نريد نخطب (مرام) لمطشر - ابو مطشر

[31-12-2005]
خابرني صديقي بالموبايل. ومن شافني ابو طمغة ضحك وكال ها ابو مطشر صار عندك موبايل؟ اي والله يا ابو طمغة, هذا الاحتلال مالكم اللي ماترضون عليه جابلنه موبايل بالعراق وخله كل العراقيين يخابرون ويكتبون ويقرون جا مثلك ظليت امي رحمة على امي.
ليش ابو مطشر اني امي؟ مو اني اقره واكتب.
* يا ابو طمغة كلها تقرا وتكتب . وكل الاحزاب تقره وتكتب وتصدر بيانات وتصريحات بس كلها امية. ما تعرف تقره الوضع.
- هاي منو علمك ابو مطشر.؟ صاير مثقف؟
* والله يا ابو طمغة لا مثقف ولا مسكّف. ذاك الوضع مبين مثل الصبح. عمي انتو اميين ماتعرفون تقرون العراقيين. العراقيين انتخبوا مذاهبهم وقومياتهم لان صدام ماخلالهم شي غيرها, وتعال اكلك يا ابو طمغة انت مو قريتلي فد يوم مقال يكول العالم رد للدين حتى بامريكا , ليش مستكثر على العراقيين يردون للدين؟
- بس هاي موسياسة ابو مطشر.
* موسياسة. بس ماكو غيرها. جا انتو سويتوا واحزابكم اسوّت. اني مو اعتقلوني بتلاثة وستين بانقلاب شباط واتهموني اني من انصار السلام لان طيّرت حمامة بيضة بوحدة من المظاهرات بزمن عبد الكريم.
- لعد شرجّعك للسيستاني؟
* عمي رجعني الهم. وماكو غيره بالساحة. ينطي امر تروح الناس وراه. وينكم انتو؟ اكو واحد منكم ينطي امر مثله. وين الزعيم؟
* عندك حق ابو مطشر. ماكو زعيم الا كريم
ضحكنا انه وابو طمغة. ذكرني بذيج الايام. ايه, راحت وراح وياها كل شي. الدنيا اتغيرت, والوادم اتغيرت, والسياسة اتغيرت. منهو الجان يقبل بامريكا ومنو الجان يقبل بالصخونة, غير لمن شوفنا صدام الموت.
ايه. نرجع للموبايل. صاحبي جان يخبرني بالموبايل الله يحفظة ويديمه ويحرسه وهو بالجيب من ذولة النكرية اللي علمهم صدام ينشلون حتى المخطانة من الخشم, ان الانتخابات مزورة.ولمن كتله من يكول كال: مرام.
بويه منهي مرام؟ انوب صرنا نسمع مرام. جا هي جهينة خو مو جهينة. جا هي زرقاء اليمامة ؟ منهي مرام وشكد عمرها وبت منو وشنو عشيرتها واصلها وفصلها حتى بلكت نخطبها لمطشر اللي مايقبل الا بمجندة امريكية. ذبحني . يفتر وره المجندات ومخيل على وحدة شكرة وعيونها زرك. بلكن يقبل بمرام ونزوجها اله ونخلص.
كشر ابو طمغة عليّ وكال: بابة ومنو كللّك مرام راح تقبل بمطشر.عدها زلم خشنة هواية , واحد معكل واللاخ ابو سدارة وواحد ابو عمامة وواحد ابو قاط ورباط وواحد ابو دشداشة واللاخ سمين ومربرب وعنده لغود وعنده ملايين, شنو ظلت على مطشر.!
كتله: أي مو مطشر فقير وعلى كد حاله لعد منو يزوجه اذا مرام هم رفضته.؟
ابو طمغة ضحك وتمدد وكال: بابة لعد ليش سموها مرام غير يعني هي ماتقبل بكل شئ, لو هي تحكم لو متقبل.
لاحول ولاقوة الا بالله. لعد ليش صارت حرب وردنة ديمقراطية وانتخابات, خو جا لو ظالة على جماعة مرام هي هي همه هم جانوا ويه صدام , جا شنو الفرق؟
جاب ابو طمغة النركيلة وجرله نفس وذب الدخان بره وكال: الفرق بالفساد ابو مطشر. جانوا يريدون يسرقون وصدام جان ميخليهم هسة صارت فرصة . الكل تسرق وتحجي على النزاهة, والكل تريد تحكم وتحجي على رفض المحاصصة والطائفية, والكل تريد مناصب وتحجي عن الوطنية والتضحية .ابو مطشر مو انت سياسي قديم من ايم خلف بغداد . تذكر من جنت تطلع مظاهرات تندد بحلف بغداد.اني سمعت تندد وسالت ابو طمغة شنو يعني تندد؟ هاي شنو ابو مطشر, نسيت هتافك: حرية عرب واكراد .. حطمنا حلف بغداد؟ دكلها. الاكراد اخذوا كل شي: الجيش والخارجية ورئاسة الجكهورية وست وزارات ونص الخزينة بدل ربعها وموارد الاقليم وصار ماكو سياسي عربي عراقي يريد يحكم اذا مايبوس ايدين الاكراد ويبصم اللهم على الفدرالية وكركوك وثلث الموصل ويحلف براس مسعود وجلال كبل ميحلف براس العباس ابو راس الحار.
لمن خلص ابو طمغة اتذكرت الشوفونية اللي جنا نتهم كل عراقي بيها اذا قلد على الاكراد وذبله نكتة. أي ابو طمغة رجعت شوفوني؟انه كلت شوفوني وتورطت. ابو طمغة كعد يضحك ويضحك ويضحك. كلتله شبيك ولك ضربك خناك. كال لا بس هي موشوفونية . لعد شنو ابو طمغة, شنو السالفة. كال شوفينية . كتله مو مشكلة انت شوفوني تضحك على الاكراد كال ولك انت تحجي صدك ولك ضحكوا علينا والوزير هوشيار زيباري عين كل الاكراد بالسفارات وعين كل البعثية وجن نظام صدام تحالف ويه الاكراد.واكو ناس فضحوا المستور والوزارة كالبه الدنيا عليهم. الدنيا فلك يا ابو طمغة وانه اخاف ادور, ادور وتنكلب علينا كلنا , الله يستر.
ابو طمغة عوص عينه وكال: شوف ابو مطشر. اذا الامريكان رادوا يبنون العراق يكدرون يبنوه, وهمة الرابحين .واذا رادو يخربوه يخربوه بيوم وليلة مثلما خربوه بالحرب وبعد الحرب, بس هاي مو ابمصلحتهم.
ردت اختم الحجي ويه ابو طمغة وكتله: هاي منيللك هذا الراي؟ ضحك ابو طمغة وكال: من بوش. خابرني بالموبايل.