إلى مسلم إبن عقيل وأولاده (ع) / قصيدة لطم
[align=center]لقلة ذكر أولاد مسلم بن عقيل (ع) أقدم لهم ولأبيهم هذه القصيد المتواضعة جداً
المستهل
ـــــــــــــــــ
يمسلم عاين أطفالك *** صفوا بسجون متغربين
عﮕب ماجانوا بجالك *** ﮔطيعة الروس مذبوحين
**************************************
(1)
عﮕب ماطاح أبو اليمه ... غدت نار الخيم تسعر
يتامه إتنادي بأرض الطف ... وصريخ أطفال تتحسر
يمسلم تاهوا أطفالك ... بعد ماشافوا العسكر
شياطين بجسم إنسان ... يوسفة إتسلب الخدر
ﮔظوا ليلة بفكر مشغول *** بقوا بالصدمة مذعورين
يتامه ومن زغر سنهم *** ﮔطيعة الروس مذبوحين
(2)
تاهوا بالدرب الأطفال ... بعد إلمن تصد العيون
تردهم تالي لبن إزياد ... ﮔوم إمن العدة يمشون
صفوا رهن السجن وسفة ... يمر عام بسجن يﮕضون
وعلى السجان ينادونه ... نخبرك إحنه منهو إنكون
رسول الله ترة جدنه *** بالطف جنه مرعوبين
تركنه أبدان على الغبرة*** ﮔطيعة الروس مذبوحين
(3)
تسيل أدموعه للسجان ... وفتح باب السجن ألهم
يﮕلهم روحي فدوة ألكم ... يمن صار النبي جدكم
مشوا وين الدرب تاهوا ... بقوا منهو اليوصلهم
خبرهم يوصل إبن إزياد ... وللناس بجائزة إيغرهم
تدور أعليهم العدوان *** القصد ليوين محتارين
القدر ياوسفة ناطرهم *** ﮔطيعة الروس مذبوحين
(4)
تشوف الجارية الأطفال ... تﮕلهم شنهو قصتكم
يخبروهه الجرة بالطف ... وتسيل الدمعة من عدهم
تروح إوياهم أعله الدار ... مشت كل ظنهه تنجدهم
لجن ماجانت أعله البال ... بديهه الموت تاخذهم
يفز محمد إمن النوم *** كوابيس التبجي العين
يﮕله خويه شفت اليوم *** ﮔطيعة الروس مذبوحين
(5)
أجه الحارث وصل للدار ... سمع صوت بهمس يحجون
مشه ولمن وصل للصوت ... يشوف أطفال دمع يبجون
وفرح لمن عرف بيهم ... يوسفه بغدرة مايدرون
نزع كل رحمة من ﮔلبه ... يريد الجائزة ومجنون
يقيدهم صفوا بحبال *** شموع أطفال متقيدين
أجلهم شائت الأقدار *** ﮔطيعة الروس مذبوحين
(6)
يﮕولوله يحارث ليش ... ناوي عالذبح بينه
للسوﮒإنته أخذنه وبيع ... ثمنه أضعاف تلﮕينه
يحارث ﮔوم إخذنه وروح ... ولبن إزياد ودينه
يحكم بينه شنهو أيريد ... عليش أعله الذبح ناوينه
يﮕلهم لاعذر ألكم *** أحني بدمكم الجفين
أريد أتقرب بدمكم *** ﮔطيعة الروس مذبوحين
(7)
يﮕله محمد أنه اليوم ... تذبحني ﮔبل ماشوف
أخوية بدمه يتخبط ... أصد أشلون عيني أتشوف
يرد إيجاوب أبراهيم ... يحارث لوتسل أسيوف
ولاشوفن أخوية اليوم ... يصب دمه ودمع مذروف
ﮔطع راس الطفل بالسيف *** ونزل عالثاني سهم البين
ذبحهم وسفة للأطفال *** ﮔطيعة الروس مذبوحين [/align]
