آه ياوطن (شعر شعبي)

آه ياوطن
ـــــ
إي ياوطن ياخيط إلبريسَم والمغازِل سيف
ياسِنبل فرَح بيك إلمناجِل گِــصَــــــت
آه ياوطن آه ياوسَن مَذبوح بيك إلطيف
ذبَاحِتَك حَدر إلظِلع سِم زَرعَك إليانع سِگَـــت
چِسوَة شِته إوسَعفَة نخَل فَكَس إعيون إلصيف
آه ياوطن يَلي إبجَبينه إلكون بَس إسمَك نَحَــــت
يَعراگ يافَرحة طِفِل بعيونَه شاف الظيف
موكِل حِظن مِثلك وَطَن موكِل بَخَت مِثلك بَخَــت
إلوطن مو غِنوه إوقَصيدة شِعر نِكتبها حَسب إلكيف
إلوطن ماي إوهوَه ماشَح بُخِل لو كَصَر أنفاسَه إوسِكَت
إلوطن شيمَه إلوطن وِجدان سِخي ماچَه إعلىَ بالَه إلحيف
مَشكول ذِمه إلساومَك والباعَك إوبأسمَك سَحَــــت
حوبَة يِتيم إمخاصُمك بالخاصُمك هَل شوَرَت
زَمزم يِطَهِر كِل نَجِس وإلمرضَى مِن مايَك شِفَـــــت
يَعراگنا إلغُربَه سُگم وَحشـَه إلشـَمِس لو سَلِمَت
يازين شـَمسَك ياوَطَن صَيف إوشِتـَه لوسَيَــــرَت
بالگيض وَي فـَي إلنـَخَل شَمس إلعِراق إتعانِگَت
تِنـزِل تَواضع بالشِته إبلوح إلحِصاد إتمَشرِگَـــــت
وَحشَه إلليالي إبلا وطن غَم إلبيابي إلما بِچَت
لَجل إلوطن دَم إودَمِع وعيوني لَعيونك عِمَــــــت
طِرشَت إذاني إمن إلسِمِع چيف إلسَلَف مابي نَجيبه هَلهِلَت
لوعَه إوگَحَط يَعراگِنه وسنين سودَه إعليَ سِــــدَت
يَفناك ماهي إبكِل سَلَف لَليورو جِحجِح دَنِگَت
بَعض إلزِلِم تقرَه عَكِس والبَعَض أبداً ماقَــــــرَت
ماسِر خفَتلَك ياوطن صِدگ إوچذِب سِرَك فِشَت
شتگلها باچِر لولِفَت شتگِلها لَرضَك لووِطَــــــت
هم تعتِب إعتاب إلوطن والگصَه لولادَك نِدَت
وتفُك ضَراعينَك وطن لَذيابه خِدرَك دَنِسَـــــــت
لاياوطن بَسَك هَظم باعوك وإعداك إشتَرَت
وَضِي البگَه إبدَم دِجلِتَك هاي إبخِزيها إتيَمِمَــــت

مشير مطرب السعيدي

مرحبا بك اخي مشير السعيدي
احسنت على هذه الكلمات
ارجو ان تحرمنا من سماع المزيد


إي ياوطن ياخيط إلبريسَم والمغازِل سيف
ياسِنبل فرَح بيك إلمناجِل گِــصَــــــت
آه ياوطن آه ياوسَن مَذبوح بيك إلطيف

السلام عليكم

اشكرك على ثنائك الرائع يارائع

بصمتك هنا ذا دلاله معنويه لي



شكرا


مشير السعيدي

شكراً أخي على الكلمات الأكثر من رائعة في حق الوطن العزيز ...

ننتظر منك المزيد فلا تحرمنا ...

تحياتي لك ...

السلام عليكم ورحمة الله وبركاته

شكرا لثنائك الرائع كروعتك

شكرا لطلتك البيهيه في شعري



اخوكم

مشير السعيدي