عراقي وطبعي طبع حسين

كلتلهم احبك كالوا انت منين شا فوني اعله حبك شايل اكتابي

كلتلهم عراقي وطبعي طبع حسين ما بدل ذهب بتراب جذابي

كالولي تبيع اترابك وهذا الثمن موجود كلت هاكم ركبتي وعوفي اترابي

عرفوني حسيني من هذاك اليوم ومن ذيج المواقف حسبوا حسابي

شلتك جمرة تسعر والوكت من نار دمعة ابين جفني وطارف اهدابي

حبكم علماني شلون احب الناس وافتح للنجوم العالية ابوابي

وعلمني هواكم للشمس اشتاك وعلمت الشمس تشتاك بغيابي

اريدن حيل اصرخ واندهه الغافين افزز ناس ظلت من امس نومة
بعض الناس سكتوا والبعض خرسان وبعض منهم لهسه اشفافة ملجومة

ما نحمي العراق ولاعراق ايصير بساتر من ورق وسيوف مثلومة

سد باب الحدود الناس جاي اتموت وتعبر من حدودك ناس مسمومة

شنهو العاجبك من كرسي تحكم بيه وتحكم ياوطن واركانة مهدومة

وليش ادور بيهه وتخلط الاوراق قضية ابلا جدال وامس محسومة

كعكة اتقاسموهة وصفة اعليهة الماي وانت تريد تاكل كعكة مقسومة

ما اكدر اكل للمايصير ايصير واليذبح ضميره اكبالي ما لومة

وما اكدر اصيرن بالحرب فلاح وازرع ورد جوري بكاع ملغومة

فك بيبان صبرك ضاكت الشدة الصبر يعني تخاذل لو وصل حده

بالدم ينغسل كل دم يطيح بكاع ودروب الشهادة اعلة الركاب ابده

غمامة وتنجلي وتتكاشف الاجيال والتاريخ كلمن طينته بخده

المن ظام سيفك كون عندك سيف وياشده الامر من هذه الشده

والمن ظام سيفك والعرض منهوب وغير اهل العرض ما واحد ايرده

وغير اهل العرض ما واحد ايرده

هذه القصيدة للشاعر غانم هاشم الفياض