ترشيد استهلاك لمادة غير موجودة اصلا !! طبعا هو غير ممكن بس بالعراق كل شي ممكن

[b]اعلنت وزارة الطاقة الكهربائية العتيدة انها بصدد اطلاق خطة وطنية شاملة تهدف الى ترشيد استهلاك الطاقة الكهربائية في البلاد .. وذلك بسبب الاسراف والاستهتار باستخدام هذه الطاقة العزيزة ...

جدير بالذكر ان هناك مناطق في بغداد والمحافظات لا ياتيها التيار الكهربائي سوى 3 ساعات من اصل ال24 .. ناهيك عن بعض المناطق الاخرى التي يتم تغذيتها بالتيار لساعة او ساعتين كل يومين .. وبشكل عام فان احسن الاحوال في المناطق الاخرى هي ساعات محدودا جدا جدا في ال24 !!!

والسادة المسؤولين في الوزارة مضايقهم هذا التبذير .. السمسرات والتقفيص بملايين الدولارات لجيوبهم بعمليات شراء المواد والصيانة والتعاقد مع الشركات هذا مو تبذير ولا هدر ولا اسراف .. هذي شطارة .. والحمدلله الحكومة غفيانه .. ومجلس النواب نايم .. وهيئة النزاهة معزومة ع الغدا والها نصيب من سمسرات القوم .. وبما ان البلد يعيش حالة امنية مزرية فلاباس بالسرقات لان لدينا شيئا اهم نعالجه .. تلك هي حجج المنافقين والكذابين والمتسترين على فساد مسؤولي الدولة ممثلي الشعب رافعي الشعارات الطنانة ...

اشبع قهر يا شعبي ... اشبع ضيم وظلايم ... موت انفجر و انتحر .. جوع اتعرى و تحفى .. مو مشكلة لازم تتحمل .. وتصبر .. وممنوع تفك حلكك وتحجي .. وانعل ابوك لابو لاتدوخ راس المسؤول .. خليه ملتهي .. يعبي جيوبه ويقفص .. يحجي بسم المرجعية والدين والجراحات والمظالم ... ولمن تواجهه بالحقائق يكلك انت تدعم الاحتلال .. وتريد تشق وحدة الصف .. انت خائن انت منافق .. ومو بعيدة يصير المسؤول الفاسد هو صاحب التضحية وتصيرانت مجرد عائق .

اخي موج البحر الترشيد شئ جيد للجيب اولا.. وكما ذكرت الكهرباء هي نفسها طالعة من العراق وطالبة لجوء بالخارج .. وتقول انا ومسؤلين ماعندهم خبرة ببناء محطات كهرباء جديدة ويرجعون لي شبابي منقدر نبقى ببلد واحد..." لسان حال الكهرباء"
اما بالنسبة لقصد الترشيد فيااخي ولو انها ليست مسالة عامة لكل العراقيين لكن هناك الكثير من البيوت العراقية تشغل اكثر من مكيف هواء وتعرف هذا مايستعمل كهرباء بل يبلع كهرباء مثل السيارة الامريكية كيف تشرب البنزين وماتنقطه..
فلو اكتفى كل بيت عراقي عنده مكيفات بتشغيل مروحة بكل غرفة لوصلنا الى ان الكهرباء تنقطع ساعات اقل مقابل طبخ قليل للمواطن .. وغير هذا الحل ماعندنا لان لاتوجد نية نبني محطات كهرباء بل نيتنا لاتتعدى السين وسوف وهذه لاتغني عن جوع..
مشكلة العراق بالتحزب والمحافظاتية والعشائرية وهذه هي التي تعرقل النمو بعراق اليوم.. واهل الخبرة لاينوون خوض النقاشات مع الجهلة من اصحاب الكراسي المتحزبين بشدة الى موقف الحزب..
ولاتشكي لي حتى ماابكي لك. وانت تعرف قضية غطي لي حتى اغطي لك فهي متداولة بكل مشروع اعمار بالعراق وكل واحد ياخذ نسبة ومايتحقق الا القليل للمواطن.

اهلا اخي بابل ..

رحمة لابوك يعني شلون بلله ... هي تجي ساعتين وهم مايصير اشغل مكيف يخلصني من جهنم صيف العراق ..

اتفق معك تماما .. الجماعة يتصرفون على قاعدة حكلي واحكلك .