|
-
باجر نحرر وطنه / مهدي علي
باجر نحرر وطنه من الطغاة ------ وباجر تذب القيود احرارها
باجر نعود ونعانك هلوطن ------ ونرفع الصوت بصحن كرارها
باجر نزور الحسين بلايه خوف -- وتنترس حضرة علي بزوارها
باجر نكول النريده ومانخاف --------- والمنابر تصدح باشعارها
(آمنه) نردلها حكها من الطغاة ---- وللنساء تصير شعله أفكارها
باجر الأم الحبيبة من تنام ------------ ماتخاف الليل من غدارها
وباجر البيبان مفتوحة تظل ------ وماتخاف الحرة سطوة جارها
ولابعد حياطنه هم الها اذان ------ وتسترق من البشر اسرارها
ولابعد شبانه تضوك المرار ------ وتنخطف بعز الصبا اعمارها
ولابعد نفذ وبعدين النقاش ---------- ولابعد جاهل يعلم احبارها
ولابعد طاغوت يحكم هلبلاد --------- لازم اتدير الامور اخيارها
ولابعد دجلة تون من العطش ---- تضل مزهيه بضفافه اشجارها
ولابعد كهوتنا تبرد بالدلال--------- ولابعد تطفى المواكد نارها
باجر الناطور من صبحة ينام----- وماتصير البوكه من نطارها
باجر الغربة نودعها ونعود------ ----نبني امة موحدة بافكارها
والوطن يصبح ملاذ لكل شريف--وتجري عذب الماي كل انهارها
باجر وباجر تره ماهو بعيد----------كرب الصبح اليشع بانوارها
لا تأيس ترة باجر مو بعيد----------خطوتين وهم نصل مشوارها
خطوة اولى نطهر ادران النفوس---وخطوة ندعي بكل صدك جبارها
باجر النصر اليجينه من الاله----------لا تكول امريكا لو انصارها
ذاك طوب اهل الرميثه من يرد------يهدم عروش الكفر واوكارها
باجر وباجر ترة ماهو بعيد-----------كرب الصبح اليشع بانوارها
Mehdi M. Ali
ضوابط المشاركة
- لا تستطيع إضافة مواضيع جديدة
- لا تستطيع الرد على المواضيع
- لا تستطيع إرفاق ملفات
- لا تستطيع تعديل مشاركاتك
-
قوانين المنتدى
|
|