتاريخ تبقى ياعراق وكلمن يعاديك عد جدمك نعال
نلت حريتك وخلهم يبغضوك همه شر وأنته معنى الأعتدال
يامضيف الخير واللي يعتنيك أمن الكرم والجود ترويه الدلال
الشرف أنته الغيره يمحالف الزود شأرد أوصفك وأنته آيه من الجمال
ياعراق الله الله أتمعنه بيك ومحد أيظاهيك وأختم هلمقال