مهازل الحضارة
قصيدة مرسلة من الاخ الشاعر كريم خلف جبر
[poem=font="Simplified Arabic,7,black,normal,normal" bkcolor="transparent" bkimage="backgrounds/33.gif" border="solid,4,white" type=3 line=0 align=center use=ex num="0,black"]
لا تناشدني يكلبي شحققت هاي الحضاره
عشنة بيها بلا مشاعر والعكل تيه مساره
نمشي مانندل دربنه كلمن يسوق بقطاره
والكلب لو جان واسع يفتهم لو بالأشاره
الترف متخوم بيها اتحير وسويله جاره
والفقر ساكت ذليل يباوع بحسرة ومراره
عولمة وحاكمها واحد صاعد بأعلى مناره
اجتاح ابن صهيون دنيا بكل بلد مسلم سفاره
يشتري بينة ويبيع وهذا قانون التجاره
والنفاق الدولي باسمه باع كل شعبه بخساره
بورصة واسهم بنوك وثمن الحر الدعاره
والشرف هم غيروه بعانه وحده يبيع جاره
كلشي بالدنيا مباح وواضح بنص العباره
انت حر بكيفك انت حاكم وبيدك امارة
ملك انت ولو وزير اختار من عندك وزاره
ومن تضيك الكاع بينه ومنه ماتخله مغاره
نوصل المريخ احنه انأسس ونبني عماره
واليشور جان بينه تمولس وصاحب سكاره
وماتوا اللي اختشوا عدنه بيش نحلف ماكو شاره
عاري وبلا ثوب امشي شكد خسر دفان عاره
ادخل اليابيت رايد دارك انته اليوم داره
بنتك ابنك مرت غيرك المهم تطفي الحراره
والزواج تريده مثلي صدر بكيفك قراره
انفقدت وماكو النه لذه وليلنه مضيع نهاره
حبلوا عدنه الرجال وجابت البزون فاره
والاباحية غزتنا ادلي بينه على الطهاره
وفسدت النسوان عدنه تعلمت فن العياره
واليعود البيته وحده وحشه محد بانتظاره
لاطفل بانغام صوته شيبكه ملهوف بحرارة
بس جلب واسمه عله ابنه بوبي يمكن لو تماره
وين ماردت افرش نام لتخلي ستاره
يمنه يسره مايهمنه ايمن ويرفع يساره
معكل يساوي عمامه الشيب مايعرف وقاره
والثقافة بلا مثقف فرع وذب السداره
والبشر احنه نخلقة عدنه جنته وهاي ناره
استنسخوا انسان مثله ومنه صنعوله حماره
وعالم اليوم بمربع يمك تشوفه بمداره
تلفزه وموقع بديل وكلشي يوصلنه بمهاره
حلق وطير اعله كيفك توصل وتعله بجداره
وهالعلم رباني عدنه وهو علمنه الشطاره
استكبرت علم الاله اشلون صار بهالغزاره
وازغر من زغير انت واسست اكبر حضاره
لاتكلي الكون صدفه تحدد بكيفك صيارة
انجلس هيجيل حجوهه كافي بطل من شعاره
ماوصل بيهم يقينه اتمردوا ضلوا حيارة
همة مو أكبر عقيدة من علي وفكرة ومساره
علي عالي ويا علاه يشرف الدنية مزارة
والتبع شيطان لابد يصحه من يدحض افكاره
وسر حياتك من تتيهه الموت يكشفلك اسراره
واسرع من الموت ماكوا زكي نفسك مو خساره
واحنه هم مثلك قرينه فلسفة واصل الحضارة
العدد يبقه عله عده اشما تكثرهه الصفاره
من تثبتهه بشماله وهي مو هيجي النداره
والطبع يهوى نظامه وبالك تخالف قراره
لاتغير الكون كافي ايدمرك وتحصد دماره
اتهده من تحجي على كيفك جيفة انت ومن قذاره
والبنيته بلحظة ممكن ينفني بومضة شراره
اشما تعيش العمر يخلص يكضي جن شربة جكارة
عدنه بالقران ايه واضحه وبيهه اشاره
شماعلت دنيا اليهود تروح من عدهه الكباره
ترتمي بوادي السلام وبالعدل تحله الاماره
مو حلم هذي حقيقة وهاك اخذ مني البشارة [/poem]
كريم خلف جبر
24 / 10 / 2004
رد مع اقتباس
