لهلي المارضو بالذل ولافد يوم ابعث عن طريق الشعر برقيه
ماريد اشتكي والمشتكى لله لكن ارد اكلهم بالجره عليه
روحي اشتاكت الكم من وره القضبان حنت للسلف ولكل مبانيه
يهلي اعتاب الي وياكم ومو غلطان من اعتب عليكم واشرح البيه
لوميت جتل احسن ولامسجون بيد اهل الكفر وانجتل يوميه
خذوني بلا ذنب من بينكم مجتوف ونداست ثنيتي الكبل محميه
صحت لمن شفتهم دارو على البيت يناطور السلف ذوله الحراميه
ولاردة فعل منكم ولاتنديد وكل واحد انشده يكول شعليه
مو انتم كبل من ينتخي المظلوم غيرتكم على الحك غيره عربيه
وبعرك العشاير من يصير زماط هاونكم يطك ويه الاحاديه
شجاكم ياهلي وماهزكم اللي صار مو وصلت لحدهه وزادت شويه
وين افعالكم ذيج التهز الكون وين الزود والنخوه العراقيه
عراقي انه وبريء وكل عمامي اسباع اضل اشلون بيد ابن اليهوديه
...........................
هلي يامن محبتكم لبو الاحرار محبه بلا دغش من زغر فطريه
حسين من اجل نصره دينه المظلوم ضحه بكل نفيس وبذل غاليه
ولجل هذا الامر حتى الطفل ذبحوه وراحت زينب على الهزل مسبيه
ترى موبس لطم منك يريد حسين يريد تصير روحك روح ثوريه
بطل من محبت احسين ابو السجاد اذا بالصدك روحك موحسينيه
شيعه احنه ونمثل بالبلد ثلثين وزلمنه بلا ذنب بالسجن مرميه
اذا سبعين بالميه وغطانه الجور يمكن ننمحي لو صرنا اقليه
انه بنص السجن واخبرني السجان وبشرني الحكومه اصبحت شيعيه
كلت خلصت محنتي وراح ارد للبيت وكلت خف الحمل وصلوله اهاليه
وكلت مبروك صارو كل هلي حكام ومشكلتي بعد يومين مكضيه
وضليت انتظر وعيوني على الباب وعيشت النفس باحلام ورديه
ولن صادر امر من الحكومه يكول حان افراج الفين وخمس ميه
وشديت المتاع وكلت يالله ومن كد الفرح ضاك الفلك بيه
وكلولي الربع لاتبتشر يفلان ريض خل نشوف الامر تاليه
وصوبني القراه بسهم يوم الكال بي ماتنشمل بس الوهابيه
كلت هيج الامر صار بعراق حسين شيعتنه التهو كلمن بكرسيه
حكومتنه تريد تحارب الارهاب تعوف الزين وتطلع الارهابيه
هلي بيكم ازامط مو بكل الناس خل ابن الجنوب يعيد ماضيه
خل تفزع الفاله ويطلع المكوار زعلان ويسوي افعال بصريه
وكلوله اليضل يتعذر من الناس ويكول العرك مابيه شرعيه
ضل نايم ابيتك واحنه راح نكوم وباجر بالقيامه تبين النيه
هلي اقسم وحك حسين والعباس مضمون النصر مليون بالميهمنقول