تدور الدنيا وتمر أيام
ويمكن يرجع.. وفجأة يطلع
وممكن تتحقق الأحلام
ويرجع قائدكم صدام

وترجع سجودة ورغودة
ونرجع أحنا لنفس الكودة
ونفس البوري ونفس الدوري
ما دام الـعــوجة مــوجودة

ماتستعدل هاي العوجة
وماتعقـل ذيج الفلوجة
وبفضل شـعبنا المصطور
وحظنا النايم بين كبور
يمكن يرجع

كالوا منقاش يوكع طيارة
وبالموصل وكعت بحجارة
مو صوجج يالطيارة
صوج اثنين أبعورة البيها
عيب أنكول الطياريين

متعودين الكفخاتة..
هواية مبين مشتاقين ؟
أهل ديالى وأبطال القرن العشرين
وأهل البصرة وأهل الثورة ..
الظاهر جانوا متونسين

ترجع ونستهم ...
وتعود الجهرتهم ذيج البســمة
وأحنا نرضى بهاي القسمة
وشراح يصير ؟؟

ذيج رغودة ومسنودة
وبنت الشابندر موجودة
والليثين الراحو فدوة
نعوضهم بقرود اثنين

يمكن يرجع..
يرجع رجعة ويركع ركعة
نتعلق كلنا ببغداد
شــيعة وكلدان وأكراد

بذاك اليوم وين يكون الأمريكان
واليابان والطليان
راح أنصير أحنا الخرفان
ونرجَع نفس السجان

أحنة الشعب الطايح حظه
وأحنا الشــعب البايع أرضه
وأحنا الشعب الدايم يرضة..بهالجلاد
مشتاقيلك يا ريس كل الويلاد

مشتاقين النفس اللغوة.. وبكل يوم وبنفس الميعاد
بساعة ثمانية والساعة العشرة
تخطب نفس الخطبة الكشرة
ساعة السودة يوم أدخلتلها البغداد

يمكن يرجع بأسرع فرصة..
ونرجع نسمع نفس القصة
ويلبسنا خاكي وبسطال وغـصــة
ونحـلي الأيام الســود .. برايات النصر الموعود