شكوى ... إلى أمير المؤمنين عليه السلام

حيدر ... بجاهك ولينه
ندعي ... تفرج علينه
من يوم مصابك والطبرة ... جم آه ودمعات وحسرة
***************************
(1)
حال الشيعة بالتاريخ ... من يوم الرحت لليوم
جم روح المضت بينه ... وجم نعش أنحمل مظلوم
وجم كلب أنكسر لجلك ... لجل حبك علينه أيدوم
بعنه الدنيه والبيهه ... وعمرنه بكل وكت محروم
نشكي ... حيدر وضعنه
تدري ... تفرك شملنه
يم بابك نهملهه العبرة ... جم آه ودمعات وحسرة
(2)
مراحل مرت أعله الناس ... ودمعها الصبته من دم
يحيدر طالت الشدة ... وكتنه أصبح عذاب وهم
وأصعب مرحلة أعلينه ... نريد أنزور ماترهم
أحتلال لمرقدك ثاني ... ودهور الشيعة تتألم
أنزورك ... ماطح بدينه
المحنة ... تكبر علينه
نبجيلك كل دمعة بجمرة ... جم آه ودمعات وحسرة
(3)
من كل الدهور أحنه ... وكتنه أصعب وكت هالحين
إحتلال وغيبة الوالي .... وظلم مامر على الباقين
ورجال أتقوده مذهبنه .... بلباس الدين متخفين
نريده اليوم مهدينه .... نخافن ماتشوفه العين
الغيبة ... طول مداها
الشيعة ... بيكم رجاها
جم ظلع إتهشم جم سطرة ... جم آه ودمعات وحسرة
(4)
يحيدر ليلة الميلاد .... برصاص أنضربوا الزوار
بيا جيل الحصل مثله .... لون نشرح علينه الصار
ماسوت مثل هاليوم .... أمية وكل هذاك العار
عادوا طبرتك هاليوم ... وردت هالخيم بالنار
شفنه ... إهناك العجايب
وصحنه ... شوفوا المصايب
ظل راس حسين بلا نصرة ... جم آه ودمعات وحسرة

(5)
مجبورة الجروح أتنوح ... وتخبرك بالجرة بينه
أنته بكل وكت موجود .... وتهل أدموعك أعلينه
تفركنه ولهيب النار .... كل مانصحه يجوينه
يحيدر بس ألك ننخاك ... مرحب رد يأذينه
رادوا ... نتخله عنكم
وأحنه ... نمشي بأثركم
مانكدر منكم نتبرة ... جم آه ودمعات وحسرة
(6)
قسموهه اليهود اليوم .... لون نستعرض الأدوار
ناس أعله الحكم تركض ... وناس أتسقط الثوار
ودور اليمنع اللي أيزور .... يوصل مرقد الأطهار
لكن يالوصي نقسم .... نقدم لجلك الأعمـــــــــــار
جمرة .... الشكوة بكلبنه
لجلك .... مايهده حبنه
من نوصل يم باب الحضرة ... جم آه ودمعات وحسرة منقول