لا للوحدة لاللحرية لا للأشتراكية

[السيد محمد باقر]

السيد محمد باقر
IRAQALRAFEDAIN@HOTMAIL.COM
رن جرس التليفون في ساعة متأخرة الليلة الماضية0 فأجبت 000ألو *
ألو000سلام عليكم
عليكم السلام ورحمة الله وبركاته ( شلونك خوية شلون صحتك )0
الحمد لله الجميع بخير والدتك وأخوانك وأخواتك الحمد لله مستورة0

منين انت تخابر خوية ؟

من أحد الدول ألأستنكافية دولة لها حدود مع العراق 0 مو دولة أوربية يعني مو دولة أسكندنافية لالا هاي الدولة التستنكف من العراقيين وهي عايشة من خيرات العراق شني القضية ما عرفتها ؟ مو اني ما أقدر أقول مو أحنة على التليفون0

زين زين شنو أخباركم وأخبار الناس ويش عندك هنا ؟

الجميع يحمدون الله الذي لا يحمد على مكروه سواه 0 والله أجيت اشتري دواء لواحد من أقربائنا لأنه ماكو دواء هناك0 واشتم هوة يا خوية والله اختنقنة طلعت أرواحنا 0 الله وكيلك يومية نموت موتة 0 شني هاي 0لا حول ولا قوة ألا بالله العلي العظيم 0 على كل حال ما أريد أطول عليك شنو الأخبار ماكو أخبار جديدة0 صدق سمعنا المعارضة كلها مجتمعة بلندن شكو ماكو من أخبار بشرنا خوية الله يبشرك بالخير أن شاء اللة ؟

ماكو شي0 ماكو شي يبشر بالخير من قبل المعارضة طلعوا كلشي ماكو الخلافات والمشاكل زادت أكثر من قبل 0 خوية شلك بهاللغوة تحرق دمك وبدون فائدة0

ليش المفروض يتوحدون بمثل هاي الضروف يشتركون بعملهم عليمن هاي الخلافات كل واحد ألة الحرية يطرح راية بهدوء والباقين يسمعونة وهكذا الى أن يتفقون على رأي

خوية انت وين تفكر وحدة الموقف وحرية الراي ويشتركون بالعمل مو هذة قصدك خوية؟ هذا الكلام اللي وقعنا بورطة مو هذا كلامك يقولون أن معناه مثل أهداف صدام وحزب البعث وهذا زاد الطين بلة وهذا الخربهم 0

ليش يا خوية ما تقول لي شني السالفة بروح أبوك سولفلي حتى أعرف شني القصة 0

أنة أقول لك 00 في بداية الأجتماع وهو أول يوم من المؤتمر قام المستر آقاي زلماي

زلماي ؟ منو زلماي هذة ؟

ها000 المستر آقاي زلماي هو الآمر والناهي بالمؤتمر هذا كل شي بأيدة هذا بأيدة الحل والربط0 زلماي هذة رجال أفغاني مبعوث الرئيس الأمريكي للمؤتمر وهو المشرف على كل شي بالمؤتم حتى الكلمات التي ألقيت شافها قبل ألقائها0 كلمة الختام جايبها وياه شكلوا لجنة من 65 شخص طبعا هذولة ما ترشحوا أثناء المؤتمر أبدا كل أسماء ال65 جابها وياه من واشنطن 0 على كل حال هسة عرفت منو زلماي000يبعد روحي؟ قبل بداية المؤتمر قام زلماي وقال اسمعوا حتى تكونون على بينة الرئيس بوش وجميع أعضاء الحكومة الأمريكية ورئيس السي آي أي اجتمعوا او شافوا أكوا مشكلة بالنسبة لأسقاط صدام وهي أذا توحدتم واصبح عدكم حرية الراي واشتركتم بأعمالكم وهنا راح اتصير المشكلة ليش؟ لأنه اذا توحدتم معناه أصبحتم وحدة وأذا كل واحد منكم احترم راي الأخر معناه أصبح عدكم حرية وأذا تعاونتم بأعمالكم معناه اشتركتم بالعمل جميعا وهذا معناه أشتراكية كما يفسرها صدام 0معناه صار الكم وحدة وحرية وأشتراكية والمشكلة صدام راح يعترض لأن هذي أهداف حزب البعث وراح يقول صدام ليش تريدون أسقاطي وتبديلي وهذه هي أهدافي من قبل 35 سنة0 هذا ظلم فيجب عليكم أيها المجتمعون أن تتفرقوا اكثر من قبل وأن لايحترم أحدكم رآي الآخر ابدا وان لا تشتركوا بأي عمل في المستقبل حتى نضيع الفرصة على صدام0والباقي خلوه علينا فصاح الجميع موافقون لا للوحدة لا للحرية ولا للأشتراكية لا لا لا وأنتهى الأجتماع 0

هاي شنو شجاي تقول جاي تضحك علية خوية فوق ضيم الدنيا تضحك علية 000000

لا يبعد عيني ما عاش اليضحك عليك بس هذة اللي افتهمناه حتى اذا ما افتهمنا شي فهاي نتيجة المؤتمر 0000

صدق جذب لا حول ولا قوة الا بالله حسبنا الله ونعم الوكيل حسبنا الله ونعم الوكيل حسبنا الله 000000

ألو ألو ألو0000 خوية تسمعني ألو ألو ألو0000 الظاهر انقطع الخط لا حول ولا قوة ألا بالله000 حسبنا الله ونعم الوكيل0

الاثنين

23/12/2002

=)