اهدي هذه القصيدة الحسيينة الى الاخ العقيلي الذي يقول انا اعرف ناس استشهدو بسكتة قلبية بسب اللطم

تعريف الهوية
خلونه نلطم ياخلك خلونه نلطم..والمنع علشيعة اللطم للشيعة يظلم
****
احنه بلطمنه انحاول انوصل قضية...وانعرف للشيعة اللطم مثل الهوية
خلونه نلطم والله ملينه التقية..وماهو اللطم ياهلخلك بالكون يجرم
*****
اللطم مو ضربة صدر اللطم تذكار...وانمارس احنه بهاللطم حرية افكار
علطم كلهه اتحزمت لصغار لكبار....الشيعي يكبر باللطم والبيه يهرم
*****
الشيعي يقصد باللطم علظلم يحتج....دك اللطم خله الظلم اركانه ترتج
ومحرم ايعادل ثوابه ابموسم الحج...نلبس سواد وباللطم لحسين نحرم
*****
صدكونه احنه بهاللطم اججنه ثورات..واللطم مو من شعوذة ولامن خرافات
اللطم تعريف الهوية اللطم اثبات..وبيه النعلم كلمن الرايد تعلم
*****
علطم قدمنه الركاب السيف مسنون..والشيعي ماهاب العدوه اشكان ميكون
جبناهه من ظّلام اميه الجور هارون...النه الفخر النه الشهادة العار الهم
*****
احرار احنه وباللطم سيرنه منهاج...قامت قيامت هالظلم ومن اللطم هاج
كل يوم يطلع بالبخت امثال حجاج..ويهيل علشيعة التراب وغايته ايطم
*****
الشيعي يفخر باللطم مرفوع راسه..واللطم ديني ابمبدأه وشيعي بأساسه
خلون نلطم لاتدخلونه ابسياسة..وكافي سجاجين الحقد بالشيعة تثرم
*****
كالو كفرتوا بدينكم من صرتو شيعة..والشيعة لبّة هالديانة وهالشريعة
وصى النبي ولازم على الكل التطيعه..وشاهدنه ربأط الحجي وي حادثة خم
*****
ماعدنه شمرت دروشة ولاخبرة باللف...ومانعرف انمارس طريقة ولاضرب دف
عدنه الصدور امعّطبه ونضربها بالجف..هاي المشاعر واضحة ومانعرف انضّم
*****
الراد يعرف بالكتب مذهبنه كامل..يحوي الحقيقة الدامغة ومايحوي باطل
ميضمضم اخطاء اللي غلطو مايجامل..ولااحنه من صوت الحقيقة اذانّه انصم
*****
بالحجة ثبتنا الوقائع جيل عن جيل..وعريّنه كل سير انحراف وكل اباطيل
لاوين ما مال الدليل افكارنا اتميل..نوّرنا من شمس الحقيقة ومابقه اغيوم
*****
احسين للشيعة رمز وامثال عليا...سّطرها شخصه بكربلا هوه والويا
ماننسه ابو السجاد مهما الصار والله..الحسين نور بليلنه ومن غيره يظلّم
*****
خلونه نلطم باللطم ونفوخّ اكلوب..ودموع العيون التّهل اتغّسل اذنوب
زينب تروكض بالخيم وحسين مكصوب..وحسين هو اب للكرامة وزينب الام
*****
خلونه نلطم باللطم تتهذب انفوس...ومن اللطم خلي البشر تتعلم ادروس
ظل اللطم لن اللطم من الله محروس..وهوه الطلب منّه الشعائرنا النعظم
*****
خلونه نلطم باللطم وكفنّه العقول..,خلينه كل سم للحقد يبطل المفعول
معلينه بالكلمن حجه وشكال ميكول..جف اللي ينزل علصدر لحلوك يلصم
*****
خلونه نلطم واللطم موضوع حساس..بيه انعرف ياهو اليزيد وياهو عباس
والنيه اصل الكل عمل ولكل بنه الساس..والله اللي عالم بالنوايا وهوه يحكم

نساْلكم الدعاء

جعفر السوداني