حال العراق قبل وحال العراق الان تجسدها كلمات هذه القصيدة الرائعة لاحد الشعراء الشباب في الناصرية.
حقيقة قصيدة جميلة ومعبرة عن واقع حالنا السياسي والاجتماعي والاقتصادي في هذه الايام الصعبة
من حياتنا.


شفنا من العنب ونريد سلتنا
مثل مكيول من سنين بي نكشف وجه ذلتنا
دمنا اعلى الظلم يا حيف والخوف انتشر غيمه اعلى دنيتنا
وكمنا نبسبس ابسكوت خاف السلطه تصنت الجلمتنا
ضحكنا وصدروا مرسوم ممنوع الضحك واقفلنا شفتنا
بجينا وصدروا مرسوم ممنوع البجي واحبسنا دمعتنا
صفنا وصدروا مرسوم يمنع حتى صفنتنا
اليصفن يكره الدولة ويخطط لي انقلاب يدير سلطتنا
ضحكنا بكيف قادتنا حجينا بكيف قادتنا بجينا بكيف قادتنا
لانحجي ولا نمشي ولا نحجي بارادتنا ولا نبجي بأرادتنا

اطلعوا اظاهروا نطلع صفكوا يا محلا صفكتنا
اركصوا ابساع نتمركص بسكون الركص يعجب خليفتنا
الشايب هوسة اتلعلع وعلى الواهس تطيح وياه جدتنا
وعلى حس الطبل خفا يا رجليه ينكز شابنا وتردح حديثتنا

استحت حتى العكل واحنا ولا ندت خجل فد يوم كصتنا
نسينه اعرافنا وشكينا بيرغنا وكسرنا وي العشاير ذيج عصتنا
وطفينه اوجاغنا واكسرنه كل فنجان ولاجن الكرم والجود شيمتنا
وذب صايته الشيخ ولبس زيتوني وصار ابمجلسه كسران ركبتنا
ووجوه العشيره صفوا حزبيين نكرونا يا خوتي ولاجنهم اخوتنه

شجانا شبينا فهموني سحكنا اعلى القيم كلها نسينا اخلاق امتنا
شجانا شبينا فهموني اريد اسأل سؤال مادام انجمعنا بهاي فرحتنا

الغيره احنا النزعناها لو هي استحت يا خوتي ونزعتنا

وحمدنا الله اعلى نوم اسنين وعلى كاس المذله البي توسدنا
وطلع حسنا الكبل مخنوك يصرخ يا قضيتنا

بعد لا خوف لا ذله ولا نقبل يمس احد كرامتنا
وثاري الصحوه صحوة موت وارجعنا اعلى حالتنا

رجعنه انخاف من كلشي يا خوتي وهاي بلوتنا
جرح البغيرك شدخ كايلها ابو الامثال
مطروح يبقى الحمل لو ما اله شيال
منو يحلها قضيتنا

يحلها الابنه ياكل موز واني ابني يموت بحصرة الزهدي
يحلها العنده عشر بيوت واني ايجار ما عندي

يحلها اليحجي بالشيكات واني بحال المجدي
يحلها اليلبس استبرق واني من العام الهاي السنه بجردي
يحلها الجلده ما يحمل واني الفاله صفت ما تاكل بجلدي

عمي بس مذله وخوف نسمع ليش ونعدي
انترس دم الكلب ونعلتو جد ابو جدي


قضيتنا يحلها الدم تحلها البندقية وزندك وزندي
يحلها السيف المسنن موش السيف المصدي
يحلها السكن بالاهوار ودك صدره وكفل بشواربه البردي
يحلها الطلك الدنيا واتعنه ال موتته يحدي
يحلها الدربه درب احسين ما يتنازل وحدي


واذا ضلت قضيتنا اعلى هذا وذاك تدرون اشوكت تنحل لمن يطلع المهدي

دكوموا بكصبه ندفعها كبل ما تطمس بطينه وبعد ما تندفع حتى بالف مردي


ها خوتي ها ابنفس الموقف ضلينا اها.. ابنفس الموقف ضلينا اشكيلك يا الموعود اشكيلك