أهنا يمن چنه أوچنت

أهنا يمن چنه أوچنت

تأليف : الشاعر المرحوم حاج مطشر عبدالنبي المجراوي
غناها المطرب المرحوم داخل حسن

أهنا يمن چنه أوچنت جينه اوگفنه أبابك
ولف الجهل ما ينسي شمالك نسيت أحبابك
* * *
أهنا يمن چنه أوچنت روحين لاچن فد جسم
فرگاك فطر مهجتي أوظليت أمشي بس رسم
تدري أبنحولي أشوصلت عجزان من شيل الهدم
يل صوبت چيدي أبسهم ها ها تشد أصوابك
* * *
أهنا يمن چنه أوچنت ما تقبل الواشي الوشه
فرگاك فطر چيدتي وگطع سبابيح الحشه
ذبيتني أببر الهوه أوليش اگطعت بيه الرشه
بذات ما عندك وفه يحرم عليه أعتابك
* * *
أهنا يمن چنه أوچنت أثنين ما ثالث نحب
فرگاك مو هين علي يا صاحبي كلش صعب
ما چنت أظن أبعشرتك يومين عني اوتجتنب
وانته يما عندك وفه تجفي أتخون أصحابك
* * *
أهنا يمن چنه أوچنت ما بيني اوبينك شرط
وياك لو طاير طرت اوياك لو حطيت أحط
ذبيتني أبحر الهوى او ظليت بس انتگ وغط
وخليتني بأخر نفس متگلي شنهي أحسابك
* * *
أهنا يمن چنه أوچنت متگلي بلله شحسبت
من أتركتني بلايا سبب يا ظالمي مني أشفت
انچان بحت السر ذنب غصبن عليه سولفت
چا ما لمتني لو عشر ما صاب گلبي صابك
* * *
أهنا يمن چنه أوچنت بالگومه والگعده سوه
أذكر ليالي ألمظت وطعم أنه أبحر التوه
حكم علي حبك تره و فرني بدواليب الهوه
الله ما يعظم عليه أمصاب مثل أمصابك
* * *
أهنا يمن چنه أوچنت أيمانك اوياي أنسن
خليت روحي أمعذبه وسلواي بس شرب التتن
حسبالي تبقه عشرتك وياي لخيوط الچفن
يا حيف سري بان ألك ما چنت قاري أكتابك
* * *
أهنا يمن چنه أوچنت ما ردك الزاد وملح
وأن كسرت كلبك ونتي تميت اسهر للصبح
سر حبك أبگلبي أنخفه لاچني مريود أفتضح
دمعي هتك سري أوظهر لحبابي وأحبابك
* * *
أهنا يمن چنه أوچنت لو تسمع آتاني الأجل
أحضر لعد أجنازتي لو شفت تابوتي أنحمل
اوشايعني ألحد الگبر وتلگه نعشي لو نزل
أوبيدك تحطني باللحد اوهيل عليه اترابك
* * *
أهنا يمن چنه أوچنت أكتب عله گبري سطر
هذا قتيل أهل الهوه بيتين من نظم الشعر
حته اليراني يتعض كل عاشگ البيه يمر
ويگلي الدرب الهوه مسكين ياهو الجابك


أهنا يمن چنه أوچنت

نظمي (محمد الربيعي)

العراق – الموصل

أهنا يمن چنه أوچنت محد نزلها لدارك
وأنوب زادت محنتي وتاهت علي أخبارك
ولمن أصيح بخلوتي يسمعني سابع جارك
والعيد لمن يجي ياهو اليگلي أمبارك
*****
أهنا يمن چنه أوچنت خُلان چنّا من الزغر
ساعات چنا منلتگي نسهر على ضو الكمر
وتشدنا طول الوكت نغمات ماي النهر
وسفة على طيبتي مقابل شين أعذارك
*****
أهنا يمن چنه أوچنت سافرت عني وأبعدت
آنه الأحبك من جهل ومن هجرك المر أشربت
صابر على جمر الغضا لكني توني أعرفت
خاين وما عندك وفا مالك نسيت أحبابك
*****
أهنا يمن چنه أوچنت سولفي يا حادي الضعن
آنا المرواسها بذهب وتطلعي كومة عرن
مية رسالة أرسلت لكن رسالاتي أتمزقن
تسامرني لوجه الصبح وتاليها تنسى أصحابك
*****
أهنا يمن چنه أوچنت صبح ومسا أبالي
ومن فرگتك أتمرضت وأتغيرت أحوالي
نسيت أيام المضت لا أول ألك ولا تالي
أيامي كلها أنگضت بعد ما يهمني أعتابك
*****
أهنا يمن چنه أوچنت أيامنا الحلوة سوى
يغرني نوم الضحى من أشم منك شذى
ونهدك الغض الترف الچنه فص الچمه
لا تسمع ولا تنشد بعد وأنا الغريب ببابك
******
أهنا يمن چنه أوچنت ببستاننا نشتل ورد
طيبة سوالفنا سوى لمَّن نروح ونرد
وبحبنا نستدفي سوى ما يهمنا لسع البرد
وسفة غدر بينا الزمن وچملها يوم فراگك
****
أهنا يمن چنه أوچنت گاعك روت من گاعي
وياما أخذتك بالحضن ووسدتك أذراعي
تنساني يا مألتم وتدعي إنك واعي
وآنا بهواك منشغف مقلقني طول غيابك
****
أهنا يمن چنه أوچنت ذابت ملامح ديرتنا
سنين ما نعرف سئم ويا محلا لمتنا
الله يجازي من چان السبب بضياع عشرتنا
غفلة وهورشنا الزمن والصابني صابك
*****
أهنا يمن چنه أوچنت أرسومك تحاچيني
على جبين الهوى حروفها ترويني
تاليها بشوگ الغُرب خذلان ترميني
يا ريتني نسمة هوا تفوح منها أثيابك
****

ألف محنة ومحنة شدتني أن أكتب هذه القصيدة التي طالما ذكرتني بالغراف والمشرح واماكن أخرى من عراقنا الحبيب في وقت كان حلما لن يعود في وقت كان هادئا العيش فيه صفوٌ وجميل لا داعش ولا إرهاب ولا أحزان لا من يسأل عليك هل أنت سني أم شيعي بل عراقي وكفى وربما يسألونك (من يا كتر ؟؟ ) من يا عشيرة بوية ؟؟؟ آه وفعلا ملايين الآهات كم كانت أيام جميلة وخاصة في لحظات السمر ونفتح المذياع فلم يكن في وقتها تلفاز ونسمع من الاذاعة أجمل الأناشيد والألحان من زهور حسين وداخل حسن وبنت الريف وغيرهن وغيرهم فنشعر بتلك الفضاءات الواسعة التي تنقلنا إلى الهور الفسيح والبردي والمشحوف وكلك يا عراق جميل وستبقى بعونه تعالى مصوناً وجميل