قصيدة كرهتك من شعر زينه / بواسطة ع ، ك ، د
كرهتك كثر ماودعت الشموع
شمعه بعيني تحله وتطفه شمعه
جنت كبر الجرح شايل معاناة
وصدك جان الكلب من ينعه ينعه
جن داخل حسن لو طلعت الاخ
وتطلع روحي الك وتردهه فدعه
حسبّتك رقم من لمعة البيك
وين ادري الصفر هم ينطي لمعه؟؟
وين ادري الغصن بيه يركض الموت
وعلى عش المحنه يودي الافعه
باجر راح اجفن كل الجروح
ونعش الذكريات براسي اشيعه
وباجر راح اهدّم بيت الدموع
وابني من الفرح بعيوني قلعه
وتذبل شفتك وترد الي زحوف
وانه بجفي النهر وبكيفي اكطعه
وأكلك كلشي مات اللهفه والشوك
محال اليندفن تكدرترجعه
وسود تصير كلهه ايامك البيض
وينذل خاطرك ويعض اصبعه
مثل ماجرعتني بكاسك الموت
كاس الذل شرط باجرتجرعه
قصيدة حبك مات من شعر زينه / بواسطة ع ، ك ،د
حبك مات عدنه احنه ودفناه
و ثوب اسود لبسنه احنه و حزانه
نحزن مو عليك انت حرامات
ما نحزن على الباعو هوانه
نحزن على مضه من ايامنه الحلوات
وخلينه الفرح يركض ورانه
عفنه هوايه لأجلك (وانت ماحسيت)
و لأجل عينك تحملنه المهانه
وتالي بكل صلافه تخون الاحساس
وتطعنّه ب برود و من ورانه
جنت طير وترفرف فوك غيم الشوك
اطلع بره متريدك سمانه
شلت كتاب حبك من رفوف العين
يل كتابك طلع اسمه خيانه
واذا روحي تحن راح اكتل الروح
وبيدي وداعتك انه اكتل انه
وبيدي وداعتك انه اكتل انه
من شعر ألأبوذيه للشاعر علي كاظم درجال ( ابو عمار ألربيعي )
لاحن
ملوم الكلب عالطيبين ** لاحن
غنج ومهندج ومهيوب ** لاحن
بصدر المجر والنخلات ** لاحن
تذكرت الجره والصار بيه
ماجراني
انه ألجريت حبلك ** ماجراني
وانه من جور دهري ** ماجراني
سألني ألأصل كتله ** مجراني
عرف مجراوي انه وخان بيه
بيدراوي
أنه الحاوي رطبكم ** بيدراوي
وانه ألمحد حجالي ** بيدراوي
ٍسألني ألأصل كتله ** أبيدراوي
ألمنزل كصب والعيشه هنيه
******
مع تحيات الشاعر علي كاظم درجال ( ابو عمار ألربيعي )
من شعر الابوذيه في المجر الكبير
ملحها
عكبك دنيتي فكدت ** ملحها
وبعدك صرت ياصاحب ** ملحها
أمدن علعنب ايدي * * ملحها
كلت حامض يخي غصبن عليه
*******
من شعر السيد قاسم كريدي المالكي
من شعر الابوذيه في المجر الكبير
من حلاته
راس القند خده ** من حلاته
وعسل صافي أعلى شفته ** من حلاته
ألحسن خجلان دنك ** من حلاته
ذكت خده وعلك السكر عليه
**
للشاعر قاسم كريدي المالكي
شعر من الابوذيه في المجر الكبير
والابياض
بعد ماوجد الاسود ** والابياض
امن اديه وطار اللحيمي ** والابياض
حدي وياك للوحه ** والابياض
وبيدك من توسدني المنيه
ولكهاف
حلاتك ذيب من تمشي ** ولكهاف
ولك نار الغضا بكلبي ** ولكهاف
وحك الحمد والكوثر ** ولكهاف
أكوم عظام من تمر عليه
يافل
حبيبي شبيك وشغيرك ** يافل
جنت أوياي سمن بعسل ** يافل
بعد مافاد ضرب الرمل ** يافال
سوده مصخمه صارت عليه
******
للشاعر قاسم كريدي المالكي
قصيدة ( أنا وليل ألمجر ) أبو عمار ألربيعي
أنا وليل ألمجر والون والهموم
أنتشارك والدمع بعيوني شاهد
*****
أنا ألضيعت عمري ويالمجانين
انام أعلى ألحصيره وكلبي جامد
*****
ردت أشعل ألنار بكلب ألحباب
أحترقت أنا وقلب محبوبي بارد
*****
تهنه ونام باأطيب عرك طيب
لأن كل ألجروح أصواب واحد
*****
ياهرش ألكطعته أبساعة ألغيض
تضل تنزف غضب وبغم أجاهد
*****
ياريت أمن أموتن أنت دفان
نتباره ألذمم يبن ألأماجد
*****
أوصيك أووصيتي أبرقبتك دين
اذا زعلان خلني أبضيمي خامد
*****
لأن غيضك ثكيل أوحمل هميان
وأظن مايك خبطته وجان راكد
*****
أنه ألمديون ألك لمجرجع الخام
أضل ألياوكت يفلان لابد
*****
وسدني ألمنيه وكلي مبخوت
وهيل أتراب همك وأنت صامد
*****
أهناك أمن أنتلاكه بيوم ألحساب
أنجيل أذنوبنا بميزان واحد
*****
من شعر أبو عمار ألربيعي
أبوذيات من شعر محمد جبر ألخفاجي / ميسان
منتخالي
نخيت اوليد أخيتي ** منتخالي
وحلفلي ابروح خالي ** منتخالي
كلب سمجه يكلبي ** منتخالي
تظن كل ابن اخت يطلع عليه
شفته
يحط حمره اعلى شفته مره ** شفته
كلت مسكين صارت مره ** شفته
طلع غلطان ظني من ر ** شفته
طلعت لاشكر لاعسل هيه
قصيدة ( مسني ألض ألاهي ) علي كاظم درجال
قصيدة ( مسني ألضر ) / للشاعر علي كاظم درجال
********************************
مسني الضر الاهي وكلت سبحانك
انا الظالم وانا المحتاج غفرانك
**
أنا الزامطت كل أعداي ياربي
كلتلهم أطيبن من علو شانك
**
يلكلك سماحه ومحب للتواب
للطيب نفس مفتوحه بببانك
**
يربي اشكد مظالم شايل ألأنسان
تصغر من تصير بحضن ميزانك
**
انا ابشدة الداي ولحظه ماانساك
أشلون ارضه بنفس تتمنى هجرانك
**
لأن انت الجميل وكل جمالك نور
والنور اعلى نور اسمك وعنوانك
**
غشيم ألي يعبدك طمع بالجنات
ومغرور اليعبدك خوف نيرانك
**
لأن انت اهل وألأهل كل الكون
حكمه ومقدره ومهيوب سلطانك
**
أحبك ياألاهي واليحب معذور
من يسكن الجول يهيم بلوانك
**
أنا كلي خلايا وكل خليه تكول
ياحي ياعظيم أشكبر ديوانك
*****************
من شعر ألأبوذيه ( مساجله مع الاخ حارث الحاج عبد الامير السدخان )
باقات من الشعر الشعبي / للشاعر علي كاظم درجال
=======================
ولمساك
هلا ياريحة العنبر = ولمساك
عونه اليكعد أكبالك = ولمساك
رجيتك واطلبت منك = ولمساك
يبوا الطيبات تقبل هالهديه
***
ولمساك
وحك من صام شهر ألله = ولمساك
ألعنبر ريحة أجدادك = ولمساك
احب كل يوم امد ايدي = ولمساك
انتبارك بيك مقبوله ألهديه
***
عنبراني
انا مو شتل سمسم = عنبراني
يفوح العطر مني = عنبراني
محط السفن كلبي = عنبراني
وانا الطيب الذات أخذ تحيه
=================
مهداة الى السيد حارث عبد الامير السدخان / المجر الكبير في 25 /12 / 2010 م
ابيات من ألأبوذيه / أعداد أبو عمار الربيعي
أبيات من ألابوذيه / أعداد أبو عمار ألربيعي
========================
1 ياليت
على صدري جدايل سود = ياليت
وأمي لم تلد ذكراك = ياليت
يكون أنا وحبيبي نموت = ياليت
يريت اتصير دفنتنا سويه
****
2 بدوه
حسافه أللبن جان ثخين = بدوه
وعليه ألأجنبي ياحيف = بدوه
أشماسوي فضل للناس = بدوه
عكب طيبي يجازوني برديه
================
ابو ذيه والمربع العماري (( هيله وحمد ))
يهيله
الواشي يلومني بحبكم = يهيله
وانه جفني الدمع مزنه = يهيله
لون كل الخلك لامت = يهيله
يحن كلبي ويزيد الشوك بيه
===
(( راح الوكت ياهيله ))
================
راح الوكت ومشينه
الذاك النزل حنينه
راح الهوى وردينه
للماجديه الليله
==
راح الوكت يانبعه
والكلب ذاجر ربعه
لاجت بعيني الدمعه
نشفيها الي بالشيله
==
راح الوكت ياورده
وذبل جفانه الشهده
كلمن دمعته بخده
والشوك هدهد حيله
==
راح الوكت ياترفه
وجروح كلبي كلفه
الواشي جفنه يغفه
بس جفني دايم سيله
==========
قصيدة ( امرن بالمنازل .... )
قصيدة ( امرن بالمنازل .......) للشاعر عجرم ابو السوف / غناها المطرب سلمان المنكوب في السجن
---------------------------------------------------------
أمرّن بالمنازل منـــازلـهم خــليّة
أگلها وين أهلنا تگول اگطعوا بيّه
==
راحوا بعد منّي و آنا انگطع ظنّي
زاد و كثر ونّي من شـحّوا عــليّه
==
يوم اللي جفوني بس ظلّيت أنادي
ما سمعوا عتابي من طوّح الحادي
==
حـگّـچ لـو حــــــزنتي
علي أهلچ و انهضمتي
تري لگلبي جــــــرحتي
يا دار أهل الحـــــــــميّة
==
گلبك لـــو جـــرحته مو حـگّـــي يا سالم
ما تدري بل الحادي يا خويه إشلون ظالم
==
زيـن أعـلـم و اعـرفه
و أدري الفركه كلفة
يـــــمته الجرح يشفه
ويــــلي شـــــهال البليه
==
بليّة و طشّشتنا مرّة و لوّعتنا
لـعبت بالمنــازل منها فارگـتنا
==
عد من أشـچـي حـالي
و أحچي اللي جري لي
وحــشــة مـن الــغـوالي
ظلّـــــــت هـــالـــــــدنيّة
==
خلــيّتهم نداها لعد روحي شجاها
ظل موحش فلاها راح اللي رعاها
==
راح و راح ابــــــــنـها
عــزيـز و كثر ونـــــها
وسفة انگطع ظنها
ســــــويــاها سويّة
==
أمرّن بالـمــنازل منـــازلــهـم خليّة
أگلها وين أهلنا صفوا حدر الوطيّة
----------------------------------------
من الشعر الشعبي (( رحلة مع الزهيري ))
رحلة مع الزهيري
---------------------------------
دهـري إمحـورِب عَلــَي مايوم كًًلبي يسر
خلـٌـصت عمري إبضنـَك ما شفت ساعة يسـر
ويمناي مِنشــل عكًًب ما كان طالج يســـر
وآنه أرتجي للفرح لكن فرح مايـــــه
وسيِلي بلغ للزبى وزاد وصعد مايــــه
ناديــت وين إخوتي وإخوان إلي مايــه
لكن حســافه وأسف بالزيــنه مَـحـٌد يسـر
************
فايض دمع نـاظري ومامش صحيـب إتـراب
أشما حاولت بالفرح إترد للحزِن وتــراب
لو تجلي بيـهن جَـلي وجـوه النحس وتراب
إترد إل طبعهــا صدا وشما جليــته إنحاس
ياحيـف نكًًضي العمر مابين ناس أنحاس
مدري شـجاه الوكت صدكًًــه إعله كذبه إنحاس
وتاليــها تصفه ترى خامـه وزبيـــل تراب
**************
راح الصبا والخلان والوكت الذي فاتــلي
كًًوٌضوا والبين بجفاهم صبر فاتــلي
جانولي خلان حبل امواصلي فاتـــلي
تميت من بعدهم اصفك الراح براح
ولاتظن من بعدهم عشت بهنا وبراح
جانو لي خلان يفدوني ولو بالراح
سهمهم يوم الهجر بالكَلب لن فاتــــلي
***************
ياصاح ضيم الوكت من لاحكم لاحنه
بس ظل ظهرنه عدل لاقوٌس ولا حنــه
لو نبته وحده تظل مزهر يظل لاحنـه
دنياك ياصاحبي لعبة ورق والزار
ماتلحم فتوكها لا با لخياطه والزار
شدينه كل الحزم وموزرين اوزار
كل هذا وإلكم كًًلب لا رفرف ولاحنـــه
****************
ماكًًول صبر ايوب صبر الصبرته وصـــل
من ضيمي اظن معدتي ياخوي صارت وصل
ادري صنم بس جبر لازم اعبده وصــل
حـٌيرني شِيـل الوكًـه وبدربي هم عبـره
والكاره صارت درس لليفتهم عـبـره
الغنه وتعب الغنـه إيكًًولون هم عبـره
اليوم حتى البجي مايصح ليــه الوصـل
******************
ياشبل حيدر يبن اول الصايم وصـل
جيف إبٌدر سيف إله .. سَـل إبيمينه وصل
داسَت إخيول الحقد جسمـَك دِعتـه وِصَلْ
للدين انته الذي بالروح لــجله بـِـذَلْ
صدر المجد منزلك والغير راضي بـِذِل
ماسالمت منحني ومديت جفك بــذل
ضل عالي فوك الرمح ليزيد راسك وصـل
******************
ياصاح روحي لكم رغم الجفه مايلــــه
رمشين عيني الك يالتنتظر مايلـَــــــه
سنين حتى انتظر خافن اعد مايلـَــــــه
الزعل عدكم طبع ليمت معاكـــم نصح
ماظن يرده الوحي وبصوت عالـي نصح
ياروحي بَسٌــج بعد واسديت ليج النصح
لوعاب منج طرف غير البتر مائلـــــه
******************
سفان اخذني الهوه بشط العشك ياهلـي
وإلكم نظمت الشعر حسجه وبعد ياهلــي
تاج إلي صاغه الدهر وبدنيتي ياهو إلـي
يَـمكُم يجن القلب ينسى التعب ويراح
لم الشمل ياربع نشوه وقدح ويراح
نابض ابين الضلع رافك حزن ويراح
لو يوم داره خلت يصرخ هلي ياهـلي
*****************
طال الهجر والصبر ثوبه ركًـد ونشـَــطْ
طـَريـح وَجْدَك ولا أكًوَه إعله الجفا وَنـْشَط
طامح بحبك عذولي ان زَعـَـل وِنْ شـَــطْ
طامع (العلعل) بثغرك انتظم لكًًـطه
طوبى لمن طارليه شبه العجد والكًطـه
طالب لكم يوعلي عالي المتن ولكًطــه
طاوي الكفر ان تدانى حيكم وِنْ شـَـــــطْ
*********************
فاركًـتكُم والمدامع لا تشف او تجـف
فــاضت وعيس التباعد لاتشف او تجـف
فدت وحادي النوى حادي خفيف إو تجـف
في الصوت لعلع ولا بالسوط عنها عفه
فت الحشا منه بالمسرى وجسمه عفه
فوهت ريجي ايا ناديه صاحب عفـه
فاين دخيل الوفــه تحرن عليه او تجـف
********************
غروب طرفي سفح والبـصر مني زاغ
غدوه وانعب كما ينعب غـراب وزاغ
غرك عذول صبغ قلبك كـصبغ الزاغ
غادي الجده منه راس احشاي عامد وزغ
غير الكدر لويزمه حيث زمجر وزغ
غادي الجده شبه ثعلب لو يلاوذ وزغ
غدار لاتستمع لاجن إبحجيـه زاغ
*********************************
الى سيدي ومولاي الامام الحسين ( ع )
الى سيدي ومولاي الامام الحسين ( ع )
=======================
امد جسمي ويبابك وازحف ازحوف
**
وجيك بعطش ضامي وكلب ملهوف
**
واخلي دموعي حرثه لليجي يطوف
**
واشد معصب الراس بشال من صوف
**
ياحيد النشامى الماعرف خوف
**
يدم الخط عجايب يوم الطفوف
**
فرق مابين ايد اتريد معروف
**
وايد اشابك الجرذان الجلوف
**
سلاما عالجسد من داسته الخيل
**
وغمك يازمان اتكطع الجفوف
**
سلاما ياارض حضنيتي الحسين
**
حضن ام الطفلها بشوك مشغوف
**
سلاما يامضاجع صارت اعلام
**
وعلى الدنيا العفا واشله المشحوف
_______________________
مع تحيات ابو عمار الربيعي
المساجلات في الشعر الدارمي
المساجلات في الشعر الدارمي
------------------------------------------
يقول الشاعر عبد الحسين الدراجي – العمارة
-------------------------------------------
صحباني وكت الضيج ماواحد انشاف
وكت النفاه اهواي تنعد بالالاف
---------------------------------------------
يقول الشاعر السيد سعدون السيد حميد المكصوصي – العمارة
-------------------------------------------
متحزم احزامين فن واحد يفوت
السلف كله اوياي واليوصل يموت
--------------------------------------------
يقول الشاعر جبار المكصوصي
--------------------------------------------
اتحزم احزامين للحك والنصاف
وليمشي بالطيبات صدكني ميخاف
-------------------------------------------
يقول الشاعر علي كاظم درجال الربيعي
-------------------------------------------
ثنيت انه وثاويت اشحده ليفوت
معفي اليمر بالدار رديته تابوت
--------------------------------------------
يقول الشاعر حسن راضي موسى الوحيلي
--------------------------------------------
للموت اشد احزام كون اسمع الصوت
انه وهلي نهد ليك لو يكرب الموت
-------------------------------------------
قصيدة ( عتاب مع الدنيا ) السيد سعدون المكصوصي / عمارة
قصيدة ( عتاب مع الدنيا ) للشاعر السيد سعدون السيد حميد المكصوصي
--------------------------------------------------------------------
شلون دنيا لو جفت غفلاوي
صدك هاي امحيله وجذابه
**
شفت انه بعيني حتى الواوي
نفخ نفسه وطرد ملك الغابه
**
الدنيا ناعور بعيانه من تدور
تخبط الماي الزلال بطينه
**
البومه متحلفه تطيح ابن الصكور
ماتكدرينه ولاتطيحينه
**
روح مني كلبي من شافك يفور
راس حاجه كليبي امخلينه
**
ليش كامت تمشي اعزيزاوي
حتى اخيي شافني وسد بابه
**
ياغني النفس كل شي يساوي
جيف ماينسه جميع احبابه
**
خفت منها تريد تطويني طوي
اوصمدت اوحيد اني اكبالها
**
السيف لو دنج السيف اويلتوي
المهره من يمها تذب خيالها
**
ها يلكرابه تدري كل ساعه انجوي
شفت بس نسوان ماكوا رجالها
**
طبكت الدلال والحيساوي
وراضت الظلام والسلابه
**
ردت ابن عمي الجروح يداوي
واره وجهه وهش عليه اجلابه
**
الهم ثجيل وهمي زاد اعلى الثجيل
سنين دهري الويها ماتلويني
**
خابت امك يالعشت عمرك ذليل
انه ماسامع شفتهه ابعيني
**
الاصيل امن الصغر هو الاصيل
بالجفون يضمني ويغطيني
**
تمر قلعة صالح وخستاوي
شفته بالعلوه الجبيره اشجابه
**
لاترد وتروح قال الراوي
وباجر اويانه تصير اطلابه
**
زلفه سيف وكمت ما حب السيوف
شلون واحد يفرح ابجتاله
**
المايصدك خل يجي بعينه ويشوف
ساعه وحده وشيصير بحاله
**
لجل عينك خادم اتلكه الضيوف
بمضيف اهلك وحضر ادلاله
**
ونته ماعندك وفا اومتغاوي
هاي كلها امن العشك وسبابه
**
كمت ادور اعليك بالبدراوي
ماخفت كلشي حسبت احسابه
==============
ومن شعره الدارمي :::
-----------------------
وجهي انكلب ياخوي بالفركه نيلي
ماادري شنهي الصار كل للوحيلي
ومن شعر الابوذية :::
-----------------------
وشلها
ردت نكعد بعد شلي *** وشلها
شفت نمام نص حيهم *** وشلها
روحي بيدي اطلعها *** وشلها
لأن اسباب كل ما صار بيه
------------------------------------
شكرا للشاعر السيد سعدون المكصوصي ( ابو علياء الورد ) العمارة // ابو عمار الربيعي
------------------------------------
منقول من منتديات العراق - منتدى الشعر والادب
