يسقط الصاروخ تحيا القندرة
بقلم: عواد العابدي
[poem=font=",5,darkblue,bold,normal" bkcolor="white" bkimage="http://www.iraqcenter.net/vb/mwaextraedit2/backgrounds/155.gif" border="inset,10,teal" type=0 line=0 align=center use=ex num="0,black""] يسقط الصاروخ تحيا القندرة = للعروبة اليوم صارت مفخرة
=
انهزمت اجيوش العرب يوم النزال = والسلاح انهار في سوح القتال
گمنه نتحدى القنابل بالنعال = واليعادينه بحذاء اندمره
يسقط الصاروخ تحيا القندرة=
=
بالقنادر ننتصر مو بالسلاح = والنعل بالمعركة سر النجاح
الزيدي عنده كروز حي اعلى الفلاح = ومن رماه بالكون صارت ضغبره
يسقط الصاروخ تحيا القندرة=
=
استأذن القعقاع من گبره وطلع = شالته الغيره وعلى حصانه رجع
شگگ اهدومه وگطفهن من سمع = ركضه اجوا حفاي هو وعنتره
يسقط الصاروخ تحيا القندرة=
=
شافوا الزيدي البطل رمز وفه = ولابس ابرجليه عبوة ناسفة
من شمرها شلون صارت عاصفة = وسوه لجيوش الاعادي مقبرة
يسقط الصاروخ تحيا القندرة=
=
هلهل القعقاع ودموعه جرت = وعنتره اخدوده السويده حومرت
صاحوا الارض السليبة تحررت = وتل ابيب بنص حذاء انفجره
يسقط الصاروخ تحيا القندرة=
=
ومصطفى البكري سعيد ابهل خبر = ايبارك الامة العريقة ابهالنصر
صارت بلميار چزمة منتظر = اغلى من سعر الشبح يمعتبره
يسقط الصاروخ تحيا القندرة=
=
التمت العربان من بان وبني = وامة الامجاد ابد ما تنثني
امة تنجب منتظر ما تنحني = وبوش اجه لبغداد ياهو القشمره
يسقط الصاروخ تحيا القندرة=
=
رجعت الجولان والمقدس رجع = والعدو الغاشم لگف بشته وشلع
ثاري عدنه سلاح لو بيهم وگع = محد يلحگ يشغل الصافرة
يسقط الصاروخ تحيا القندرة=
=
قندره ازغيره وشفت كلشي ارتبك = والله لو بسطال چا سوه فلك
حتى سور الصين چا طاح وهلك = وبجزر هاواي صارت مجزره
يسقط الصاروخ تحيا القندرة=
=
احنه عدنه اسلاح يسوا النووي = اصله جلد ابعير فعال وقوي
ابساحة الميدان يشويهم شوي= وخلي ينتظرون جلد البقره
يسقط الصاروخ تحيا القندرة=
=
احنه عدنه سلاح ابد ما ينگحم = بيه نهز الكون نتحدى الامم
حتى ابو بريص النذل خل يفتهم = لو سحگنه عليه راسه نكسره
يسقط الصاروخ تحيا القندرة=
=
احنه حتى الدود من نمشي يزل = والصراصر تختفيلك بالعجل
كعب عالي وضربته تهز الجبل = وقوة التفجير تمحي القاهرة
يسقط الصاروخ تحيا القندرة=
=
بالمتاحف علگوها اعلى الرفوف = خاطر العربان من تدخل تشوف
تنذرلها نذور كل واحد خروف = يستعد يمها وتصوره الكامره
يسقط الصاروخ تحيا القندرة=
=
ارتفعت اسعار القنادر والجلود = عمله صعبه وهربوها امن الحدود
قاذفات اتحولت تمحي اليهود= وحتى باليابان صارت شوشره
يسقط الصاروخ تحيا القندرة=
=
انتصرت الامة بعد طول انتظار = وصارتلها القندرة راية وشعار
نحرر المقدس تره وكل الديار = ونمشي للصومال هم نحرره
يسقط الصاروخ تحيا القندرة=
=
دخلوا التاريخ هالمره العرب= وگلبوا الدنيا وموازين الحرب
هذه جديات صارت مو لعب= والسلاح الاسود اول بادره
يسقط الصاروخ تحيا القندرة=
=
خل حماس تهوس وخل تحتفل = وخل تسمي الزيدي مغوار وبطل
ارتفع مجد العروبة واكتمل = بالتفاهات السخيفة المنكرة
يسقط الصاروخ تحيا القندرة=
=
هذي امه مسودنه تعيش ابخيال = بلا شعور ولا وعي تقدس النعال
قشمروها وبدلوا بس الجلال = وهي تهتف كل عمرها امخدره
يسقط الصاروخ تحيا القندرة=
=
يمته تخلص يا بشر هالمهزلة = ويمته ترجع للطريق القافلة
ويمته نزرع مو قنابل سنبله = ونخلص ونرتاح من هالمسخرة
=
يسقط الصاروخ تحيا القندرة = للعروبة اليوم صارت مفخرة
[/poem]