قصيدة اخرى ( جسر الائمه ) لشهداء الكاظميه
جسر الائمه
ــــــــــــــــــ
جم بيت الهجمته اونعت بي نسوان
اوجم خِل ابخليله انفجع وتكـَــــدَر
اوجم ثكله ابخدرها اتيمَت واطفال
اوجم والد شـَهَك ياجسِر وتحَسَـــــر
ماظل زيج اشكه اوبيك اشك جم زيج
وعزراييل بيك البارحه اتبسمَـــــــر
ابكل شارع مناحه اوكل ركن عاشور
والموت اعلى باب الناس دك انكــر
نِنزف ياجسِر وجروح اهنله اثكال
بس جرحَك غميج اوبينه حيل اثـَـر
مارحنه الحرب رحنا الامام انزور
مبغانه الشفاعه ابساعة المحشـَــــــر
ردينا جثث يـِلجـِم جرحنا الموت
شجاه الموت بس بينه ايعرف يعثـَر
طِفِل شابك كتاب الله اعلى صدره اومات
اوحره اهناك تِصرخ ياعلينه احضـَر
اوشايب طاح عكازه انكسَر نصين
نطق نص الشهاده اومات ماكـَبَـــــــر
وأخر شمَر روحه ايعين اخوه الطاح
مالحَك عليه اويا نِشـَغ وأنحَـــــــــــــر
طفله ابيد ابوها اوهم بلعها الروج
يصيح ابنيتي حلوه اولابسه امشـَجَــــر
وبراك الجسِر مِرضِع تون وتلوع
صَدر امَك يويلي ابلبنتـَك زَنجَـــــــــــر
وام ثجله ابثلاثه اوفرد واحد ظال
خـَر غفله امن اديها اوصار ست اوذر
اوشاب اهناك يضحك والدموع اتهيل
شـَبت نار كـَبره ابراسه وتهستـَـــــــــر
ياجسر الايمه الجنت اظنن بيك
سجادة ورد جَوانـَه تِتطـَشَــــــــــــــــــر
لاجَنك خنت واحنه ابوعد وياك
اوطابوك اعلى روس الوفوا تِتكـَسَـــــر
جثـَه ابحظن جثه الزلِم والنسوان
ترضه الشيعِتـَك هل الموت ياحيــــدر
سَحبنا اصفوف متعنين ابو الحاجات
فوك الجسر صَد اوبالجسر شـَــــــــوَر
علي يابا الحسن واسينا ابو الشِدات
شِكبان العراق امن القـَهَر كـَــــــــــــــوَر
علي صار اليحبكم رافضي ايسموه
والاسمه اعلى اسمَك هذا ابن منكــــــر
علي بالليل نمشي امرافجين الخوف
واذا هَل الكمر بالظلمه نِتسَتـَــــــــــــــر
مجوس اورافضيه اونعبد احنه اكبور
اوحج البيت ليك ابمروتك نفتـــــــــــر
والصَلـَه اعلى تربَه ايصير ابن شيطان
واليطبك صلاته ابفتوَه يتكـَفـَـــــــــــر
شنو ذنب العراق اشجنـَه اوهيج ايصير
لان كام اعلى طوله اونهض وتحرر
امس طاحوا الف لاوالله لو مليون
مانخذل علي ولحسين نتنـَكــــــــــــــر
ولانكفر ابد ونشايعَك سفيان
خل ذني ابذانك حيل صرهن صَــــر
تعال اوياي جَرب شوف خط حسين
والله اتكوم ليلك لله تِتشـَكـَـــــــــــــــــر
واذا ظليت تمشي ابخر اذانـَك دوم
بالعباس اسحكك وانتي تدري اكــــدر
مشير السعيدي
رد مع اقتباس
[/align]
