خط الحسين ( قصيده للشهيد السيد محمد باقر الحكيم)
خط الحسين
ـــــــ
مانبچيك دَم إولا نِهِل إدموع
نِريد إنغَير التاريخ إوحِزِنَه إعليك چوبيه
إونِتحَنَه إلوِداعَك نِعلِك ألف شموع
إوعِرِس لَجلَك نِقيم إوهوسَه يوميَــــه
لأن وي إلحَسين إليوم بالفردوس
متأكدين مِنِك ميه بالميَــــــــــه
وإلسار إعلى خَط حسين فاز اونال
صَك غفران بيدَه إموقعَه باريَــــــه
فَرحانين لَجلَك چي فِزِت مولاي
بَس ثارك وَحَگ عيناك كِل وِصلَه إبعَشر ميه
خَي عون العراق إوكُبَر بَخت الگاع
مِن دَمَك غِسَل ياطود واديَــــــــــه
زاح إغبار حَفنَه الفاتَن إمن إسنين
سَودَه إسنين غَبرَه إعليك وإعلَيَـــــــه
إوزَهَت بيك إلنَجَف وِإتنومَس الكرار
هِنيالَه إليطيح إبراگ داحيَـــــــــه
ماذِبحوك بَس لَنَك سَلين حسين
لاذِبحوك چي ضِد إلشِعوبيَـــــــــه
إوچي لَنَك دَعيت إلوِحدَة إلاسلام
وِإلوِحدَة عِراق إبلايَه قوميَـــــــــه
باقر بيك طه إتباها يَم باريه
لَن چَفَك سِخي مِن دون مِنيَــــــــه
يالعِلمَك تِعَدَه إحدود عُمرَك باع
جَسدت الحكيم أفكار وإلثورَه خُمينيَـــــه
قارعت إلظلم بأول هِبوب إلريح
إوشِلِت شُعلَت غَضَب بيدَك تِمور إلشُعلَه حَريَه
خان إلنص يِسولِف بيها حتى إليوم
باقِر ثار بالسَبعين بِوجوه إلحَراميَــــــه
باقر گال بأولها عَلَن ماهاب
عليهم طَلگوا لِذ إلنوم ذولَه أرذال بَعثيَــــه
ذولَه إبلا ضَمير أنجاس ذولَه أرجاس
شِياطين إوثَعالب ذوله واويَــــــــــه
إونَعَم بَيَن على أشهاد العَيان إشگال
بالجملَه ذَبح وإگبور جَمعيَـــــــــــه
ولامِنهم سِلَم حتى إلطِفِل بأگماط
قَليل إنگول هاي إلزُمرَه ساديَـــــــــه
باقِر ماغمَض هيهات باقر نخبَة إلثِوار
باقر ماخِنَع لِلظيم لوفاوض شِواذِيَـــــــه
باقر لِليِتامَه إرغيف باقرچِسوَة إلعَريان
باقر لوحِچَه إبديوان تِسبُط كِل زِلِمها إتگول ماهيَه
إوباقر مِن يِظيفَه إلظيف
صار إلظيف رب البيت إوباقر صار عانِيَـــه
ذو إلفِقار على الحَگ شامخ إبشاخين
مِن آل الحَكيم محمد إبغَيَــــــــــــه
عَلمونا إلفَضيلَه إومعنى حب الگاع
إودَرسونا إلحسن وأطباع وِديَـــــــــه
إووَشحونا الحسين إوعُظُم چِلمَة لاء
إومِن دَمهم شِيَمنا إبشَرَف مَسگيَـــــــه
يَلمالَك بَخَت مِن ذولَه إخِذ تاريخ
إومِن ذولَه إستِمِد ياصاح ثوريَــــــــه
دين إومَرجِلَه إو وِجدان ماموصوف
مامَعوج أصلهم من علي الكرار
ساده أولاد ساده إوقاده شِعيَـه
مشير السعيدي
