شي بنفسي اسمه انت
مرّه يبجي
مرّه يحجي
مره تجويني ناره
ومرات اسكر بجنته
شي بنفسي
ما يريد يكول كلشي
بس هو كلشي
وآنه حاير
اريد اعرف البيه
وتمنعني السكته
انت آاني
من يوم الفتحت عيوني
شفتك انت
وما شفت ثاني
ولك انت آآآني
خليني انت
شي بنفسي
ساعه صحوه
وساعه غيم ومطر
بس كلهه انت
شي بنفسي
ما اكدر اوصفه
رشفه ورد
لو شفه ؟
ووهجه عين
لو رجفه
درابين الطفوله
وتيهة عمر
وسنين الفرح
والقهر
ورجعة غريب
وغياب وسفر
بس كلهه انت
شي بنفسي
ما اعرفله اسم
بس انت
وشنو بنفسي
غيرك انت
تدري من يعذبني
الليل وياه يعذبني
والظلمه بحسره تخنكني
والكمره بغربه تحسسني
والمطره برعب تبعثرني
والريح بشوك تلملمني
وطيفي طيفه
شيصير لو ليله يعتقني
هواي طيوف يمرن بيه
بس هو والله يلوعني
شي بنفسي
والله انت
كلما اغفى شويه يفززني
واحاجيه ويظل ساكت
وآنه ذاك آنه
عندي بجي بكد الحجي
بس هو الدمع صامت
وآنه ويه النوم منازع
ساعه يمنه وساعه يسره
مثل شبة
حريق بنار يجويني
اريد النوم مثل الناس
وما يخليني
هو انت
والله انت
وافز ويه النبض
حسرات
وادري
هذا اللي انت ردته
يحسرات النبض تانيني
شي بنفسي
هو انت
والله انت
