من گطعوا أيميني / لعيون شبكة العراق الثقافية
[align=center]من گطعوا أيميني *** ومن صوبوا عيني
حسين بصوت ناديته ** جود الماي هديته ** من گطعوا أيميني
*************************************
(1)
نفذ صبري وصحت يحسين ** أصول أعله العدة خلني
أدافع عنك بسيفي ** دموعك خوية تجرحني
أشوفن دمعتك بالعين ** وعلى الأكبر كثر وني
أخوتي أگبالي مذبوحين ** ودمع زينب يلوعني
أسمعت زينب عليه أتصيح ** يعباس أنته كافلني
صبر ماظل بعد عندي ** نزل دمعي غصب عني
للحومة خليني *** وأفديلك أسنيني
عمري أوياك ضحيته ** جود الماي هديته ** من گطعوا أيميني
(2)
الحرم تصرخ يعمنه أتصيح ** أجيب الماي يردوني
من نار العطش الأطفال ** ولاگدروا يحاچوني
يؤميلي الطفل بالأيد ** عليهم هملت أعيوني
نفذ صبر الگلب مني ** أسمعت كلهم ينادوني
شلت بيدي العلم والسيف ** وأحس بنار حرﮔوني
صوب المشرعة أتعنيت ** وجود الماي على أمتوني
لن سكنة تنخاني *** عمي لاتنساني
دمعي أعليك صبيته ** جود الماي هديته ** من گطعوا أيميني
(3)
مشيت أعله العدة بسيفي ** ولا واحد بقة أگبالي
وصلت المشرعة وطبيت ** أشوف الماي يحلالي
غرفت بأيدي شربة ماي ** عليهه أتگطعت أوصالي
رميت الماي من أيدي ** شلون الماي يهنالي
شلون أشرب وأخويه حسين ** يمر كل لحظة بخيالي
گلبه أمن العطش يسعر ** وعينه بلهفة تربالي
شلون أشرب وأروة *** وأطفاله تتلوة
أهناك حسين خليته** جود الماي هديته ** من گطعوا أيميني
(4)
مليت الجود من الماي ** ومشيت بلهفه متعني
أقاتل بالعلم والسيف ** لچن چفي أنگطع مني
گطع سيف العدة الچفين ** وعمود براسي صوبني
تبدة الماي على التربان ** شفت جودي أبتعد عني
طحت فوگ الثرة مخضب ** وسهم بعيوني لوعني
صحت وبحرگة خوية حسين ** ردت يحسين تودعني
من شفتك أگبالي *** ودموعك أتلالي
گلبي بنار وجيته ** جود الماي هديته ** من گطعوا أيميني
(5)
سمعت حسين أخوية صاح ** يعباس أنكسر ظهري
حضن راسي ونزل دمعه ** صحت يحسين نفذ صبري
منهو أيودعك يحسين ** لو دمك نزل يجري
خلني أعله الثره مطروح ** شگلهم لو رحت مدري
شگل لسكنه وين الماي ** أروح وشنهو ظل عذري
ينادون العطش عباس ** نار وبالگلب تسري
ودموعي هماله *** من أذكر الحاله
گلبي أوياك وديته ** جود الماي هديته ** من گطعوا أيميني
(6)
لاتبچي يخوية أرجوك ** فدوة الروح ألك والعين
چفوفي أتگطعت وأتهون ** ولاتهمل دموع العين
باچر بالحشر وياك ** نوگف وأحنه مخضوبين
نشكي أهناك بينه الصار ** نبچي وكلنه مذبوحين
أودعك خوية وأنه اليوم ** ظلت بالگلب نارين
نار أمن العطش تلهب ** ونار لفرگتك يحسين
وفرگتك تچويني *** وأتزيد ونيني
صدري أعليك ضميته ** جود الماي هديته ** من گطعوا أيميني[/align]
