باقات من الشعر الشعبي في قلعة صالح / من أعداد الشاعر علي كاظم الدرجال الربيعي

بوذيات حب
صحبتك ليش كصرت ماطلتها
وانا الدنيا على مودك ماطلتها
جنت لك فرصه سهله ماطلتها
خسرتني بسس بطرانك عليه

قرص نعناع خدك وانت هيلة
الحسن بس لجنابك وانت هيلة
تراب اللحد بيدك انت هيلة
ويضل اسمك حلو وغالي علية

اسكي ضماي من شفاك وردة
يلخدك جميل تكول وردة
ردية احوالي بين الناس واردة
اذا بالبوسة هم تبخل علية

موحب بكلبي هذا ورم شاك
واذوب بشوفة عيونك ورمشاك
اظل للموت امشي ورة مشاك
لان روحي التحبك مو بدية
______________

*الطير الطار من ايدي والاخر
وبيتي بجينكو مسكف ولاخر
و واحد لحيته طويله والاخر
يكله يامثكل لحيتك عليه
***



انا اخسرت كلشي و عشرتك مالي منها
و جروح ايام وصلك مالم منــــــــــــــــــــها
و انا روحي بغيابك مال منـــــــــــــــــــــها
و احس بيها ثكل صارت علــــــــــــــــــــيه
****



انا عذول من البواجي جار مني
و عليك الدمع صدك جاري مني
انا تمنيتك تصبح جار منــــــــــي
و اظل امكابلك صبح و مسيــــه
***



*بس انت القلب حبك ولك راد
شما سافرت وابعدت ارجع ولك راد
علتي ماعرف بيها عرب ولكراد
اون عليك كل صبح وكل مسيه
***




*سواجي الدمع فوك الوجن ونهار
وناري اعليك تسعر ليل ونهــــــار
نص ساعه انتلف بجفاك ونهــــار
اشتظن لو طول افراكك عليه
***


أنت الشمس و أنت البدر منهل *
و شفافك طعم العسل منهــل
كـَلبي بس ألك يا ترف منــــهل
الورد من تمر ياخذلك تحيــــــــة
***



يمسافر متى الجية
افكر بيك ليليه
الك تذكار ما ينمحي
ولك شمعات ما تنطفي
اشوفن رسمك اكبالي واحس انك فلا مسافر
واطير من الفرح عالي
وارد مكسور انا الخاطر
يمسافر متى الجيه
***



*احبابي شلون حالتكم بعدنا
شبيدينا والوكت عنكم بعدنا
اذا انتم نسيتونا بعدنــــا
بذكركم كل صباح وكل مسيه
****



دخنت من التتن دنهل وسومر
وكلبي من هواك سنجر وسومر
احبكم من عهد بابل وسومر
ولك حتى حمورابي انكسر قلبه عليه
***




قلبي عليك مثل الذهب واصفه
جمالك يصعب على الكون وصفه
عليل انى وطبيبي وصف الي وصفه
خدودك والشفايف صيدليه
***




سجاجين الوكت بالروح .. بردن
واحس الجسم وكت الصيف .. بردان
أنا ابردنين رحت وأرد .. بردان
واخاف الغربة تاخذ حتى ادية
****




كَـلبي الجان الك مسكن و لكـــــــدار
أبجفاك الحزن شل حاله و لكدار
الوكت دولاب مل مني و لكدار
و انت و الوكت صرتوا عليه
****



يلي كلبك مثل الصخر ولا حن *
سهام كلبك وصلن لكلبي ولاحن
بحبك صرت شاعر ولاحن
يمته نتلاكه انه وياك سويه
****




انا بلياك حتى الماي مرمر
كـَلب شفاف كـَلبي وانته مرمر
عجب يرضيك يا خلي اتمرمر
هلي والناس والدنيه عليه
****



مرة اصفن علـيكم مرة سايل
مرة الدمع ناشــف مرة سايل
مرة احتار شكتب من رسايل
مرة انتظر ســــاعات المنيــة
****




احبك ما أحب عل الأرض ســــواك
سبحان الذي من طــــــــين سواك
بشر لكنه ويال القــــــــمر ســـواك
واحد فوق واحد بــــــــــين ايــــديه
***




حبيبي اديارنا لـــــــوجيتوا مرهــا
أونفسك عالوفـــــا والطيب مرها
أنا عشرتك ضقت حلوتها ومرهـا
بويا طلع مــــرها أمر امن المنيـه
****




أبات الليل بالحـــسرات منطــــر
تضل عيني على البيـبان منطــر
شفت خذها عبالي الفجر منطر
قمت صليت من غــصبن عليـــه
****




تبنا من العشـــــــق واردود عدنــه
وحسبنا اسنين مره وتــــــاه عدنه
أهوايه بالسلف حلـــــــوات عدنـــه
لون روحك صدق خضره وطريـــــــه
****




احباب الي نحبهم مارادونا
جفونا وبجفاهم مردونا
ولك صرت طوبه ويلعب بيها مارادونا
مدكولي بعد ياكولجي يلحك عليه
****


وحكـَ العين ثم اللام واليا
دوم اسال عليك الراح واليا
ترا والله ان لزمت عليك وليه
لسوي مثل ما سويت بيه
****




حروف اسمك على الذرعان دكيت
أو ابد موخوش دكه وياي دكيت
أساس وياك طين أبطين دكيت
نَثَّت والبنيته أنهدم بيه
****





أحس هزني عليك الشوكـَ يا صاح
و ما أدري زعلنة غلط يا صــــــــــــاح
صوتك بالشدايد علي يا صـــــــــــاح
أجيك محزم بروحي الأبيــــــــــــــــه
****



تشوف همومي بعيونك و ترها
وتغيب و تقطع بروحي وترها
يرهيك الوقت يسمر وترها
وتصير إنت أبو الراهي عليه

[center]بهيده على بختك يا كمر .. مساهر واريد اشكيلك

انه غريب ابدنيتي .. مضيّع وادور ابليلك

عن ربعة اهلي ، ودلّة الديوان ، ومواويلك

عن ضحكة البربين لعيون الدلو

عن رقصة الصفصاف والماي الحلو

عن صحبتي، وخلاني , وعيون النهر

بهيده على بختك يا كمر

******
ياجمشه ياأم الوفا شالوا اهلنا الطيبين ** ياوسفه ضل بس العطر من مسك اهلنا الحلوين
/center]

في السادس من كانون 1921ميلادي تم تأسيس اول كتيبه للجيش العراقي تحت أسم ( موسى الكاظم ) وكان من بين الذين تم سوقهم ألى ألخدمه العسكريه ألمرحوم ألسيد كاظم ألدرجال / أحد مختاري قلعة صالح وقد تم نقلهم بمركب كان راسيا على شاطىء دجله وعندما صعد السيد كاظم الدرجال الى المركب وكان شابا يافعا نظرت اليه امه المرحومه ( حسن ) وبكت وصاحت بطور النعي المعروف بشدة وقعه على النفس لومضة الحزن العميقه فيه وقد أبكت جميع ألواقفين على الشاطىء ( لن أنسى ذلك الموقف ماحييت ) :::
ملوا ألمركب ملوه
وعزيز كلبي صعدوه
وللجيش من عدي خذوه
يلولد يبني ألمن عفتني
للقهر يايمه أركنتني
كاظم ولك يمه
كاظم الحداره كطعت للعماره
وأمك المحتاره بالضيم يايمه
المصدر / مقابله مع المرحوم سليم خورشيد ألبياتي عن تاريخ قلعة صالح ( موجز تاريخ العماره )

فدوة تـــروحـلك هلناس
واولـهـــــــم اروح انــة
الجمال البـيـك شمسـوي
بحــــسـرة كلـب خلانـة
ربـك مــن عـسل سـواك
واحنـــة بطـين ســوانـة
عيون الناس كلها عليك
وانة عيــونـــي خجلانـة
جـــمـالك دوخ الحاسـود
سبحانة الخلق سبحانـة



****

اتمنـــــة بتهـم محبـوس
مــــــــؤبــد بلسجن انـة
وانــــت القاضـي اتمنـة
وكلبـــــك هيـة زنـزانـة
تـعـذب بــيـة ميخــالـف
روحــــي والله فرحانـة
عشي هــوة كلبــك صـار
وبيـتـي تـاه عـنــــوانـة
احبك جــيـت الـك عنـاي
حياتـــي ليــــك ولهـانـة

هاك استكانة جاي أشرب عوافــي
دزيته لك مخصوص يامايه صافي
*

رش الدرب تيــزاب حافي أعتـني لـك
جا شـلي بالرجليـن الما تجي لــــك
**
لو ترش مو تيــزاب لو تزرع ألغــام
اللحم خلـه إيروح أوصلـــك إعظـام
**

كل ما يجيني الليل أذكر وفــــاكم
واذكر محاجي الطيب أبجي أبرهاكم
**

ويا النجم سهران وايدي أعلى خــدي
الليل أوظلام الليل شو كلها ضـــدي
**

وحدي ابنص الليل بس حيرتي أوياي
أبجي أعلى وقت الراح واتنطر الجاي
**

يالتون تالي الليل سمعني حسك
لولا القلت والقال لعبر وونسك
**
شحجي وتريد الناس من عندي أحجـي
دمعتي إبطرف العين بس أحجي أبجـي
*

للخوه ماقضيت شي ماقضيته
حتى الصخر ياناس أتوسديته
*

انت العطش والماي وانت المشوفـه
ورمشك وحق عيناك بالكاس اشوفه
**

أرد انشدك وارجوك صارحني يهواي
تذكرني لوغصيت من تشرب المــأي
**

نارك يخايب ماي مومثل نـــاري
اومن يسري بيه الشوق يحترق جاري
**

هم حلو .هم إزغيــر .. هم أزرك عيون
بس بيه طبع مو زين من يوعد إيخــــون

هو / آنه اللي عيني اعليچ واصل عماهـــــــــا
اتحدى كل الناس تبچي أبچاهــــــــا
**

هي / وآنه الدموع اعليك ابچيها اشكـــــــــــــال
وتدري انت فص العين من وشلـت ســــــــــــال
*

هو / صاحو عليَّ الناس واسمع ولا چــــــــــــن
گالوا خذاه الشوگ هذا الولـــــــــــــد جــــــــــن
*

هي / لو تدري آنه اشلون مبتليه بيهــــــــــــم
عمدة من امر يحچون باسمــــك حچيهـــــــــــم
**

هو / خل تحچي كل الناس بالچ تصــــــــــدگين
ولا يبقى فكرچ دوم بيهم تفكريــــــــــــــــــــــــن
**

هي / ماصدگ الينگـــال بس بيـــــك اصـــــدگ
لن نبضي آنه وياك كـــــــل ثانيـــــــة ايــــــــدگ
**

هي / لو تدري حالي اشلون من بعدك اشصار
چا گلت عفيه اعليچ متحملـــــــــه النــــــــــــار
**

هو / شوفي آنه حالي شلون من كثر الهموم
بس رسم فوگ الگــاع سترنـــــي الهــــــــدوم
**

هي / اتمنى طيرة الروح واوصل واحاچيـــــــــك
واگعد وحط الهمــــوم يمــــــــــك وابچيـــــــــــك

بفراكك..
حرقت هدومي الحلوات
نشفت الدمع و الريج
وفلّيت الشعر عالمعبر بريسم
واتاني تمرّ..
وكم شمس التغرّب ..
وانته ما مش صوت
و بـحـرقــــــة أحــــط ايــــدي ...
واشك الزيج
و اكولن ليش يا ربي ...
خلص كل حزن الحليوات ..
وآنه بضيج
يا ربّي ..
كل شط عبرته الوادم
جا ليش الاريده يصير شطّه اغميج ..؟
واتنطر تمر .. مثل العراق بعين البعيدين
وتمرّ الشمس بالعين
ويمرّ الكمر بالعين
ويضيع النجم بالعين
واشهك من اشوف الناس..
تمشي اثنين..
كلها اثنين ..
وآنه وحيدة يا روحي ..
تعلكم وسط حلقي الريج
ياشط الفرح .. رد للحديثه اردود
رِد اغميج
خـــلــينــــي أفـــــــوج ويــــاه ..
ريــــــج ابريـــج
*******

سراب وداعتج ما بقت** طِيبَه
عليل وللجرح ماشوف** طِيبَه
صدك راح الصديق وراح** طيبه
وصدك مات الوفه والله خَطيه
,,,,,,,,

جربت هذا الزمن ما شفت بي** صاحب
حاصب غدرني وبعد وصاحب فلا** صاحب
فضلت ابقى بغرب وحدي بلا** صاحب
يا دنية بعد شناوية عليه
*******
سبحة أمي وتربه ** وقبله
وراس أمي اشمنه** وقبله
الموت أرضه بي انه** وقبله
ولا أرضه بزعل أمي عليه
,,,,,,,,,,,,,

وثيقة بكل فخر كلبي** وثقلك
وجبل ماشفت باخلاقك** وثقلك
الك يرخص دمع عيني** وثقلك
الكلب لمن يدك يوكع بدية

اسمك حلو يهواي ومحله حروفه
ورسمك يا غالي دوم اتمنه اشوفه
**

مرت عليه ايام حالي تمرمر
كلبك علي يهواي يمكن تغير
**

اسال سواد العين والكمر لو هل
بعده حبيب الروح يذكرني لو مل
*

راح احتمل فركاك بس عندي شرطين
لو روحي تبقى وياك لو تاخذ العين
**
**شفتك كمر يهواي وبليله ظلمه
وبين عليه الشوك واشلون اضمه

________________________________________
صح انته عنی بعید من احسب امتار

بس انته وسط الروح مبنیه الک دار

****

بس آنه یمی گریب دومی احسك

تحت الرمش بلعین خلیت رسمك
***
فز الگلب بلیل ینحب تره نحیب

منك یخویه الصوچ غرگته بلطیب
***

زین انته گلبك عاد ليهسه عندك

آنه ترکنی وراح أو كعد يمك
***
بیدک اسلم الروح وملاچ اخلیك

واسمک ارید انساه وحایر شسمیك
***

سمیتك أنه الوحي اريك الاحباب



وگلیبی المجروح بذکرك شفه وطاب

***
اتحده کل الگال بگدی یحبکم


بنص الگلب والروح صایر سکنکم
***
انه افرح اذا فرحان انته ** ودمعتی تنشف

واذا مهموم اگل للعين** هلي الدم على المطرف
****
اعزك حته بغیابك

وهمی راحت اعصابك

اریدك تفرح وتضحك

ولا دمعه تدك بابك

يا غربتي ..

غربة عصافير التودع اعشوشها... برفّة جنح

ويا دمعتي ..

دمعة الكاع التبكي موت اهروشها... بجيت الملح

يا دار اهلنا الطاهره ... مر العمر

عيون اليحب امساهره ...ومامش خبر
بهيده على بختك يا كمر

**

وك يا كمرنه مروتك ... حنّي الشواطي بدمعتي

كلهم كبرت اعله الصبر...والونّه صارت غنوتي
مشتاق ابوسن دجله... واشرب مايها
واعزف ترانيم المحبّه بنايها
دجله الهوى ، والسوق ، والحب ، والسهر
بهيده على بختك يا كمر

يبراك
يكسري يصعب أعلى ألناس ** يبراك
طبيب ألعلل عيه أوعجز ** يبراك
لون همي أعلى ضعن ألعيس ** يبراك
عفاني ولا بركت اعلى الوطيه
**
والتهابك
احترك كلبي ابسعيرك ** والتهابك
وترك هلناس كلها ** والتهابك
بسبب روحي التودك ** والتهابك
تفاركها وتشب نيران بيه
**
شبهلاك
شب جمر الهوى ابكلبي** شبهلاك
أشحسن شايل ابوجناتك ** شبهلاك
حوى منجبت واحد ** شبهلاك
ولامثلك ابجنات الزهيه
**
والمذاك
رهيف اجفاك كطعني ** والمذاك
وحريج النايبه ابجبدي ** والمذاك
اهن جرحين الم هذا ** والمذاك
أضمد هاذ ذاك ايعن عليه
**
ولجفاك
اصيحن والهج ابأسمك ** ولجفاك
حبيبي ولااظن اسمي ** ولجفاك
الموت الموت بيه ارضه ** ولجفاك
لأن اجفاك اشد واعظم عليه
**
صدراك
وحك من بالحسن ياترف ** صدراك
صد وشوف جسمي عليك ** صدراك
لاتركض اخاف طيور ** صدراك
تطير ولابعد تنزل عليه
**
ونباك
بكلبي شكثر من الضيم ** ونباك
ربيب الشاة جار عليك ** ونباك
يبن الذيب من أخبرك ** ونباك
طبع الذيب يغدر بالثنيه
**
خمراك
عفيف وبركع العشاك ** خمراك
تعال وشوف حيلي عليك ** خمراك
لون يتبده فوك الكاع ** خمراك
حياتي وياه تتبده سويه

قصيدة ( ألمجر ) للشاعر علي كاظم ألدرجال ألربيعي ( أبوعمار ألربيعي )

مجر يامجرأيا مجر
ياغيمة ربيع بمطر
ياجولان زاهي بهور
يابردي وكصب أخضر
ياكحل أليضوي ألعين
ياحنه برجل لسمر
يادهله أليغطي ألكاع
ينبت رازقي وعنبر
ياتين بثنايا ألهور
كاط أوشمبلان أحمر
زهر أخضر طلع خريط
طر ألماي صار أصفر
مثل طعم ألعسل بالريك
جمار ألنخل لو طر
يبلام أليجول ألهور
كلي أبياكتر تفتر
أريد أتناك حتى هناك
نكتب دارمي بدفتر
صرت مغزل بحلك ألماي
لامخلاص لامعبر
شريعتنا كصب مضغوط
وألموكد حله أوجمر
حلم لاجن حلم تعبان
بضلوع ألكصب حشر
دجدم وأربط ألمشحوف
يابلام كلبي أنطر
تعال أكعد تدفه بنار
دار ألكوشه وأتبختر
يبلام ألمنايا أتحوم
فوك ألهور غيم أحمر
يبلام ألسفينه شراع
بس ينكسر تدمر إإ

قصيدة ( لاتبجين ) للشاعر وألباحث علي كاظم ألدرجال ( أبو عمار ألربيعي )
لاتبجين دمعاتج على تراب ألكبر طين
لاتبجبن دمعاتج ثكيله وماليه ألعين
أحلفنج أبعشرتنا ألقديمه ودم ألحسين
أحلفنج بنوم ألعافيه ونبض ألشرايين
أحلفنج بشارات أبو سدره وألبساتين
أحلفنج لأن أنت عزيزه وماليه ألعين
أحلفنج بقطرات ألندى وطيب ألرياحين
أحلفنج بشمام ألبنات أمطعم بتين
لاتبجين أضفرنج قصيده أعلى ألحياطين
وضل أغزل بشعرج غزل مسكين
ونه مدوهن بحبج صارلي سنين
وانه أدري أمن أطيحن ماتكصرين
كافي ألنوح بحت صوتج أتصحي ألمجانين
لاتبجين حتى ألكبر ينطر من تصرخين
أشعلي شموع وقري ألفاتحه وسورة ألياسين
وذكري ألله يسمره أو لاتكفرين
صحيح أنت ألوفه وشمعة ألطيبين
وصحيح أنت ألحملتي ألزين وألشين
وصحيح أنت ألمراسيلج دواوين
وصحيح انت أنظلمتي وصاحبة دين
وصحيح أنت ألعلى ألعيله تصبرين
وصحيح انت ألرسمتي أعلى ألورد عين
يهيل أنت بطعم كهوة أفناجين
أذكريني أنه ألشايل محبتج بالشرايين
شتل عنبر على أضفاف ألفراتين
يكاط وعنكر وجولان زاهي ويه ألكواهين
أحس حنظل أبريجي أشماتصدين
لأن كل ألمعاني أتغرز بضلوعي سجاجين
مامرتاح وأنت عيون محبوسة روازين
مامرتاح أجوب ألمدن ملتني ألدرابين
جم عيد اليمروأنت مكدره وما تضحكين
يمفتاح ألمحبه ألقفل زنجر عاكره ألبين
أو تخلبص غزل عمري أعلى ألطواوين
أمنين أجيب ألجابته أمي ألغاليه منين إإ
ألف ياحيف ضيعت أللبن بالصيف يازين إإ

ياجسر جلعة هلي يامعبر الطيبين
يابلسم الكل جرح ياكحل نص العين
مفتون انه ابحبهم من جهل من سنين
حبل الموادد يبس ياوسفه راح الزين
مثل المسودن همت ماأدري رايح وين
ضليت ادور ولك برواك البساتين
مامش ابد كل اثر بسمه وطواها البين
جذرك نبت بالكلب مثل الشلب بالطين
من تعطش ارويك انه من دمي يامسكين
ياما شبكت جرف ضامي وحبسني الطين
ياما كعدنا سوى وياما كرصنا البين
وياما سمعنا لغط من ناس بطرانين
وياما حملنا حجي من بشر شمتانين
وانه الحملتك حرز مابين زين وشين
وانه الحضنتك حلم مثل الرمش للعين
لطلاطه تشهد ألي والكرمه والصوبين
مشتاك كلش ألك كلي أشوفك وين
سبحه أتطشر خرزمابين شوك او طين
أشلون أ لمك بعد والظم الخيط أمنين
شاهود ردت الجسر للعبروا مغربين
ماادري وين ارحلوا لمريكا مدري الصين
دورت شرق وغرب مامش خبر للحين
صندوك كلبي انقفل بس هم حزن وونين
أمنين اجيب الجابته امي الغاليه منين إإ
******
للشاعر والباحث علي كاظم درجال ألربيعي

دارميات للشاعر علي كاظم درجال الربيعي
1 أشكد سهله دكت الباب للوكحه عينه
أنريدك تصير أبخير وانت التجينه
****
2صدكني ماناسيك خاف انت ناسي
والخوه يابو شهاب تاج اعلى راسي
****
3 الخوه خلها اتروح واحسبني الك جار
البابي مادكيت اهواي الك صار
****
4 ماريد احسبك جار توصلني لخبار
والجره اوصار عليك مكدر وصار

قصيدة ( عتاب ) للشاعر سعدون السيد حميد المكصوصي

لاتسد بابك بوجه المعتنيك
هاي شيمه والشيم عند الرجال
**
انته لبكلبي ونه بعكلك شريك
وتدري بيه بلايه مال ولاحلال
**
انه شفت اهواي من النايبات
مرن اوراحن مثل مر السحاب
**
وماكلت احاه خوفي من الوشاة
الحسبوا الماي العذب مثل السراب
**
روح خاطر ذني خيل مجربات
وشمس تسطع ماتخاف من الضباب
**
ذهب احمر وبغلاته شيشتريك
انته دجله ومايها المثل الزلال
**
ياتريك المابعد منك تريك
زعل يومن شافك وغاب الهلال
**
خذت روحي وياك يالرايح بعيد
وهسه تدريني تراني بلايه روح
**
خيروني وابد غيرك مااريد
علمتني شلون تداوه الجروح
**
جيد عندك بالبشر مامثله جيد
مثل رقبة ريم تمشي اعلى السفوح
**
شكثر ربك بالحسن متمعني بيك
وغار منك من سمع حتى الغزال
**
هام بيك وباجر الحيكم يجيك
ايريد يتنازل الك من الجمال
**
اللحاظ سهام نبتن بالدليل
والجدايل مااظن بس للغوه
**
انه قبل سنين من هجرك عليل
وتدري عندي شهود من اهل الهوى
**
دخيل عندك كوم وتلكه الدخيل
وخلنه نكعد بس ثلث ساعه سوى
**
عون ابوه المات يسمر بين أديك
بلجن نجازي ربع ذاك الدلال
**
لاتخاف من الاهل انته اشعليك
انه صاير للعشك اكبر مثال
**
جزن حفنه سنين جنها البارحه
ونته ناسي ايامنا اوذاك الوفه
**
لو تبدل كلب ولفك صارحه
هواي وادم عايشه بلا عاطفه
**
ولاتوديله سوالف جارحه
ولاتخلي السالفه اتجر سالفه
**
شلك بواحد نسه ومايشتهيك
تصير عنده بثكل ياخوي الجبال
**
انته لو تزرع زرع ازرع بديك
ولو شتال انثرت يطلعلك شتال
شكرا للشاعر سعدون المكصوصي / اخوك الشاعر علي كاظم الدرجال الربيعي *

من تعطش ارويك انه من دمي يامسكين
ياما شبكت جرف ضامي وحبسني الطين

******
ياما شبكت الجرف ضامي وحبسني الطين
******

وانحل
الف ياحيف جسمي ذبل ** وانحل
واظن حبل الموادد يبس ** وانحل
أدور عالضعن وين صار ** وانحل
ادور الكوت مدري الناصريه

مساجله في الابوذيه بين الشعراء كاظم الخطاط المالكي والشاعر علي كاظم درجال الربيعي
1 يقول كاظم المالكي
أهين الروح مره ومره ** أجلها
الوحل للراس واصل من ** رجلها
حماها ماعرفته من ** رجلها
المغزل والغزل تاهن عليه
2 أجابه الشاعر ابو عمار الربيعي
عقرت الروح لجلك **من رجلها
وحياتي وياك مامش ** من رجلها
يلمتيه حماها ** من رجلها
شلون الغزل يصفه اعلى الطويه

من الشعر الشعبي (عيد ألغدير ) للشاعر علي كاظم ألدرجال ( ابو عمار ألربيعي )
هذا عيدك عيد رباني
رساله من ألسما تحمل أمل **
يارسول ألله بلغ
حتى مايبقى عذر
علي من بعدي ولي
ألدين السماوي أكتمل **
وانه من ثايه بعيده
عيوني تربي
شفت أيد أونور طل **
شفت أيد أعظم رسول
مشابكه أيد ألفحل **
أيد مولانا علي
أتهز ألجبل **
وألحجيج أتهني سيدنا علي
أبعيد ألولايه
ألنابت أبجذر ألأزل **
.وأنت ياما دارت ألأيام
بيك وكلت تسهل **
وأنت حتى ألبايعوك
أتنكروا لعظم بطل **
وانه أفرح يوم عيدك
حتى لو غيري زعل **
حتى لو غيري زعل إإ
****
كتبت في العام 1989

ألزهيري من شعر أهلنا ألأعزاز / هلا تذكرت لطلاطه وألمجريه إإ
________________________________________
گلبي الگبل مايون بجفاك ** وننته
وضنيتك انته الفرح ثاريك ** ونه انته
مامش طيوفك واباري ابشوك ** ون انته
ماخوذ مني وخيالك ابد ما ** لحظه
ورسمك يزين النبا مبعد علي ** لحظه
مشتاگ اشوفك ولو مشوار لو** لحظه
وين انته روحي دنت عالموت ** وين انته
***


يا صاح ثكل الدمع بجه العيون ** وشرد

الناس تنشد علي مدكلي خايب ** شرد

الي انطيته عمري غافل اكليبي ** وشرد

ماخله بيه لحم بس العظم** بهدوم

لا تضن حجي الدغش عمرك يخلص ** به دوم

حياتك يصاحب مدرسه وماتضل ** به دوم

ومن يسئلك ربك اشتحجي عن المضه ** وشرد
***

يا صـاح انا اخـوك لو جـار الـدهـر ** صـاحبك
سـكـران بـمـودتـك مـا يـوم انــــــا ** صـاحـبك
أنهظم لو اشوف غيري من الخلق ** صـاحبك
عـنـدك دكايك قـشـر تـمـرد كليبي** مــــــــرد
وكـم عـاقلن لامـنـي وانا لعـذولـي ** مـــــــرد
وانـت الـعـرفـتـك يـا كـريــــــــــم و** مـــــــرد
لـكـن ألـف يـا حـيـف ما تعرف قـدر** صاحبك
***

سألوا تعرف الفرح لا جاوبت ** معرفه

وسألوا تعرف الحزن أي جاوبت ** معرفه

من حيث شاعر صرت وادري الشعر** معرفه

ومختص فقط بالحزن غير الحزن ** مكتبه

واسبابه عندي جرح ما سد ابد ** مكتبه

وشكبان منه الألم يمكن واظن ** مكتبه

وديوان دمعي انطبع دار النشر** معرفه
***

احله اسم بالخلك اسمج برز ** ايمان
ساكنه بروحي تره ونص الكلب ** ايمان
مليانه طيب وعطف مليانه حب ** ايمان
تكتل اذا خزرتك لو نظرتك ** نظره
والوجه مثل الكمر صافي وعليه ** نظره
شلون اسطبر وانتظر مابي بعد** نظره

لو داست اعله الارض لمن تمره ** أيمان
*** ا


مانمت انه الليل من هم العليه ** وارق
جلمود كلبه صخر ما حن عليه ** ورق
انسليت صرت برفع خيط البريسم ** وارق
اتمنى طيفه يمر حتى بطيافه ** بخل
وعملاته وياي مو عملات خل ** بخل
حنظل من ايده صفه زادي ويخلطه ** بخل
بعضاي نار اوجرت واعضاي شبه ** الورق

هاك استكانة جاي أشرب عوافــي
أو دزيته لك مخصوص يامايه صافي
**
رش الدرب تيــزاب حافي أعتـني لـك
جا شـلي بالرجليـن الما تجي لــــك
**
لو ترش مو تيــزاب لو تزرع ألغــام
اللحم خلـه إيروح أوصلـــك إعظـام
**
كل ما يجي الليل أذكر وفــــاكم
واذكر محاجي الطيب واحجي أبرهاكم
**
ويا النجم سهران وايدي أعلى خــدي
الليل أوظلام الليل شوا كلها ضـــدي
**
وحدي ابنص الليل بس حيرتي أوياي
أبجي أعلى وقت الراح واتنطر الجاي
**
إشما تقول الناس عندي أنته لول
سو كلشي بالدلال يالحلو مخـول
**
يالتون تالي الليل سمعني حسك
لولا القلت والقال لعبر وونسك
**
شحجي وتريد الناس من عندي أحجـي
دمعتي إبطرف العين بس أحجي أبجـي
**
للخوه ماقضيت شي ماقضيته
حتى الصخر ياناس وتوسديت
**

انت العطش والماي وانت المشوفـه
ورسمش وحق عيناش بالكاس اشوفه
**
أرد انشدك وارجوك صارحني ياهواي
تذكرني لوغصيت من تشرب المــأي
**
نارك يخايب ماي مومثل نـــاري
اومن يطري بيا الشوق يحترق جاري
**
هم حلو .. وهم إزغيــر .. هم أزرك عيون
بس بيه طبع مو زين من يوعد إيخــــون
**
بالك تقول الاه ياخويا بـــالك
كل التقوله ايصير روحي ابدالك
**
مبخوت أضل للشيب يافلان أذكـرك
أوينكرني نور العين من كون أنكرك
**
سبحانه من سـواك نص وجهك إعيــون
إزغيــر سبيــت الناس من تكبر شلون
**
بيدي أوقرضها الفار فجت عباتي
كل هذا ماطخيت وامشي ابرهاتي
**
أتمنى كون أيصير لحدي أويا لحدك
أو من يطلع الدفان أقعد وقعـــدك
**
بيدك ضيعت ديك الليـــالي
وبلحظه ما أجى أبعينك دلالي
**

شقيت ثوبي أعليك وصلته للنــص
جاوين قلبك أوياي صاير مثل جص
**

امي ألغاليه

سكتنه الصبر من يوم چنه أصغار
منها عرفنه ألوفه وتعلمينه أشعار
الزاد ما بي طعم لو ما يجي الخطار
ضحكتهة هيبة وطن تنثر دمع واسرار
ولو دارت أمي بزعل حتى الشمس تندار
باصبعها محبس شذر عن الحسد والعين
ولو غاب ضي الشمس أمي تشع شمسين
وكت المعاند صگر وبالحب حمامة بيت
وفانوسنه لو طفه ابضحكتهه يضوي البيت
ولو يوم اخذني السهر وي ربعي بره البيت
ما يغمض الها جفن الا اذا رديت
يوليدي غاب الگمر واتنطرك ماجيت
وبكل بشاشه صدر بشفافها .. اتعشيت
تعذرني يبني تره بالنشد لو لحيت
انته طعم دنيتي وانته عمود البيت
ياما حملت الصبر عد مهدك ولوليت
(دللول الولد يبني دللول .. عدوك عليل وساكن الچول)
اومن تنعه امي وتون
بالبجي أتشيب وطن
ياما كسرها الوكت واتلاوت وي الزمن
حته ليالي الشته من شافن امي بچن
اليلة ليلة شته والگاع صارت طين
والحزن موقد جمرمامر فرح للحين
يامن ضحكتج دوة وبسماتج بساتين
فدوة اروحن الج لجدامج الحلوين
يا يمة انتي الوفه و الغالية تبقين
اصعد السابع سما لو بس علي ترضين

لايجي گلوله ماظل بيه حيل
خلصن دموعي وبچيت سنيني

چان يطلب وانه اگله بعيني هاي
بعيني هاي وحط أصبعه بعيني
،،،،،،،

لاتخجل بعد وكت الخجل مات
ولاتحتار أبد ماتسوه لتحير

گبل ماتحجي اعرفك رايد تروح
روح أحرگهن الدم والتصاوير

وإذا خايف البير يطلع الاسرار
حته البير راح نذبه بالبير

عرفتك من الاول هدة إعصار
وتسد باب السمه بوجه العصافير

أنه مو جنح يمك ذبته الريح
بكيفك ينكسر وبكيفك يطير

مناشير أدري بيك وگلبي تابوت
وگمت ذبيت گلبي عله المناشير

أنه جبت الدروب مغمض وياك
وأدگ روحي عله گنطرتك بسامير

وجبتهه وياي عمرك تلف وتدور
وأنه عله تراب جدمك روحي تدير

وسلمتك عمر ماقصرت بيه
وگضيت العمر وياي تقصير

نواعيري انتهن چي مايك بعيد
الخلل بالماي مو صوچ النواعير

بمواعيدك بعد ماصلي للموت
صرت كافر وكافر بالمواعيد

عله جرفك عمر تانيت الهلال
وصل بس موت منك ماوصل عيد

صرت شاعر حزن واقرالك جروح
شمايكگضي الجرح من وحّده يعيد

وشيّب باب گلبي وبعده مقفول
وحته عله القفل طلعن تجاعيد

أجيب أول نفس خلصته وياك
وأجي بآخر نفس وتگلي شتريد

عصفوره عله بابك حطت الروح
زحمه تحشم عليهه المصاييد

بعد ماريد منك كلشي يفلان
بس انطيني روحي وكلشي ماريد

يا يمة الايام كطعن كلبي ** وصل
وخلني مثل الحبل بنشر عليه ** وصل
لا خبر منهم اجية ولا مكتوب منهم ** وصل
وبجيتك يا حلو ترد اللي ** روحي
وياروحي مالج بخت عوفيني يا** روحي
لتصيح بسمي بعد ولتكول يا ** روحي
منتظر غيرك انا ها هو يمكن ** وصل
***
المسه كتله صباح الخير ....وبراك
اتمازح كال لولا اتوخز ....وبراك
كلت لا والذي صورك .... وبراك
بجبينك صبح ظنيت المسية

وهو ماخوذ من البيت الشعري الذي يقول
صبحته عند الساء فقال لي ..............هل انت تهزأ ام تقول مزاحا
فأجبته اشراق وجهك غرني.............حتى تخيلت المساء صبـــاح
***
2_الباء
بره المسكوم من علته ....وناداي
وحركت اليابس بهجرك...وناداي
براس اربع طرق لكعد....وناداي
انه المظلوم وانت بدعت بيه
وهو ماخوذ من هذا البيت
لاقعدن على الطريق واشتكي...........واقول مظلوما وانت ظلمتني




3_التاء
تظن يبره الجرح عكبك.....ويلتم
جفيت وبالحشى منـــك.....ويل تم
الثريا الها شمل سبعه......ويلتم
وانه واحد حبيبي وشح عليه
وهو ماخوذ من هذا البيت
خليلي اني للثريا لحاسد.............واني على ريب الزمان لواجد
ايجمع منها شملها وهي سبعة.......ويبعد من احببته وهو واحـــد
***
4_الثاء
ثدي الحب يبس ما در ......والك دار
ومحبتك زالت همومي......والك دار
الك عرش انتصب يا اسمر..والك دار
بكلبي ولا لغيرك سكن هيه
وهو ماخوذ من التخميس الاتي
ما لنا عنك سلوة واصطبار............ولمعناك في القلوب قرار
وسواء منك الجفا والمزار.............اينما كنت فالحشا لك دار
ليس فيها لغير شخصك سكنى
***
_الجيم
جره دمعي على الوجنات.......ما دام
على ريم اليدير اقداح..........ما دام
حرام الزنا بالقران............ما دام
من التقبيل لا تبخل عليه
وهو ماخوذ من هذا البيت الشعري
لقد حرم الله الزنا في كتابه.......وما حرم التقبيل بالخد والفم
****


6_الحاء
حكم سيفك الغـــــدار.......حكمه
ابكلبي وما بقت للصبر....حكمه
كل اللي توله جار .......حكمه
انه عاشك وحكمك جار بيه
وهوماخوذ من هذا البيت الشعري
ها انا اهواك على ما ارى............من قلة الود وبعد المزار
كم جرت بالحكم على عاشق..........اكل قد من ولي الحكم جار
***
7_الخاء
خالص يا ترف بس الك .....ودنه
لون تسكن بيابي العين ......ودنه
لو بات الترف بحشاي ......ودنه
اكله اكرب يحلو الطول ليه
وهو ماخوذ من هذا البت الشعري
لو بات من اهواه وسط حشاشتي.........لقلت ادنو مني ايها المتباعد
***
8_الدال
دليلي ابنار هجرك طاح .....وهواي
لشك ثوبي وادك واصيح....وهواي
اذا تنكر هيامي عليـــــك ...وهواي
ادموعي اعلى الخدود اشهود هيه
وهو ماخوذ من البيت الشعري التالي
اذا تكن منكرا هواي ووجدي.......فدموعي على الخدود شهود
****


9_الذال
ذلولي عليك ناحل ......ما بغيره
وسليم الذات اوده ......ما بغيره
صديـجك لو لكيته ......ما بغيره
بجف ارماد بيعه لو تهيه
وهو ماخوذ من هذا البيت الشعري
اذا لم تجد عند الصديق مروءه........ولا غيرة بعه بكف رماد
***
10_الراء
روحي بيش اسليها .....كتلها
عليك اني ودمع عيني...كتلها
شبه العيس بالبيده.......كتلها
الظمه ودومن اتحمل الماي هيه
وهو ماخوذ من البيت الشعري الاتي
واشد ما لا قيت من الم الهوى.........قرب الحبيب وما اليه وصول
كالعيش في البيداء يقتلها الضما ......والماء فوق ظهورها محمول
***
11_الزاي
زماني ما نطه لروحي .....نفاها
ظلمهه وعن مواطنهه .....نفاها
السفاهه اهل المثل كالو....نفاها
انا اشما سفهت ناري سريه
وهو ماخوذ من المثل الذي يقول
الســــــفـــاها......نــــــــفاها
***



12_السين
سكاره احنه ابهوه شوكه......وصحنه
جره دمعي وجرح خدي......وصحنه
غركنه من الدمع صاحوا.....وصحنه
احتركنه وناركم عمت عليه
وهو ماخوذ من هذا البيت الشعري
فلما برزنــــــــا لتوديعهم............بكو لؤلؤا وبكينا عقيقا
فساروا فاتبعتهم ادمعي..............فصاحو الغريق وصحنا الحريقا
***
13_الشين
شنهو السبب يا مدلول .......مرضيت
وابزعلك اللب احشاي ......مرضيت
الك عاشك انه وانجان......مرضيت
فؤادي اللي غصبته رده ليه
وهو ماخوذ من هذا البيت الشعري
ان كنت تابى ان تراني عاشقا ........فارجع الي فؤادي المغصوبا
**
14_الصاد
صومي لليكول اهواك.......شفته
صبحت وارشفت من الترف..شفته
يكلي افطرت كتله البدر.....شفته
بجبينك حرم كل صومي عليه
وهو مقتبس من هذا البيت الشعري
قبلته عند الصباح فقال لي..........افطرت يا هذا ونحن صيام
فاجبته انت الهلال وعندنا..........الصوم في رؤيا الهلال حرام
***


15_الضاد
ضكت حلوك حبيبي وضكت......ما راك
وانه بغي التجافي الحيــــــل.....ما راك
يضيج الصدر يوم البيـــــــه.....ما راك
وينطيني عذولي الحك بديه
وهو مقتبس من التخميس التالي
الى كم ذا الصدود اطلت هجري..........رويدا فالهوى العذري عذري
متى يوما اراك يهون امري..............ويوما لا اراك يضيق صدري
وتعذرني العواذل في شجوني
****
16
_الطاء
طريدك لا تطن ياوي......لجنه
انذهل وانياب هجرانك ....لجنه
شمس شبهك انصفها.......لجنه
الك ما انصفك بين البريه
وهو مقتبس من هذا البيت الشعري
شبــــــهك الشــــمس ولكنه.............قد انصف الشمس وما انصفك
****
17_الظاء
ضجر كلبيب دمع العين.......هماي
وراهم يا اجدامي ابشوك....هماي
حجب عن عيني طيب النوم..هماي
اشلون اصفي لزماني الخان بيه
وهو مقتبس من بيت الشعر التالي
قلقـــا تقلبني الهموم بمرقدي...........هل كيف اصفي للزمان واصفح
***


18_العين
عند البد وفه الانصاب .......كله
علن حربه وعلي ثار........كله
حاجه اتصير عند الجلب....كله
يحجي جليب دير النظر ليه
وهو ماخوذ من المثل الشعبي المشهور
لو صارت حاجتك عند الجلب سميه حجي جليب
***
19_الغين
غيرك لا تظن بالعين ......حالي
اوريجي عليك مر ما يوم...حالي
بغرامي يالتسل عن شرح ...حالي
اعله كل حال الهوه جتال اليه
وهو مقتبس من هذا البيت الشعري
ان تسل في الغرام عن شرح حالي.............فالهوى قاتلي على كل حال
***
20_الفاء
فكدت اضعونهم واصفج........بياداي
حلت وين ما ادري............بياداي
الكلب هيهات يســــــلاهم.....بياداي
ولا عيني تلذ بالنوم هيه
وهو ماخوذ من هذا البيت الشعري
فقدت ضعونا في دجا اللبل حملوا...........وراحو ولم اعرف لهن مقاما
فلا القلب يسلاهم ولا النار تنطفي...........ولا العين تهوى بالبعاد مناما
****



21_القاف
قيد الاسر بالرجلين....... صكه
عدونه والهنا بالكاس.....صكه
انهضوا للعلا واكتبوا ....صكه
اوقع بيه تراني اعله المنبه
وهو ماخوذ من هذا البيت الشعري
الا فاكتبوا صك النهوض الى العلا........فاني على موتي به لموقع
***
22_الكاف
كثروني وزاد الكلب .........لو بات
ومدري انكطع حبل الوصل..لو بات
الكمر ولفي وعندي اليوم ....لو بات
مجنت ارعه الكمر لو زاد ضيه
وهو مقتبس من البيت الشعري التالي
يا ليل طل او لم تطل................لا بد لي ان اسهرك
لو بات عندي قمري .................ما بت ارعى قمرك
****
23_اللام
لااسمع لا ارى لحجي .......ولاشام
ابشوك الما حوى نجد .........ولا شام
اله سوره ابصحن خده........ولا شام
سوده وبالسويد اثر سجيه
****





24الميم
مصابح ناس عادتني ........اولمسها
واوعيني عن مودتها.........او لمسها
الافاعي بالمس لين.............لمسها
لجن من تجلب ابسما المنيه
وهو ماخوذ من البيت الشعري الاتي
ان الافاعي وان لانت ملامسها...........عند التقلب في انيابها العطب
****
25_النون
نهاني الينم عنك............ وابد منهه
وودك مثل روحي .........وابد منهه
السمه كابلت وجهك........وابد منهه
البدر من ضي سناك انعكس ضيه
وهو مقتبس من البيت الشعري التالي
قابلت وجهك السماء فابدت...............صورة البدر من سناك انعكاسا
****
26_الهاء
هله بالي بوداده انكشف .......ستراي
وحوبه الجان الي وياك........ستراي
اجانه بالظلام ايريد............ستراي
انفضحنه ابنور خده اليشع ضيه
وهو ماخوذ من هذا البيت الشعري
اتانا في الظلام يريد سترا..............فانفضحنا بنوره في الظلام
*****



27_الواو
ولك شوك الدليلي......وانت شاكي
الذنب منك عليـــه......وانت شاكي
بليه اسلاح اشوفك.....وانت شاكي
لجن بعيونك سلاح المنيه
وهو مقتبس من البيت الشعري التالي
هزوا معاطفهم وهن رماحم.............ونضوا لواحظهم وهن صفاح
شاكين ما حملوا السلاح وانهم..........منهم عليهم اهبــــــــة وسلاح
***
28_الياء
يحادي الظعن بالله عليك......اني
لما يسمع شريج الروح.......اني
لريد اصبر واعلم الصبر.....اني
امر من الصبر فركاك اليه
وهو مقتبس من هذا البت الشعري
ساصبر حتى يعلم الصبر انني........صبرت على شييء امر من الصبر
********.

ماناسيك انا ولانكرت هواك
لكن مبتعد من صالحك اني
**
مااريدن اكونن سبب تعبك دوم
ومارايد تظل باحزاني وتعاني
**
لو كلفت تكره حتى اسمي بيوم
وبعيونك اصيرن مجرم وجاني
**
لان ماريد يوم الكاك مهموم
ولااقبل تضل موجوع وتاني
**
راح ابتعد عنك مو لان انساك
شينسي الكلب يالصرت عنواني
**
تدريني احبك مدمن انا عليك
وانت اغلى الحبايب واغلى خلاني
**
اغلة من الكرايب واغلى هاي الناس
وانا بعدك امسيت وحداني
**
راح ابتعد واعمي العين من فركاك
اخاف تحب من بعدكم تشهد اجفاني
**
وحك عينك عزيزة دموع هاي العين
ولو تدري القرار شكثر اذاني
****

شكلك شعتذرلك.. قصرت ويــــــــــــــاك
جرحتك يا ترف انه شكثر خــــجـــــلان
انت القدرت جرحـــــــي وعـــشت وياي
انت النشفت دمعي وصرتلي احضـــــان
انت الغيرتني ورجـــــعتلي الشـــــــوك
وانت الفتحت كلبك الي بســــــــتـــــان
زعلتك صدك .. بس والله ما مقصــــود
صح مني الغلط وانه اعترف غلطـــــان
يضل طيب الكلب موجود بالوجــــدان
سامحني بكيانك من حنان البيـــــــــك
لا تضحك جذب وبداخلك زعـــــــلان
اجيتك اعتذرلك وانه ما معصـــــــوم
شسويله الغلط مكتوب عل أنسان
الف اسف والف مره اعتذر كل يوم
********

ثوب الحزن بفراكك ** لبسنه
وثكيل الطبع طبعه لو** لبسنه
ولك خدك ماوصلناله ** لا .. بسنه
تزعل ليش يمدلل عليــــه؟
**
تظل صاحب فضل وشكبر** فضلاك
وخلكي ما فضه الغيرك ** وفضلاك
اميزك عل خلگ كله** وفضلاك
وبسمك احترز صبح ومسيه
**

عليك الليل كله انه ** ونه
ومعاك العتب هسه انا ** وانه
اتهدد بالنفاها انه **.. وانه
وينك مو طبك دهر العليه

0000000000000000000
0

رضى كلبي علمودك **من رخصتك
وسومن بيك غالي **من رخصتك
دست فوكي دكلي ** من رخصتك
حته ابراحتك تسحك عليه
===
ياهو اكثر يحب قيس انته** ونه قيس
خذ مثل العشك انتي ليلى000 ونه قيس
صرتلك مسلم وسيد 000 ونه قيس
شصيرلك نيوتن حته اترد اليه
=====================

وحق اللي تعبده الناس000 وحده
حبك سلب مني الروح 000 وحده
هذني اثنين ونته اختار000 وحده
ترحل لوتظل محبوب اليه
====================
ذهل حشنج خلاييه العقل 000 ولعين
وصبحنه ابوصف هذا الطول 000 ولعين
لو تدري الصبايه بيج000 ولعين
جا طلبن من اوصافج هديه

________________________________________

ردت طيفك يلوح بليل ** مالاح
طعم فراكك صار هواي** مالح
بعد ماأدز رسايل بعد** ماألح
لان كلما أدز مترد عليه
**
عليك الروح تنشد وأنت ** غايب
كمر هلت أعيادك وأنت** غايب
أسجلك دوم حاضر وأنت** غايب
وأذا تحضر ترد الروح بيه

****

صرت كلي لحياتك ** منهج اني
وحرف بكتاب كلبك** من هجاني
شجنيت اني بمحبتك ** منه جاني
سهام وكل وكت تمطر عليه

****

ألك هالروح بين الناس** وديت
الك وجروح كلبي اخزنن** وديت
ألك كم مسج يالمحبوب** وديت
وأنت ولا مسج وديت اليه

****

يون كلبك يخايب** ونته بيه
وابن خال الجرح انت** ونته ابيه
اعوف شلون شخصك** ونته بيه
وافكر بيك كل صبح ومسيه

****

روايـة شـوك ابعثلك** وقصه
واكلك عن عذاب الروح** وقصه
لان حبك جرح كلبي** وقصه
وخله اتموع روحي ابين اديه

****

منك ما يضوج الكلب** ويميل
وعنك ما يزيغ النظر** ويميل
اكطلعك مسافه متر** و ميل
ولا اتعب واكول شلون بيه

****

هلا يل ما نساك الكلب** مرة
وصدك كل ليالي اجفاك** مرة
شيضرك بالحلم لو تمر** مرة
عزيز انت وتضل غالي علية

****

الگلب ضل بس اهو وحده** ورباه
يتيم وماله واحد** ورباه
منو مثلي اخذ جرحه** ورباه
وكبرنه على القهر سوية

****

احب صوتك واحب للعود** دكات
وزماني شلون اله وياي** دكات
وخلص كلبي وماظل بعد بيه** دكات
وترد روحي من يمر اسمك عليه

دمع العين داريته ** والك دار
ظيم الوكت ماهزني** والك دار
الك حصه بوسط روحي** والك دار
واكًطعهن اذا تحتاج اديــــــــــــــــــه
***
قلم كًلبي وتداين ورقه ** منـــــك
وابد ماكو بمعزتك ورقه** منـــــــك
اسجلك انت الاحلى ورقه ** منـك
واكتب لافته محجوز اليـــــــــــــــه
***
بعدني وياك عـالعشـــــره** ولا زال
وحبـــــــــــك بالكًلب ثابـت** ولا زال
بعدني صـــــــادق بحجيي** ولا زال
واظل اهواك لآخر نفس بيـــــــــــــه
***
اعيوني من فركًاك مبتليه بالهم
اضحك تسيل ادموع اسكت تصب دم
*****
للنار اروح اوياك لورايد امشي
جنه وعكًب عيناك ما تسوه كلشي
*****
تدري شكثر يفلان وشكًد احبك
من كثر ما اشتاكً مرات اسبك
ـــــــــــــــــــــــــــــ

روحى الشوك شارلهة **ومرهة
ولا يوم الهنة مسهة ** ومرهة
كظت عامين بالفركة** ومرهة
وبالثالث تريد الوصل هية

* * *
صفينة لا كدر يمنة** ولا هم
لا عاذل يمر بينة **ولا هم
ولونه اسنين يا مصعب** ولاهم
كفر لو سلو اسيوف المنيه

* * *
مجروح الكلب من زغر** خلة
وتسود ن من لفتلة اخبار**خلة
جس بيدة الطبيب وصاح** خلة
ودواه بالعجل لليهواه ترده

* * *
بلتنى الروح وية الكلب **والعين
الخلك نامت وهم بالنار** والعين
طلبت من الجليل العزم **والعين
يصبرني على الذاتة ردية

* * *
اشوكت تعطف يحلو العين** وهنه
يل ابفركاك شاف الجسم **وهنه
عشت عمرك سعيد هناك** وهنة
الالم والسهر والوانة الخفية

* * *
ونين الناى ونتة كلبى **سلهة
وعليلة اصبحت روحى وانت** سلهة
هاى الناس عندك وانتة** سلهة
تخبرك عالجرة بعدك بيه

* * *
هجرهة العين يا صاحب **وسنها
ودهرى لملم اسيوفة** وسنها
اشكال الدنيا راوتنى **وسنها
ضحك للغير وانه الكدر لية

* * *
نار الهجر بالدلال** ولعت
عكب ماهزتة الصد مات** والعت
ابكثر ما النفس بالخلان **ولعت
جازوهة ابرد ه وشح واذية

* * *
امر كلبى الهوه وبالعجل** نخلة
وكال اوية الترف هاليوم** نخلة
ولو حالى شبية ابجذع **نخلة
لجن يخضر لو ن مروا عليه

* * *
عليله النفس بالله عليك** خلهة
من يوم النوة على الهجر **خلهة
عزيز ومن جفاه الروح **خلهة
ساعة اتموت ساعة اتعيش هية

* * *
هاك العكدة بيدك وانت** حلهه
شديدة ويصعب على الفكر** حلهة
النفس مالحكت تصطحب **حلهة
وغدت تركض ورة الجانوا وراهة

* * *
تلوب الروح جدامك** وتلهة
وحجي الشمات ضعفهة **وتلهة
شبية الطفل شاف امه **وتلها
اجيتك والبجى غالب عليه

* * *
ابد ما ينوصف يا خلك** وجهة
خزرني وبالدليل النار** وجهة
كلت هاك العكل يا ترف** وجهة
كال الروح عندى وهاى هية

* * *
حكيمى جزع من علتى **وملنى
ابكثر ماهو صبرنى** وملنى
الهى ينتقم منه **ومنى
حطيتة الكلب نص الاذية

* * *
اهه العمر خلصته **وراهه
عشره امكدره واركض**وراهه
لون ربي رحم مرة **وراهه
لصليله العمر كله هديه

* * *
شجاوب لو نشد ني الروح **ملها
العاذل والقصد بالنشد **ملها
اكلة العشره حيف الولف **ملها
وهو ايعيد اذا شاف الاذية

* * *
عليش الروح تتعذب** وعدهة
والاف البشر يمهة **وعدهة
اذا تنصفهه اتركها** وعدهه
غريبه ولا تحملها الاذيه

* * *
بسبب حبك دوانه وانت** همنة
علينة الناس صاحت وانت** همنه
وحيد الكلب مسة وانت** همنة
او غريبة الروح ببعادك عليه

* * *
لمن شافة الربيع الورد **خالة
ونشد منهو السواد اعلية** خالة
د شوف اشلون ربك خلق **خالة
على المر مر وكملة الهدية

* * *
قره بذنه العدو عنى** وماله
وسعى ابجاهه لعند اهلة** و مالة
نشدني اشغيره حالى** ومالة
وهو يدري المصاب الصار بيه

سبحانه من سـواك نص وجهك إعيــون
إزغيــر سبيت الناس من تكبر شلون
***
ارد انشد الصباغ هم يصبغ اكَــلوب
اصبغ دليلي اعليك واحزن فرد نوب
***
سـلَم ولَو بالعين تكفي الإشــاره
روحي إبتلت بهواك .. سويلي جـاره
***
كل ما يجي الليل أذكر وفـاكم
واذكر محاشي الطيب وابجي أبرهاكم
***
شلونـك.. شلون الدار . وشلون الأحباب
أذكر جرح بجلاك خبـرني ما طـاب
***

همي الليالي اتعود واتعاتب أوياك
احجايه للشمات خلاني فركَـاك
***
منك سمعت الاه كثرت جراحـي
وشبيدي خوية اعليك كَصوا جناحي
***
يحمل وفى والطيب والرقه كلــها
أوكل مشكله ابهالكون بس يمه حلها
***
سبحان من خلاك تقسي ابغرامك
جانك اتداوي اجروح رق بكلامك
***
أرد أسـأل العشاك ليش آنه مشتــاك
نايم إبحضن إهـواي واشكي من الفراك

***
شحجي شكَل للناس من همي شحجي
مليان بالحسرات بس احجي ابجــي
***
عمداً أمر بالدار وأشبع مغمــه
وابجي بجي المفطوم ومفارك أمه
***
علمني عالنسيان ارد انسى ضيمـك
وي غيري كَمره اتصير بس حصتي ضيمك

عايل يالأسمــر عايــل
صبح ضعنهم شايـــــل
ـــــــــــ

ما أگدر على ثمنهم **تسعين ناگة وحايـــل
ماغير هذي السمرة **الخلت بگلبي الحسرة
لك من زاخو ولحد البصرة **والگلب صاعد نازل
ـــــــــــــــ


ياعين غيمي وصبي** ونزلي الدمع لاتخبي
ليش عايش ياگلبي** ومحبووبك إنت راحل
ــــــــــــــــــ
عايل يالأسمــر عايــــل
صبح ضعنهم شايــــــل
ــــــــــــــــــ
ما أگدر على ثمنهم ** تسعين ناگة وحايـــــل


راحت ريمة الجزيرة **العلى حديثاتنا أميرة
خلت الروح بحيرة **وگطعت حتى الرسايل

لانك بألتزامك مو من اهلك
اخاف تشيل ذنبي مو من اهلك
منو بكدي يحبك مو من اهلك
**

منو بكدي يحبك من عشرتك
وتمنى يصير اصبع من عشرتك
وانا شكظيت خايب من عشرتك
**
اعد بسنين عشرتنة وهي جروح
واحس وية النفس يطلع وهج روح
واخيرا كتلي ودعني وهج روح
**
اروحن وين مااكدر هوة انت
وانه الماهان من اجلك هون انت
اللي بدنياي شي واحد هوة انت
**
وحرت بين ان تركتة وان تبعتة
انا الونيت والون ون تبعتة
ماباعك حبيبك وانت بعتة
**
باع عمرة واشترك بيه
وحزن كلبة على حزنك واشترك بيه
وبعد شدوس كلبي واشترك بيه
**
جبل حبة تكلكل لانتكل بيه
ويادنيا شما دفعتي لانتي كلبيه
واذا تنساه ياكلبي لانتة كلبي
**

ولاريدك بعد وبصدري احملك
وحبيبي شلون ترضى بصدري احملك
اذا حملك يتعبك بصدري احملك
**


الي وروحي الارض وشكد دولهة
وتداوي الداء لو بالمخ دولهة
بس العين مايحصل دولهة
**

دواهة العين خلهة من تقر بيه
وتصب كلما تشوفة من تقر بيه
ولك شيصير حبك من تقر بيه
**
تحبني انتة يقين بصدري موشك
الف شوكة السكوت بصدري موشك
انذبح كلبي وتشظة بصدري موشك
***

وعرف محد يدفنة وشي دفن شي
وعكب صدرة المواكد شي دفن شي
كفر من رسم غيرك شي دفن شي
***

واظن للجنة يدخل من يرسمك
وحبيبك يمسح اسمة من يرسمك
بسمك حبي جمالك من يرسمك
ــــــــــــــــــــــــــــــــــــــــ

يگولون عنه شــهم يحمي الذي ** جــار به
إختــبره بالضيــج مره .. وبالعســر **جربه
إرخيـلــه مره الـحبل ... مره ابرفق ** جربه
آثار مـن الزعـل .. شـوف إعـله وجهه** بدن
خــايـف يـجـي يـوم يرمي علـيحــبـه **بدان
(لا تربط الجربه گرب وحده صحيحة **بدن)
خوف الصحيحه ذيـچ تصبح مثـلهه** جـربه
******
إشـما يجور الزمن تگـه انته عالي** وأشــم
مرخــص اضـلوعـي الك طرزهــه بحله** وشـم
من غير عـطرك ابد .. لتصدگ اهـوه **وشــــم
مـن حيـــث يا زيــن حبـك وسـط دمي** ســره
يلي عــله شـوفتك وگفـت الوادم **ســــــره
لحـلـف وحــگ اــلذي ... لمسجد الاقصى** سره
نجـمي تره ابفـرگتك ينذر إبمحنه **وشــــوم
******
صار الحچي ابلا فعل سوله وغدت ** عاده اله
مافاد بيـه النصــح .. ابدن ولا **عــدلــه
لعـبك تـره عـل الحبل ماهـي يخي** عـادلـه
گلبك طـلع موگلب … ويـحبله مـيه** والـــف
مـو طبع مني من احـب . ابقه ادورن** ولـــف
حـچيك عـجب غـرني واحسبتك آنـه ** ولــــــف
عـضيت شـــفتي ندم … ليـش الگلب** عـاد اله
******
ما يـوم انتـه اغـلطـت گلت الاحــبة** أمــر
واجــرعــنه من فـرگـتك ســم الفراگ** وأمر
ادلّــل علـينه يـمـن رغـباتـه صارن** أمــر
يـلي ابرمــش عـين ولفــك ســاكن** وحاجبـه
نـورك علي ليـش انتـه بكل بخــل** حــاجـبه
لتصــدگ ابـيوم عـطـفـك انـه لي** حـاجة به
لاچـن ضميري الـذي هـزني .. وبـذلك **أمــر

قصيدة ( كلك حلو من الجدم للراس )للشاعر محمد جبر الخفاجي
*******************************************
يلكلك حلو من الجدم للراس
من كال البعض من بعضك أحله
**
ردت ابدي الوصف والحيره ابدي امنين
ردت انطيك حقك ولو مو كله
**
يل كصتك بدر والشعر جنه ألليل
وجن تطلع شمس من ترفع الكذله
**
يل رمشك كصب من هور أهلنا الجان
من جان أيتشلبه وعرجه بالدهله
**
يل بعينك كحل ماشافته النسوان
رباني الكحل والخالقه امكحله
**
بخدودك دخت والوصف داخ اوياي
جن لمت فواكه وبفرد سله
**
وحلكك صح حلو بس ياحلو دولاب
الحنظل من يمر من شفتك يحله
**
يل رقبتك وسط بين ألكصر والطول
كلت مثل الغزال وكلت مو مثله
**
وصدرك من نضج عاند نضج ليفوك
وغيرك بالعكس لو نضج يدله
**
يل خصرك متاهه اتيه بيه الناس
وجي أنت كنز بس انته تندله
**
من تمشي البشر توكف تصير صفوف
صف يزيح صف ايريد يحتله
**
شلل تمشي الشباب وتلفت الانضار
وانت لوحدك بس تعتبر شله
**
ولأن كل المحاسن تختصر بيك
يعني انت الجمال العل ارض كله
**
ماعندك نقص سبحان من سواك
واتحدى اليشوفك لو لمح خله
منتخالي
نخيت اوليد أخيتي ** منتخالي
وحلفلي ابروح خالي ** منتخالي
كلب سمجه يكلبي ** منتخالي
تظن كل ابن اخت يطلع عليه
شفته
يحط حمره اعلى شفته مره ** شفته
كلت مسكين صارت مره ** شفته
طلع غلطان ظني من ر ** شفته
طلعت لاشكر لاعسل هيه
نشرت القصيده بواسطة الشاعرالحاج علي كاظم الدرجال الربيعي ( صح ألله ألسانك أخوي محمد جبر الخفاجي )

قصيدة / جفاء / للشاعر المبدع السيد سعدون السيد حميد المكصوصي
***********************************************
الروح صعدت للسمه** وكلبي انسجم وي ناره
افيش ياريح الجمه ** وياعنبر النكاره 1
**
اتعده امس وشلون ا مس **انسه وكول طويره
ومن تكعد اكبال الشمس **تزهي ابضواها الديره
مرن اومرن وانه اعس **لكن بعين ازغيره
كحيله واصيله امعلمه **وبحر اليودع اسراره
عين التصدلج بالعمه **وماشاف لذه بداره
**
مدري انه اخاف امن الهوى **ماادري صارت عاده
جيف الكلب مره انجوه **وحيهم وياي اتعاده
مسكين اليدور دوه **ومجنون كلي اشفاده
خله بعد لاتلجمه ** لو زعل دم يتجاره
كلها علي امحزمه **وكلها أصبحت مكاره
**
تتمايل اومرت علي ** خستاوي بعده بسوكه
لتلومني انه اشبيدي **روحي حرك محروكه
اذكر كبل صارتلي في **ماادري كلبي اتبوكه
وبيدر عشقنا اتهدمه **ولميته كاره وكاره
وكل ساعه غيم اتلملمه **تتراعد اومطاره
**
ارد اسألج عن السبب ** تمحين اسم وي الدم
ماكتلي مسكين اوتعب **وكاضي العمر يتألم
مرينه ابحجة عتب ** بلكن تزيلين الهم
جمدوب كاتلني الضما ** ياطعم ماي عماره
انتي لونج مسلمه **جاخفتي من الشاره
**
1 النكاره / قريه من قرى ناحية العدل في ميسان أشتهرت بزراعة الرز العنبوري
****
بواسطة الشاعر الحاج علي كاظم الدرجال الربيعي ( صح ألله ألسانك أبو علياء ألورده )

والمربي
انه التعبان بيكم ** والمربي
الحنظل يشل ريجي ** والمربي
نذل تلحس عسلنا ** والمربي
وانه فردة تمر حسره عليه
**
موقد انه
هفت جمر المحنه ** موقد انه
رعيع ادري ابعدوي ** موقد انه
على يادان تلعب ** موقد انه
وانه بدان الاحبهم مزهريه
*****
المصدر / باقات من الشعر الشعبي / للشاعر أبو عمار الربيعي

قصيدة ( ألبنيه ألمغروره هدى ) من شعر الحاج علي كاظم درجال الربيعي
ياعشرة ندامه ويلهداوي
مثل عشرة الفار ويلعتاوي
**
ربح كل داو يسمر بالسباقات
وانه طول العمر خسران داوي
**
ردتك تبتسم فد يوم ياهيه
مكدر شايل اشكال النعاوي
**
وجهك من تباوع وجه تمساح
شايل غيض وهموم وشكاوي
**
ماعندك حجايه أطيب الروح
ولا صافي حليب البيه تخاوي
**
حتى الجلب طيب عنده وكفات
وانت سموم عقرب بالجلاوي
**
حسبالي وفي وطيب وبن ناس
ماأدري رعيع اودمن واوي
**
كلت اليوم باجر هابعد يوم
يطيب الجرح من كثر التداوي
**
اولمن طحت حسبالي يتجون
اويشيلوني غموس أمن العراوي
**
ماأدري خسيس أومنبت أجلاف
تخلبص غزل عمري أعلى الطواوي
**
أبد ماغيره عندك مامش أحساس
بس كومة شتايم والدعاوي
**
أنه العفت العزيز اومنبت الطيب
أستاهل بعد أكثر بلاوي
**
غمك يازمن غمج يدنياي
ضليت أويبد الذات ألاوي
**
معدنهم دغش كلهم كراهات
راووني الظهر والقمر ضاوي
**
ابد مامش محنه بكلب جلمود
حتى ألجلبه حنت عل جراوي
***************
مع تحيات أبو عمار ألربيعي

لاحن
ملوم الكلب عالطيبين ** لاحن
غنج ومهندج ومهيوب ** لاحن
بصدر المجر والنخلات ** لاحن
تذكرت الجره والصار بيه
ماجراني
انه ألجريت حبلك ** ماجراني
وانه من جور دهري ** ماجراني
سألني ألأصل كتله ** مجراني
عرف مجراوي انه وخان بيه
بيدراوي
أنه الحاوي رطبكم ** بيدراوي
وانه ألمحد حجالي ** بيدراوي
ٍسألني ألأصل كتله ** أبيدراوي
ألمنزل كصب والعيشه هنيه
******
مع تحيات الشاعر علي كاظم درجال ( ابو عمار ألربيعي )