ضد التطور

ضد التطــــــــور

نائل مظفر/ البصرة

صح كبل شارع ترابي بلا رصيف

والصريفة البيهه كاعد المي اعلة كيف

لكن احسن ما جوه التبليط رجلي

ولا نمت فوك الرصيف

كبل ميصير التطور جانوا التجار كلهم شرفاء

وهسه من صار التطور بالالف واحد شريف

كبل حمام بصريفه بشته وبابه برده

وكنه ما خذنه الرجيف

وهسه كيزر مي حار ودوش عدنه وبالالف واحد نظيف

كبل تنور اهلي طين.. والصديق ايصير اخوية

لو على مر مرة ضيف

هسة من صار الخبز على الكهرباء ظل يحط عينه اعلة اختي وحلكه ياكل بالرغيف

اني ضد هذا التطور

لا تكول انسان رجعي وناس وصلوا للكمرما اريد وياهم اصعد حتى ما صيرن خفيف

كبل بس فانوس عدنه وجنة كل مغرب نشعله

وعلى النبي نصلي ونكبر

وهسه لو شعلو علينه الكهرباء حتى شايبنه يصفر

وكبل جان السكف خوص وحايط الينبني بين الجار خوص

وما تزل عالجاره عينه

جانت الكصبات تستر وهسه طابوك السياج

شويه ناصي بصفه كرسي

ارفع ايدي بس اشر هي تطفر

انهضد هذا التطور

بالحياة عملو الالوف التجارب والبحوث

تدخل انظمة وندوز الكل الحاسبات

بلكي عدكم حاسبة

جم عراقي بلا عشه تعود يبات

نطرح اهموم العلينة نقضم اظهور الطغاة

صنعو التلفاز

ريمونت كونترول حتى محد يتعب بوكت الصلاة

وهوه كاعد لو سمع صوت الاذان

يدوس دكمة الوحدة اتبدل قناة وعارضوا بالتفرقة بزي النساء

وحدة مرتدية حرير وحدة مرتدية رثاة صمموا وحدة حديثة وحققوا بيهه التساوي

وهسه كلهن عاريات

ما اريدن بيري فيزا يصمم ازياء النساء حتى لا يتعرى جيد

وما اريدن بكمبيوتر ترتفع جثة شهيد

كبل طب اعشاب عدنه يعني لو كلبك يموت

اتموت كلك ما تفيد

ما اريدن كلب اي تمساح نزرعلك اذا انته تريد

وما اريد اشما اكص جف الحرامي يروح يزرع

جف جديد

وما اريدن تنغرس نطفة برحم

حتى لا ولد الزنى بوكتك تزيد

سحبوا بليزر رصاصة بمعنى نقذوا روح واحد بالسويد

وضربوا بليزر الف ملجا عراقي وذابت اعظام البشر حتى الحديد

انه ضد هذا التطور

للتطور ما اريد