شجاني ( من شعر أهلنا الطيبين )
شجاني
------------------
شجاني ومن جديد النوب حبيت
جنت عاقل واكيد وياك جنيت
==
تبت توبة نصوحة من العشك دوم
وعلى فيض المشاعر حرس خليت
==
قفلت كلبي قفل مرعوب وبليل
عجيبة شلون كلي لكلبي طبيت
==
للعشرين جنت رجعت وياك
وجن كبلك ولا فد يوم حبيت
==
على رموشك كحل من حزن ودموع
وعلى وركة خريفي افراح نديت
==
يا عين التشيلك يا شمس آب
اشيلك حجر لو الك صديت
==
فداك الراح كلة وانذر الجاي
وعمت عينه اليكلك فد يوم ضحيت
==
تمنيتك الي بأول اللجمات
وشكد حلمت بيك وتمنيت
==
لو تدري فرحتي لجيتك هاي
ولو تدري شجبت وياك من جيت
==
جبت بسمة لشفافي العطشن سنين
والف جرح بجرح بالروح راويت
==
كلي ذنوب ادري، وروحك ايمام
نزعت الماضي كلة وابيض كلب طبيت
==
ومن نور البروحك شاهت العين
كبل ماطوف بعيونك تحفيت
==
اعشك لحظة لحظة واشكي الفراك
انت وياي كلي واني سليت
==
ريتك تبقى كتلك ريتك وياي
وكلشي البية اسمعه يكول يا ريت
------------------------------------
المساجلات في الشعر الدارمي
المساجلات في الشعر الدارمي
------------------------------------------
يقول الشاعر عبد الحسين الدراجي – العمارة
-------------------------------------------
صحباني وكت الضيج ماواحد انشاف
وكت النفاه اهواي تنعد بالالاف
---------------------------------------------
يقول الشاعر السيد سعدون السيد حميد المكصوصي – العمارة
-------------------------------------------
متحزم احزامين فن واحد يفوت
السلف كله اوياي واليوصل يموت
--------------------------------------------
يقول الشاعر جبار المكصوصي
--------------------------------------------
اتحزم احزامين للحك والنصاف
وليمشي بالطيبات صدكني ميخاف
-------------------------------------------
يقول الشاعر علي كاظم درجال الربيعي
-------------------------------------------
ثنيت انه وثاويت اشحده ليفوت
معفي اليمر بالدار رديته تابوت
--------------------------------------------
يقول الشاعر حسن راضي موسى الوحيلي
--------------------------------------------
للموت اشد احزام كون اسمع الصوت
انه وهلي نهد ليك لو يكرب الموت
-------------------------------------------
ميسان في 19 / 9 / 2011
من تراث ميسان في شعر الأبوذية
من شعر الابوذية
--------------------
من شعرالشاعر هشام نجم الربيعي
وفراح
العمر مرهون هم وحزن – وفراح
وظن مايوم اعوف الحزن – وفراح
اشوفن جنت بس الروح – وفراح
عمت هسه وشمتت اعداي بيه
*************
ومن شعرالشاعر ملا جادر ملا حطاب
وشراك
انطر قلبي ابكثر النوح – وشراك
تخيل لي جبينه البدر – وشراك
خفت ارشف شفة المحبوب – وشراك
حرت شصنع ونه روحي شهية
*************
ومن شعر الشاعر علي حسين رديف
عيسه
حادي البل شله بالنوك – عيسه
ولا مره اجاه النور – عيسه
شفت سمراء اجمل قوم – عيسه
انشده عقلي وغرامي عم عليه
*************
ومن شعر الشاعر علي كاظم درجال الربيعي
بيديراوي
انا الحاوي رطبكم – بيديراوي
وانا المحد رواني – بيديرواني
سألني الأصل كتله – ابيدراوي
المنزل كصب والعيشه هنيه
***************************
من الشعر الشعبي / الابوذية
من الشعر الشعبي / الابوذية
------------------------------
ونهده
امعرت لارضه يهدني ** ونه هده
سويعه لارضه نكعد ** ونهده
ابوسن بيه من شفته ** ونهده
وصلت للصدق عاندت هيه
****************
شدهن
حرت مدري شضمد ششد – شدهن
كثيرات وعليه صعب – شدهن
شدهني الوكت يبن الناس – شدههين
شده باول شبابي وشيب اليه
***************
ولاحوك
بعد مااغزل الغيري – ولاحوك
لأن لاالردي يستاهل – ولاحوك
غشمه وصوبوك انته- ولاحوك
غضنفر بالحجي صاير عليه
***********************
لاتنعين / ابو عمار الربيعي
لاتنعين
----------
لاتنعين صوت الليل مسموع
**
ولاتبجين كل انسان مصروع
**
وماتدرين هذا المات مامات
**
اذا عنده عرك بالارض مزروع
**
خوفج عل اليموت ابتر ومكطوع
**
يفز مرعوب من كابوس الاوهام
**
وعيونه اتدامه هموم ودموع
**
حتى الماي حنظل طعمه بالريك
**
او حسراته اتكسر بين الضلوع
------------------------------------
مع تحيات ابو عمار الربيعي