بحر الامام علي عليه السلام
.......................
كتبو عنك وصح وصفوك اهواي
بس بحرك غميج ومحد ايفوجه
شافو بيك بس الروج من تغتاظ
والشاف الشديده بصفگة الروجه
..........
گالوبالحرب ماواحد يلاگيك
وتشهدلك احد من طبكت امغيمه
بس هدت عليك الخيل يابو احسين
نفخ سيفك عليها وشنف ابخشمه
خليت الشرد من خوفه يرجع ليك
مذعور وزرك عربيدك ابسمه
بس كرصه وتلمظ صار ازرك نيل
وراسه الفوك وذّح من شمر هدمه
والگال انا زلمه وزامطك مولاي
طلع عورته وشدهه بظهر غوجه
كتبو عنك وصح وصفوا مولاي
بس بحرك غميج ومحد ايفوجه
........................
شافو سيفك الباشط يغشي الشوف
وغمد السيف يتكسر اذا جسته
وشافو ضربتك بس وحده ماهي اثنين
ويطيح الجبل بالسيف اذا لحته
شافو يابحر من يمر بيك الريح
يشيل الروج بس رجليك لازمته
يعني اعله الجرف والريح كتبوا بيك
ماغاصو وعرفو بس ضوه الروجه
كتبو عنك وصح وصفوا مولاي
بس بحرك غميج ومحد ايفوجه
..........................
عنك كالو اهواي واشد الكال
ذاك الوصفك والشاف ذرعانك
يوم الي قلعت الباب ياكرار
وبعمر ابن ود اتساوه ميزانك
ويوم الي خذه اذراعك محمد صاح
خلاك الولي وفوك ارتفع شانك
ومن جبت الشمس بيدك يداحي الباب
كطب الكاع صار ابلفة اردانك
وكتبو علفقار شلون يشفي الروس
محني اعوج بديك ويعدل العوجه
كتبو عنك وصح وصفوا مولاي
بس بحرك غميج ومحد ايفوجه
.................................
منهم كال مامش معجزه ابها الكون
بس حيدر علي ابها المعجزه اتعلله
بالكعبه انولد بس هاي تكفي اعليه
ولاكبلك وبعدك اجه ابيت الله
وانشك الجدار وكل قريش اتشوف
اصوات الحواري اشلون تكفلله
ومن شالك بجفه المصطفى وناغاك
شافو شخص ثالث يمشي بس ظله
ظل جبريل والاف الملكه اوياه
دوجه التصعد وتنزل الف دوجه
كتبو عنك وصح وصفوا مولاي
بس بحرك غميج ومحد ايفوجه
.......................
منهم شافك الزاهد يبو الحسنين
وبيت المال بيدك كلشي بي تكدر
بس كظيت عمرك علخشن مولاي
ثوب امركع وشاركك بي قنبر
ماغرتك دنيا ولاذهب مولاي
وانعالك تخصفه وبعد تتعذر
طلكتج يدنيا تصيح يامولاي
غري اللي يريدج وانا مانغر
وبيتم من كصب وتنام فوك الكاع
وانت البنجف قصرك عله ابروجه
كتبو عنك وصح وصفوا مولاي
بس بحرك غميج ومحد ايفوجه
.......................
واخر وصفك سقراط يابو احسين
لان شاف ابعدل سقراط غاياتك
واحد كال عنك شمس للعميام
وبنهج البلاغه انجوم جلماتك
واحد كال قران ومشى اعله الكاع
ومن يعرك جبينك تنكط اياتك
كلهم وصفوا بس فوك حجي الفوك
ماغاصو وعرفو معدن اسرارك
ياسدة اسكندر من يوصفك عاد
خل ماجوج ياكل جيش ياجوجه
كتبو عنك وصح وصفوا مولاي
بس بحرك غميج ومحد ايفوجه