صريفه
[size"5[align=center]"]صريفه
اجيتك ياوطن من بعد غربه سنين الدمـع همـال والحالـه كسيفـه
اجيتك من بعد ماضيعت عشرين والله يعيـن مـن فـارگ وليفـه
اذا مر الغروب وچلچل الليل گلبي علـى الوطـن يكثـر رفيفـه
تحملنـا القهـر والغربـه مـرات ماعدنـا ذنـب ذنـب الخليفـه
ماردنا نحصل ذهـب لومـال ومحروميـن مـن ابسـط وظيفـه
نفز من الفجر والليل بعده ينام لـن نفوسنـا علـى الـذل خفيفـه
وردنا نموت لكن موت طيبين وتظـل خلافنـا الچلمـه الشريفـه
ولادگينـا عالجيـران بيـبـان رغــم الـجـوع انفسناعفيـفـه
تغربنـا چثيـر وصعـدت النـاس وتتفاخـر اذا لبسـت قديـفـه
شئ لبست تراچي ولبست گلادات ونست كل ذيچ عشرتنا النظيفـه
اجيتك ياوطن والگلب مكسور وظيم اللـي علـي ظيـم الوصيفـه
اذا دمعي نزل لحـدود الحـزام شلـون تريـد اسولفلـك طريفـه
تدري بيش افكر بيش محتار؟ اذا رديـت احصـل لـي صريفـه
صريفه على النهـر وياهـا فانـوس لاتعتقـد هالطلبـه سخيفـه
صريفه وبالوطن تسوى ملك قارون بـلاد الغـرب لتفكـر تظيفـه
ضيف اللي يقـدم تمـر كنطـار وطاسـة لبـن والخبـزه لطيفـه
اذا هو الوطن باعوه بالسوگ شبقـت بـس البـواري ام السفيفـه
ومن حفر المواضع خربت الكاع وحسافه على النخل بس باقي ليفه
يالساكن اببيـت وتقفـل البـاب حگك ماتعـرف العـاش ضيفـه
خلصنا العمـر نسكـن بلايجارونفطنـا يـروح لـولاد الشريفـه
اذا يمكم صريفـه ولـو ايجـار اريدنهـا ولـو متروسـه جيفـة
لان ريحة البصره مسج فواح وخيعونـه اليحصـل لـه صريفـه
نفتـر عالمـدارس والدكاكيـن والعنـده بخـت حصـل سقيـفـة
كلهـا تسـددت بوجوهنـا البـوب وچم شيـخ التعذرنـا مضيفـه
والتفت علينـا العـرب صوبيـن وصـار البلـد ماتعـرف لفيفـه
وصاحوا بالوطن فرهود فرهود وصرنا اجناب والعيشـه ضعيفـه
واخبرنك المهره الچانت تجول مـن گد الهظـم صـارت نحيفـه
حتى الوكت مابي رحم عالناس وعلينا تحالفـوا صيفـه وخريفـه
وشمسنا تريد تنزل تحرگ الگاع وظلعي من البرد تسمـع رجيفـه
وسطرات الوكت تكتـل بالـمچان مابيهـن رحـم كلهـن عنيفـه
وعمت عين الليالي شلون وكحات وياليلـه التمـر ماهـي مخيفـه
خلـت چم فقيـر يبـات جوعـان يفـز بالليـل ويـدور رغيفـه
اذا هو الرغيف ارتفـع للغيـم وسكـن بالهـوى وضيـع صفيفـه
لاتعتب على اللي عاش تعبـان وجـرح الگلـب ممبطـل نزيفـه
اذا عمره الگضاه ونين بونين وعينه مـن الـبچى صـارت كفيفـه
من عافوه اخوته وعاش محروم ولا سيـر عليـه واحـد يضيفـه
واذا ضاعت العشره اننسى المعروف وكل واحد مشى وشايل شليفه
مثل ذيب السرگ بالليل حايوف بـس وي الهـوى تسمـع حفيفـه
اذا انت اخوي وتجفي بالضيج تاكل تمـر وتـذب لـي الحشيفـه
وتسمع شور مرتك وانت محتار وتسويلك عـذر تقـره بصحيفـه
صحيح نجوع لكن ابد منموت وكسـرات الخبـز تطفـي اللهيفـه
هان عليك دمعي وفركة الايد وصرت وي الوكت من دگ چليفـه
نسيت الرحـم والـدر الشربنـاه ووصيـة الوالـدة الاخ لاتعيفـه
جنت شيال حمل البيت والجار اشو هسه الوكـت سوانـي شيفـه
مر بيه ولك شاركني الهموم وخفف من حمـل دهـري النصيفـه
لتغرك الدنيا وتصعـد صعـود بـاوع ليـورى وشـوف التعيفـه
هو الموت واحد والعمر محسـوب وچم انسـان مامـات بقذيفـه
شمحلى الموت لو يلفيك بين اخوان ويظل موت الغرب موته كسيفه
ومگبرة النجف يالمدفن الزيـن وعليهـا الدمـع مايبطـل ذريفـه
واخبرنك زماني عنده تاريخ بيه مكتوب ماعنـدي صريفـه[/SIZE
][/align]
لو دامت لغيرك ماوصلت اليك
رد مع اقتباس
