السلام عليكم ورحمة الله وبركاته


بعدك يا نهر ما معتذر لحسين جا يمتة الخجل يكطع لك المنبع
تجري بكل صلافة وما يعتك عيب ومن ذاك الوكت وبعارك مكبع
اتمنه الخريطة اتخالف التاريخ ونخلي ابدالك دم طفل يرضع
واتمنه الجروف اتعوفك من اسمك والطين ايتبرى منك ويطلع
خابط للابد ما كدروا ايصفوك اسمك مو فرات اتصير مستنقع
هم تذكر الضربة وتذكر العباس لو صرخة حسين وعبرة الرضع
ولك اخجل يانهر من طولك الممدود وتعنه لحسين وبالصحن اركع
ما شايف نهر يسكي ال ابو سفيان وعن ال الرسول وصحبتة اتمنع
هو اول نهر ما يرحمه التاريخ شما عاش بسنينه وشما تمتع
شلون تجري ومايك ازرك يا فرات وانت ذنبك مو ذنب يفطر سما
اتسابكت بالطف على حسين السهام ومايك اول سهم في صدره انرمه
وطاح ابو السجاد يم جرفك شهيد بين سيفين العدا وسيف الضما
وجان مايك اشد كل السيوف اثر على حسين حيل وألمه
السيوف اتعنت تطلب دم حسين وهاي حاسبها الحسين مقدمه
بس بنات المصطفى يبجن اجبود حسين حر وهاي الحرة متئلمه



لسه تجري يا فرات يمك احسين وتييمم للصلاة

اني مايخلص عتابي كونك تعرف العتاب

واني ماجيتك اسالك ادرى ماعندك جواب

انته لوحر يافرات ينكلب مايك تراب

وتنجوي ابنار اليتامه وتشرب ادموع المصاب

والغريبه والعجيبه يعتنيك احسين عطشان وترده

انت لوله احسين اسالك من تكون ومن يعرفك

انت لجل احسين تجرى ولو شرب مهره يشرفك

,وانته تدري احزام ظهره ( عباس ) وينذبح ظامي اعله جرفك

مايشربك هذا ذنبك جيت ابوفاضل عليك تكلفه زنده

ولسه تجري لسه تجري يافرات

يانهر مثلك تذكره الوادم ابحسره وملامه

ويانهر مثلك اناشد يبخل ابشربة يتامه

يانهر مايك نعرفه لاتظن يجري ابسلامه

جبد ابو اليمه نشوفه ابمايك وهاي العلامه

مانسينه الحركه بينه هذا ابن سيد الرسل مايروي جبده

ولسه تجري يا فرات

جم طفل عطشان يصرخ يافرات اشكد اخبرك

وانته لو تتعنه ليهم للخيم يمكن نعذرك

تدري عبدالله يظالم باخر انفاسه وينظرك

افهم ابهلنظره معنى حته تفهم شنهو قدرك

تكفي نظره وتبقه ذكره ومانشف دمع الطفل لسه اعله خده

ولسه تجري يا فرات

يانهر امرك عجيبه لسه تجري اهوايه صعبه

كل نهر يتبره منك واليحب مايشفه كلبه

انته مذنب يا فرات ويانهر يجري اويذنبه

انته تروي اخيول اميه وسكنه ماتلحكهه شربه

عمهه مارد وانت تشهد والمثل عمهه يكصدك لو تكصده

لسه تجري يا فرات

يانهر كلما اشوفك تجري اسال لسه تجري

وانتظر موعد حسابك يانهر واني اعله جمري

لو نعد كطرات مايك دمعي اكثر وانت تدرى

هكبر جرحك يخاين وهكثر يتبده صبري

ثاري ثاري يطفي ناري يالخنت بحسين واليت اليضده

ولسه تجري يافرات

اخووكم احمد الكظــماوي