بعض وجوه ديمقراطية في العراق

[احمد1976]

قامت الشرطة العراقية الصدامية (سابقا)بقطع الاسلاك الكهربائية عن المواطنيين المتجاوزين بالتعاون مع منتسبن دائرة الكهرباء يوم أمس في قضاء المسيب.
اريد احجي بطريقة الديمقراطية "كلا للعنف نعم للديمقراطية" وزير الكهرباء ووزير الداخلية محد ساْل نفسه ليش المواطن يجاوز على الخطوط الحمراء اقصد خطوط الكهرباء؟
اول شي الكهرباء بس بالحلم نشوفه مو مبالغة! اكو مثل يكول ما يجرع المر غير الامر منه. كل المتجاوزين لو يلكون كهرباء مستمرة حتى لو عشر ساعات لايجاوزون اطلاقا اذا كل شخص مشتري اسلاك بخمسين الف او اكثر لو اكو كهرباء ما كان اشترى اسلاك بهيج مبلغ.
اولا بالشتاء تصل تنكة النفط الى عشرة الاف دينار فالمواطن ماعنده ثمن النفط فيلجأ الى المدفئة الكهربائية وبالصيف قالب الثلج يصل الى بخمسة الاف او اكثر ايضا يلجأ المواطن الثلاجة لكي يوفر فلوس الثلج هاي اذا عنده فلوس و إلي ما عنده ثلاجة ويعمل بمبلغ قوت عن لا تموت ماذا يفعل؟؟
البارحة الشرطة اثبتت جدارتها بالديمقراطية قاموا بالرمي بالبنادق والمسدسات على المواطنين العزل وصوبوا أحد المحتجين على قطع الأسلاك واعتقلو عدد من الشباب بلاضافة الى طلب النجدة من فوج الطوارئ لان المواطنيين طالبو بالكهرباء واهانو المواطنيين يعني كلام والله حتى ابن الشارع يستحي يلفظة اولاد العاهرات و من هذا الكلام إلي ما يخرج إلا من الساقطين خلقياً. يعني ابوي ما يكدر بس على امي !

يكول واحد منهم قبل جنه ضعفاء وهسة اقوياء وما نخاف هذا الكلام يعبر عن المجتمع الي متربي بي. والله والنعم من هذا المجتمع!
اذا تدعي باْنكم اقوياء وبستطاعتك تفعل ما يحلو لك زين الضمير و الغيرة وين دفنتهن؟

ليش القانون دائماً يطبق على المواطن الفقير بحذافيره و بالباطل و من يم الحكومة يغضون النظر مع كل سلبياتها؟
ليش ما أسوي شي للحكومة إلي تحرم المواطن من المواد الغذائية إلي صارت أصلاً بالتقسيط؟
دهن ماكو تمن ماكو تايت راح يصير 3 أشهر ماكو.
الى متى تبقون من يم المواطن شديد العقاب و من يم الحكومة غفور رحيم؟
وين أهل الخطوط الحمر أشو ما ألهم صوت؟
مو ينقل عن الرسول صلى الله عليه و آله أنه قال العامل بالظم و المعين له و الراضي به شركاء؟؟

[احمد1976]

الوظائف في العراق

اصبح الحصول على الوظائف في العراق (اي وظيفة) مقابل مبلغ مادي لكي يتوظف المواطن في الشرطة والحرس الوطني وباقي الوظائف لاهل الواسطات.
التعين في الشرطة سعر الوظيفة الحد الادنى مئة دولار والاقصى 200 دولار. الحرس الوطني الحد الادنى 200 دولار والاقصى 300
والوظائف الاخرى فحدث ولا حرج.
وتوجد ظاهرة سلبية حاليا نفس نظام هدام البائد الرشوة علنية لكن باسلوب ثاني مثلا تروح الى اي دائرة من اجل معاملة او امور اخرى فالموظف يكول روح الى الموظف الفلاني وتروح يكلك روح الى فلان دائرة ونريد كتاب رسمي فالمواطن يضطر يترك المعاملة
لان يتعقد و كل دائرة بيه سمسار مثلا بياع شاي او كاتب عرائض يكلك اعطيني كذا مبلغ واني اخلص المعاملة طبعا السعر على قدر المشقة يعني اذا المعاملة زينة فهذا السمسار يتحول الى قصاب وبالنسبة الى عمال النظافة (الكناس) يعني يعمل باْجر يومي لمدة شهر او شهرين من اجل المعيشة وبعد ذلك يتم ابدال العمال اما عن طريق القرعة او بطريقة ثانية و كاْنما راح ينطوه كرسي في الجمعية الوطنية.
وبالنسبة لمراقب العمل يسجل 45 عامل والموجود35 العشرة تبخروا.
ومسؤول البلدية يعتبر المشرف على المراقبين والعمل يسجل 200 عامل والموجود 160 او 170 والباقي وين صار؟! هاي على مستوى الموظف البسيط.
زين اذا توصل للمحافظ او الوزير شيسوي؟! والمواطن هو الضحية.