(اشُوفَكْ اغْلى مِنْ أمِّي)
[align=center](اشُوفَكْ اغْلى مِنْ أمِّي)
يِظَلْ حُبَّكْ نَبَعْ بالْروح مايِنْضَبْ
ونِظَلْ نمْشي بطريقَكْ أبَدْ مَاْنِتْعَبْ
ولو شِفْنا الخَلَگْ عَنَّكْ تِشِيح الْعَينْ
تِظَلْ دومِ بْسِمَاْنَا الْنَجِمْ والْكَوْكَبْ
دَوَّرْنَا اعله وادي نِزْرَعه اشْجَارْ
طِلعْ وادِيك اغْنى وتُرْبِتَه أخْصَبْ
زِرَعْنَا اشْجَارْنَا وحُبَّكْ سِگَاهَا الْمَايْ
غَاْبَاْت اثْمَرَتْ مَاتِحْصَه وتُحْسَبْ
وشوفَكْ اغْلى مِنْ أمِّي الْسِگَتْني هوَاكْ
واحسَّكْ حتى مِنْ نَفْسي إِليْ أقْرَبْ
ولو گَالو ليْ بَطِّلْ هَالْغَرَاْمِ الْيومْ
أگِل لْهُمْ هَواي حسَيَنْ واتْعَجَّبْ
غَرَامْ حسَيَنْ مو عَابِر يَهَل الْشِمَّاتْ
مِنْ زُغْري رُبَيَتْ اعْليَه وتْأَدَّبْ
سِئَلْت گليبي لَيَشْ ابْعَرشَه يسْكِنْ دَومْ
گَالْ الله الذي اخْتَارَه وعَليَّ نَصَّبْ
وسِئَلْت الْروح لَيَش من الْعِشِگْ مَتْنَامْ
گَالَتْ الِفْ سَهَمْ حسَيَن إلي صَوَّبْ
وسِئَلْت الْعَيَن لَيَش لْمَصْرَعَه تِهْمِينْ
گَاْلَت فَاطِمَه يم گبره بس تِنْحَبْ
وكُلْ عَاشُورْ مِنْ تِهْمِي الْدِموعْ عليَكْ
نَهَرْحُبَّكْ يفوضْ بگَلْبي يِتْشَعَّبْ
واسْمَكْ مِنْ يُمُرْ تِتْحَاْضِنَه الأضْلاعْ
ويسْكَرْ هَالْگَلُبْ مِنْ ذِكْرَك ويطْرَبْ
ومِنْ اذْكُرْ حَضِرْتَكْ سيدي ومولاي
دمِعْ عَيَناْي نَاْر اعْلَه الْجِفِنْ يِنْصَّبْ
يَحُبْ طه الْرَسولْ ودَمْعَة الْكَرَّارْ
يَابَلسَمْ جروح گليَبي مِنْ تِصْعَبْ
ْ
شوصِفْ بيك يَاْمَنْ عَجَّزِت الاوصَافْ
بَس طه وعَلي عِرْفُوكْ ويَّا الْرَّبْ
شوصِفْ بِيكْ يَاشِبل الْنَبِّي الْمُخْتَارْ
أَلِفْ نَاْبِ غْرَسِتْ بعْدَاْكَ ألِفْ مَخْلَبْ
حِمَيَت الْدِّين بِدْمُوْمَكْ يَبو الْسَجَّادْ
بِيهَا الْدِّين خَضَّر سَيِّدي واعْشَبْ
مُحِبِّيكُمْ غِدَتْ تِتْفَاْخَر اعْلَه الْغَيَرْ
لَنْ حُبَّكْ رَصِيد الْمَاْنِفَذْ مَكْسَبْ
حُبَّكْ نَبِعْ يِسْگي كُلْ يَبَابِ الْروحْ
وكُلْ سَاعَه الْتُمُرْ عليَه يِصِيرْ أعْذَبْ
ولو جَفَّتْ مَنَابِعْ لِلْخَلَگْ وانْهَارْ
يِظَلْ نَبْعَكْ زُلالْ وشِيعِتَكْ تِشْرَبْ
مَانِعْتِب اعْلَه الليِّ مَاشُرُبْ لِدْوَاكْ
نِسأْلْ مِنْ شُرَبْ لدْوَاكْ بَيْ جَرَّبْ
والْيِرْكَبْ سِفِينَه امْكَسِّرَه الِشْرَاعْ
لَيَلومِ الْبَحَرْ لو بِيه ظَلْ يِلْعَبْ
والْيِمْشي بطَرِيِق اوروده كُلْهَا أشْوَاكْ
مَايِشْتَمْ وَرِدْ وبْعُطْرَه يِتْطَيَّبْ
يَبو سكَيَنه لْمَرَاْسِيكُمْ مِشَتْ طُلابْ
ابمَرْكَبْكُمْ تُحُطْ ضعُونْهَا وتُرْكَبْ
غِدَتْ بَعْدَكْ تِرَدَّدْ مِنْ صِحِت بِالْگُومْ
هَيهَاتِ الْمَذَلَّة الْمُوت إِلي أَرْحَبْ
مِثِلْ عَبَّاسْ تُرْخُصْ عَيَنْ ويَّاچْفُوفْ
تِنْطي چفُوفْ عِزَّه وللْحَتِفْ تِرْغَبْ
عَليَك الْيوم تُلْطُمْ تِدْمِي إلها صْدورْ
وغِدَتْ لسْهَام أمَيَّه الْهَدَفْ والْمَضْرَبْ
مَازَالَت يَبو الْسَجَّاد هم تِفْدَاكْ
شمَا تِهْمِي الْنِوَازِالْ يَمْهَا تِتْصَبَّبْ
تِعَوَدْنَا اللَّسِعْ مِنْ چَنَا زْغَارْ
لَيَمَنْ صَار مِنَّا يِرْتِعِدْ عَگْرَبْ
شوف اخْتِ الْعَقِيلَه بْسَاْحَةِ الأمْجَادْ
تِهِزْ مَجْلِسْ يَزِيدِ الْيومْ مِنْ تِغْضَّبْ
هَاذي اخْتِ الْعَقِيلَه تِنْجِبِ الأجْوَادْ
ولدَرْبَك تِعْشْگَه وتسْلُكَه مَذْهَبْ
يخَاْفِ مْنِ الْرَّحَمْ فِرْعونِ هاالأيَّامْ
لو رَحْمِ الْنِجِيبَه لْمُوسى رَدَّ أنْجَبْ
يَبو اليِمَّه الْزِمَان اثْبَت والايَّامْ
دَمَّكْ للْرِيَاح بحمرته خضَّبْ
ومِنْ تُعْبُرْ ريَاح دمومَكْ اعله اعْدَاكْ
مَايِمْدي الْعِدَه اتْشَمَّر عن الْمَنْكَبْ
شِفْنَا الليِّ جِرى لْظَاْلِمْ مِنْ الْعُرْبَانْ
تِحَوَّل مِنْ أسَدْ مُرْعِب گُلَبْ ثَعْلَبْ
وبْحُفْرَه لِگوه يتسَليِّ بالفِيرَانْ
وچَانْ اعله الْشَعَبْ مِنِّ الْسِّيوف أصْلَبْ
وبْحَبل الْعَدِل لَفُّولَه حول الْجِيدْ
ولو بِيدي الْحُكُم فوگ الجسر يُصْلَبْ
يَحسيَن الْگلُبْ يَمْ گُبِتَكْ دَوَّارْ
چَنْ كَعْبَه وعليَها ايدُور هم ينْحَبْ
فَارگْتَكْ يبو الْسَجَّادْ من اعْوَامْ
وفراْگَكْ كَلِفْ ياسيدي ويِصْعَبْ
أثَرْ فَرْگَاكْ وَرَّثْ جُمْلَة من جروحْ
ظَلَّتْ سَيِّدي بحْشَاي بس تِلْهَبْ
ومِنْ زود الفْرَاگ گليَبي ظل يِبْچِيَكْ
ومِنْ شُوگي لْحَضُرْتَكْ راسِّي هم شَيَّبْ
يَمتَه غيومْهَا تهَاْجِرْ تعيف سْمَاكْ
وتصْفي سيِّدي ويمسي الْدَرُبْ أرْحَبْ
شوَكِتْ بِمْنَايِرَكْ نصبغ كحل هالْعَيَنْ
واشوفَنْ گُبِتَكْ ودْموعي تِتصَّبْب
شوكِتْ يَمْ بَاْبَك تحُطْ لِلْمُحِّب الضْعونْ
وازورك سيِّدي زيَارَة مُحِبْ اذْنَبْ
وادعي الْبَاري بِسْمِ الْزَهْرَه ويَّا الآلْ
بَسْ للْعِتْرَه گلْبي بدِنْيتَه يصْحَبْ
لَنْ بِيهُمْ نَجَاتي مِنْ يُمُرْني الْموتْ
وادري الْموتْ حَقْ مَاْمِنَّهْ فَدْ مَهْرَبْ
3/1/1428 هـ
[/align]
[move=left]أحبك ياعراق[/move]