قصيدة محاججة او رسالة مفتوحة الى الارهابي
اتحاجج وياك بكل كتب الله بالزبور والتوراة والا نجيل والقران
واتحاجج وياك باْي سنينة تريد وباْعراف اهلنه الكرد والعربان
وانجيب المذاهب كله للتفسير اذا عندك شكوك بصاحب الميزان
هل جائز وطن بيه سبعة معصومين يدخله اليهودي ابدون استاْذان
هل جائز قتل مسلم ابيت الله من بعد الحرك والدفر عل بيبان
هل جائز انصير عتبة باب وبسطحي يدبج الجيران
هل جائز السوري يفجر ابغداد مو اقربله جانت هضبة الجولان
هل جائز البعثي انكله اهلا بيك يا دكتور اياد وحازم الشعلان
هل جائز وطن امنة وامانه بيد ابن النقيب الكل وكت سكران
يا مجلس امم كوفي عنان امريكة بوطنة اغتصبت النسوان
الارهابي بجواز من الحدود يفوت والصدري الشريف بسجن الامريكان
ثمن راس العراقي بورقة يا اسلام وينك يا صليب ويا حقوق انسان
اذا جائز قتل كل العراقيين اذن اصبح العالم عالم الحيوان
اساءل طالبان وزمرة التكفير واساْل ابن لادن واساْل الافغان
وارد اساْل الحوزة وهيئة الاسلام وارد اساْل الازهر واساْل الاخوان
من ينتهك حرمة اهل البيت يدخل للجنان او يدخل النيران
الارهابي منو راح اني اكلك من كبل منصير كلنه بكان يامكان
اليقتل مواطن اعزل ابغداد ويذبح الحرس بالبصرة وبميسان
اليخطف اناس تريد تبني الدار وندك من جديد الاسس والعمدان
اليزرع العبوة بمدرسة اطفال ويخلي الجرس بدمومهم غركان
اليقتل طبيب وعالم واستاذ حتى الناس تبقى متيه وعميان
اليرمي بالهاون عل حسينيات ويطب عل مساجد يهجم برمان
الينزل بشارع بل كلاشنكوف يرمي اعلة البصلي بكربلة وكوفان
الفخخ الحلة وخله دمه يسيل ويقيم احتفال ويركص بعمان
اليقتل الشرطة بسيطرة كركوك ويشيل المدائن بغضن بسلمان
السيس جثثنة بنهر دجلة وراد يشعله حرب تشبه حرب لبنان
الفجر السوك وساحة التحرير اخطىْ بل رتل لوتيه العنوان
الينسف الناس بصبع ديناميتويفجر الجروف بشرطة النهران
الصدر الحنطة واستورد الزنجار جائز بالشرع يا مجلس الاعيان
اذا هاي الوسيلة انعرفت الغايات من يوم ابن لادن نصبك سلطان
اذا كل هل وطن زرقاوي يفتر بيه اذن عنده البساط وخاتم سليمان
يومية الشعب يذبح بالانترنت يومية الوطن يقتل بالانترنت وباْسم ابو مصعب ذيلو الاعلان
يومية النفط يعبر لاْسرائيل واصيح احترك وانطفي بالدخان
اليقاوم المحتل هذا شي مشروع وبهذا الامر ما يختلف اثنان
القاوم المحتل صاحب التعجيل وجنوده اسود وبالصلاة رهبان
الارهابي شقتل ما قتل امريكان من فجر واديه مربوطة عل سكان
ما كافي الخطف والقتل والتمثيل ما ضلت بلابل عدنه عل اغصان
بس يرهابي انتهت وانكشفت الاوراق مالك بعد ملعب عدنه بالميدان
ارجع لليمن لو انت صاحب دين وانت لمصر ارجع وانت للسودان
وانت لتونس ارجع واطلب امن الزين يثاْر للكتاب الكل وكت ينهان
وانت ارجع لفهد وكله يبني قبور لصحاب الكساء وعترة الرحمن
شراد الارهابي نسامح الهدام ونكله حضرتك ابد ما غلطان
ولخاطر رنا العد ابن ملك حسين انصدرله عفو نوقعه بقلم مشعان
يرهابي انت واهم وانتهت الاحلام من لزمو استاذك لزمت الجرذان
هاي المطرقة شكد ضربت السندان لكن ياترى هل زعزعت الايمان
لا ما زعزعت صاحتلك اتحداك من نخلة البصرة لجبل كردستان
رد مع اقتباس
