للشاعر منتظر الرفاعي





خلّصنه السنة وما شفنه طعم النوم بس نسمع حلول وماكو كل جاره

أبمولدنه أظن حته الوزير أحتار وعمادتنا أصبحت بالشغله محتاره

يا هو ألي تكله يصير هو وبس وبس أدّير وجهك ضاع فياره

طب ألنه المولد و أحنه فرحانين مثل فرحت غريب بشوق خطاره

أستقبلنه المولد نذرف أحنه دموع ودعينا له الحياة والله ستاره

شوصفلك يصاحب آنه ذاك اليوم شفته أصفر جبير أ بّدي سياره

ممنوع الطبخ عل هيتر وممنوع تشغل حته شمعه تكول قطاره

وحطوه بغرفته تكول كالعريس ومنتظرين هسه تشعشع أنواره

وتاليها هظيمه وحصره حيل وعيب بس طب المولد ضاعت أخباره

ونسيناه المولد والله المعوض وصبح مركون ساكت سكتة أحجاره

وردينه لسطحنه وهل عليه أنـّام وكلها أتجر عتابه تكول خماره

كلنه أ نريد كيبل ما نريد هواي كال أشلون لازم أمر الو زاره

نجيبلكم الكيبل بس يريد فلوس مشروع ويريد أموال جباره

أو وصل كيبلنه خوش وما أكلك لا وصل كيبلنه لكن ما وصل ناره

ساعه الكاز خلص ساعه كوجن بيم ساعه السلف عاطل ساعه عنباره

بالله أرد أحلفك كلي هل مسؤول يرضى الكهرباء تنكطع عن داره

لو شغله تخصك سيدي المسؤول جا جريت كيبل حده العماره!!