تعال وياي

تعال وياي

غانم هاشم الفياض

تعال وياي ننسه همومنه البينه

وايد بيد نعبر فوك ماضينه

تعال وياي نرسم للحزن تابوت

ونشيع جرحنه الجان ياذينه

خل نبني منارة نباهي بيهه الناس

وعلى اخدود المنارة انعلك اسامينه

ونحبه بكثر ما بالعراق اجروح

وكد ما للوطن شبان زفينه

احنه بعينه شفنا حلم يبات

اشرنا حلمنا وكمنا صلينا

لان طبع المحب مرات من يشتاك

بس صورة الحبيب يشوفهه بعينه

احنه بلون واحد بس طبعنه اشكال

مرة انصير وردة ومرة سجينه

وفرق بين الورود البلحديقة تفوح

وبين الغافية بسندانه للزينه

جنه اسنين نحلم والوطن مذبوح

وجان بسد حزنه تلوذ امانينه

جنه انخاف من يندك علينه الباب

جان الموت يخطف حدر رجلينه

جم مرة ابنادقنه اعتنينه الموت

صوبنه ولكينه اصوابهن بينه

جم مرة انتفضنه وصحنه باعلى الصوت

بس ناكل بعضنه البعض ردينه

جم مرة سمعنه حسين بينه يصيح

وشفنا الدم يسيل وكلنه شعلينه

جم صدر انذبح وجم شهيد الطاح

جم جربة التسيل وتعطس اسكينه

من صلة الصدر صلت وراه الاف

بس من طاح لذنه بسد جفافينه

ضمينه الجفوف ونلطم اعلة حسين

ونصيح نطه العباس جفينه

موهي الطفوف ابكل عصر تنعاد

بس وين الموالي الينتخي لدينه

امس كام الحسين الدمنه يطلب ثار

صدكنه يزيد وبيه شكينه

واحنه البايعينة حسين ويه الناس

بس ابمجلس ابن زياد غنينه

عفنه اعثوك اهلنه الغير اهلنه تروح

وباب الدول تمرات جدينه

من كد ما تعودنه الظلام الحاد

كمنه انخاف خاف النور يعمينه

غضينا النظر عن الحرامي الجاي

يشرب دم شعبنه وكلنا يحمينه

وغيمة وين ما تمطر دخلهه تروح

ما عاد الخراج بجيبنه يجينه

وحنه الجانت الدنيه من اسمنه تخاف

وما بين الدول مهيوب طارينه

عراقيين زحنا من المنايا الضيم

وبوجه الظلام اشموس ضوينه

ما يطفينه ماي الدنيا من انثور

بس دمعه طفل جوعان تطفينه

علسنه اهمومنه من الجوع وكت الجوع

وغمسنه جرحنه بدم اهالينا

رحنا الكرب عنا بغير جف فلاح

ومثل شبة نهر بالكاع شبينه

احيك على هذه القصيده التي ماتزل تتكلم عن ماضي ومستقبل وطن مجروح
انا علي من الناصريه تحياتي لك