سوالف فكر ابن فكر

سوالف فكَر

مرات احب السوالف وي روحي وأضحك كلش هوايه ومرات احب احطها على الورق خافن يوم انسى او تصيبني ضعف بالذاكرة بسبب حادثة بايسكل على رصيف المحافظ لأن هو الوحيد العالي ..... والقناط بيه الوحيد اللي بيه غطا آهاين......وبعد سنين شويه شويه صرت أتماشى غصبن إعله روحي... وهاي سالفه:-
بيوم من الأيام جنت تعبان كلش من الشغل وانا بطرقي للبيت او للغرفه اللي ساكن بيها تحت بيت جيراني وهي مو غرفه بالضبط هي نص سرداب انزل خمس درجات للغرفه واني عفت (قصر اهلي) على مود البروده اللي بيها بالصيف..... وعلى كل حال لاكاني صديقي يشتغل بالكهرباء بقسم القطع واللي صارت عنده سياره برنس بعد ماجان ير كب بايسكل يدحج وهو رايح لأعدادية الصناعه بذاك الصوب.....
_اليوم تنام على المبرده للصبح........... جاوبته!!
_شلون عيني؟؟ ابوك صار وزير الطاقه؟
_ لا حبيبي صرت انا بمكان مدير قسم القطع لتلث تيام لأن المدير عنده فاتحه بمنطقتكم والكهرباء راح تشتغل عدكم تلث تيام, لذلك كلت ابشرك حتى تنام براحتك وماتطلع للشغل على مود تشبع نوم وتنتصر على البك والبرغش
_ هاي بشاره تسوى ذاك الحساب .... اشكرك خويه علوان ورحمة الله على والديك.
لذلك رجعت للسوك وجبت عدة السهر وأستأجرت فيديو وجبت مسرحيات حتى اضحك للصبح وخمس نفرات كباب وكرزات ومشروبات كبس بيت...
اشتغلت المبرده بحيث صوتها خلاني بعد ما اسمع صوت ماطور ماي الجيران واللي التانكي مالتهم فوك شباج الغرفه مالتي واخذت راحتي كلش بعد السبح وذيج السهره الحلوه عيني بوحدي وحطيت راسي على المخده يم الشباج ولأول مره من اشهر ماافتح الشباج من انام باليل ومن كد ما جان الكباب دسم ناع على كلبي وخذتني الغفه ورحت بسابع نومه والحلم جان كلش واضح وكأني في عالم آخر من هاي الدنيه وشفت نفسي فوك جبل عالي ماشايفه من قبل وكأني اشوف العالم كله ومسيطر على المنظر وبعد لحظات اجاني شي مثل الملك وعنده جناحات جبيره كلش ووكف جدامي وسلم عليه بصوت يهطر الكلب هطر وصاحلي باسمي ..... خفت شويه بس كلت مادام حلم على شنو اخاف لذلك سألته ..
_ انته جبرائيل!!!؟؟؟
_ جبرائيل؟؟ شنو انته غشيم ؟؟ عمي جبرائيل بعد الأسلام طلع تقاعد لأن بعد ماكو نبي بعد الرسول(ص)..
_ ها .. ها.. آسف بس انته منو ؟؟ لاتكلي انته عزرائيل لأن انته ماتسولف كبل تنفذ.. مو ؟؟
_ لامو عزرائيل وثم انته شنو يابه حتى يجيك عزرائيل مباشره....
_ جا منو انته
_ انا ملك الفقراء والمعوزين اجيهم بالحلم اونسهم شويه وانفذ طلبات تصير بس بالحلم وانا بطريقي شفتك كلت خلي اشوف هذا شعنده ماعنده وبالأخص انته من ضمن ملايين مامن حقهم يحلمون لأن عراقيين
_ خوش دكه جا اريد افتر شويه على الولايه تكدر تاخذني اشوفها من السما؟؟
_ تدلل هاي بسيطه وانته على ظهري شتريد تشوف اني حاضر..
ركبت على ظهره وخذاني بسفره من العمر افتريت على الولايه وشفت بيت المحافظ وامين سر الفرع ومديرية الأمن والمخابرات ومضايف شيوخ العشاير والشوارع وكلشي وكلاشي واني من كد ماشربت بيبسي كبس بيت انتفخت مثانتي كلش واجت ابالي فكره وكلت للملك بيها مجال اطلب منك طلب؟؟؟ كال أأمر واني حاضر ... كلتله اريد افرغ مثانتي على شكم مكان بالولايه حتى ارتاح شويه....كالي وين تريد تبدي كلتله ابيت المحافظ اولا احسن واخلص فوك مضيف واحد( خوش زلمه)....المهم بلشت واني متونس ومرتاح وحسيت جاي اخذ بثاري من هذوله وحتى بيت مدير الكهرباء انطيته حصه من وجبة المثانه وبعد شويه اسمع صوت مثل الرعد وصياح باسمي ...... فزيت من النوم واني غارك بالماي لأن تانكي جيراني طك ماتحمل ماطور الماي يعبيه لمدة ست ساعات متواصله واهل البيت جايين يتعاركون وياي لأن انا صلحت التانكي وطك وفات الماي كله من الشباج على فراشي.... هاي سالفه وبعدين اكو هوايه من سوالف فكَر
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــ
عمار العطاوه