عرض للطباعة
وصلنا للوطن
وحطينا نيشان
شحلاه مسامر
علالسطح
ونومه
جنه الوطن
بصلاته وبصومه
وحتى العربده جنه
ومعاتبه ولومه
والله الغربه مذمومه
بس شفنه السياسي
وما شفنه انسان
والبرلمان
مصاخب وحومه
واحزابه حلبه
ومصارعه ثيران
وناس تصيح
صوّت للحكومه
وناس تصيح
الله يجازي الجيران
وناس تكول نتنه
كومه بوسط كومه
والينخي ينخي
هنياله المات بهدومه
تظن صوتت لانسان
تاليهه
اللي انتخبته
طلع ..بومه
صفينا بالوطن خطار
كلمن ينتظر يومه
الفكره
مو فكره وطن تعبان
الفكره فكره شعب
يوميه
يموت بداخله انسان
الفكره
بعده الصوت صارخ
من بعيد
الحكو حسين لا ينذبح
عطشان
وبعدهه زينب
وسط الخيم تدعي
الهي تقبل القربان
وبعده يزيد
متنكب بقوسه
العدو واعي
العدو مو سكران
الفكره
فكره ذبح
باسم الشرع والقران
لا طوايف
لا اديان
الفكره
بشر
ينسلب منه
ايمان
والقران يتبرى
من قران
والاسلام
صاير رمز
للعدوان
الفكره فكره وطن
بلايه عنوان
تايه بين الاوطان
الفكره شعب منهوب
ما بين (الاخوان)
.....
الفكره
لا دستور
ولا برلمان
اختلفوا بالمتن
وصوتوا للعنوان
الميزانيه... نعم!!
والشعب جوعان
الميزانيه ...نعم!!
من دون عمران
الميزانيه...نعم!!
منثوره للغربان
الفكره
مو فكره ظلم
ولا فرديه
ولا طغيان
الفكره
صار الشعب
كل الشعب
قربان
الفكره
سفينه
تغرك
بلايه ربان
الفكره عراق انجمع
حظارات ..امم ..واديان
تاليهه انزرع
بوسط عربان
....
الفكره
مو فكره وطن منحوس
ولا عدو مدسوس
الفكره اتفاق
مخطط ومدروس
هذا اليقبض ارواح
وذاك اليقبض فلوس
الفكره
فكره شعب
نسى ثوب الكرامه
وما عاد ملبوس
الفكره
مبيوع الوطن
ومقبوض الثمن
واختلفوا عالدفن
من يدفع فلوس