من اجل العراق كتبها حيدر الشميساوي (( وي نخلة البصرة ))
الشاعر حيدر الشميساوي من اهالي الناصرية كتب قصيدة للوطن ارتأيت ان انشرها في واحة الحوار العام كونها تتحدث عن حب العراق وهذا النوع يسمى بالزنجيل الزهيري وقد جمع الشاعر محافظات العراق الثمانية عشر في قصيدة رائعة نتمنى ان تعجبكم
من غير نظره حسد هذا الوطن بصره
بيه راح تلكه حرز خير وبعد بصره
ممليه شوق وفرح واسمه الحلو بصره
لأبنه الفداله العمر وبصورته ذي قار
ذك اليشل كل جرح ويصب عسل ذي قار
ياوطن صبّح لكه عنده بشكل ذي قار
كاع الشعر والادب وبكل محل ميسان
وجيلات اهلهها شكثر ظهر الظلم ميسان
معروفه ام الصبر بنت الوطن ميسان
ذيج الاهلهها وهلي عاشوا عمر ساوه
وغلطان ارضها بارض كلمن اجه ساوه
لو مر علينه العطش تروي العطش ساوه
وشعلان ابنها الفحل نيران اله ديوان
ابيت الاجانب كبل والسفر بيه ديوان
القادسية اسم بس السجل ديوان
يجمع اهل ديرته والحي يطالس حي
وما يوم كف كهوته ليل اليمر بيه حي
يا محلى واسط بعد وشعز قضاء الحي
حين اعله درب نمر باطرافه لمن نجف
وننطي الدمع للوطن حد ما دمعنه نجف
دورنه كل الارض ما شفنه مثل النجف
والغاد منها بعد كاع الذي كربلا
عاشور بأسمه شهد وشكد حمل كربلا
يا كاع مثلج حزن شافت يارض كربلا
ملعون سيف الكفر جي حارب العاصمة
والعاصي امام العصر لابد وان عاصمة
بغداد رمز الوطن هيه التظل عاصمة
اسم الوطن بالعرش محد وصل حلّه
وبان الحبل يالتضد ما ننهطر حلّه
تاريخ بيهه انولد ما تنمحي الحلّه
سرها بدليلي انكتم ما ينفضح انبار
وعل الحصل بيها امس من فاجعة انبار
مفجوعة بابل تظل تنزف على الانبار
بس تدري سيف الظلم هم ينثلم موصل
والسيف هذا الوطن سيف الغدر موصل
يا محلى بيها العشك ام الورد موصل
بكل وصله بيها عسل بيها الطعم تاميم
ما ينفصل حب هالوطن لا حاشا تاميم
ينسر دليله بفرح كل اليطب تاميم
كل قلب منها يود ويخاطبك ودهوك
وينطيك شدة ورد لاهل العشك ودهوك
هذا الوطن بي شجر ويذب ثمر ودهوك
شجرتها تنكط عسل والمصطفى والدين
وكصبات اهلنه شكثر كتبت كتب والدين
لأم العتابة وقرت بيهن صلاح ال دين
شما اصد انا لموطني من كل كتر اربيل
طيب وسعادة وفخر وابقى العمر اربيل
وبكيفي كلما احب امشي وازور اربيل
الكاها بيت الفرح يهتفلي ديالى
واشافي القلب لو بيه صفى ديالى
نوراني خد الوطن من شجرة ديالى
فارس صبح موطني محد كدر جبله
ومادام حيدر علي بكاعة يضل جبلة
ويا الهور واكف سوه هذا الوطن جبله
والجبل هم متصل وي نخلة البصرة
