سيرة فأر العرب!

[babil]

وصل صدام حسين الى سده الحكم بسياره تاكسي قبل مايستلم الحكم قال للشعب العراقي تره اني خوش ولد من القصر الى البيت وماعندي سوالف مكسره وراح اسوي العراق والت دزني الشعب فرح وكال العراق راح يصير ميكي ماوس والبطه دونالد والكلب بلوتوا بس صدام استلم الحكم السبت الصبح ثاني يوم الاحد الصبح سوه حرب مع ايران
الحرب العراقيه الايرانيه كال صدام تره الايرانين جاي يذبون الزباله بباب العراق تقبلون احنا صدكنا واني اذكر امي صارت عصبيه على جوارينه لانه يذبون الزباله يم بابنا وكالت الي ابويه روح اتعارك وياهم ابويه طلعهم بس جوارينه شطوله شعرضه ابويه كال خلي اشيل الزباله اني احسن وادفعها بكصبه احسن ومن رجع الى امي كال لعبت بيهم لعب واجوا كرفوا الزباله امي كامت تهلهل وتكول عفيه رجلي سبع لعد اني ليش اتزوجتك شفتك تتعارك وي البزازين بقوه وعنفوان وخطيه هي ماتدري ابويه كرفها وشمرها بالحاويه
المهم صارت الحرب 8 سنوات صدام ماقصر يوميه اغنيه على خميني جان يسميه خمن وطلعت اغنيه تكول ياخمن بطل اخبالك ياخمن وغيرها من الاغاني ها ولكم وين يادجالين هاي كويعتنا نحميه وي صدام حسين وبالمناسبه اذا اكو احد من ايران يعرف اغاني ايرانيه على صدام بالحرب يكولها
8 سنوات كان اتعسها من صارت مايسمى حرب المدن ايران تضرب صاروخ على بغداد والعراق يضرب صاروخ على عاصمه ايران وصلنا حاله ماانام الا نسمع صوت انفجار يله انام انكول اي وكع الصاروخ تصبحون على خير احلام سعيده من كبر لف هيج سعاده ولو الصاروخ عندي ارحم من البوري المهم خلصت الحرب بعد راحت شباب واي شباب رجال مواليد الستينات اعظم جيل بالعراق افضل من جيلنا احنا مواليد النستله والجات والموبايل انتهت الحرب ومثل مايكول المفكر الفرنسي روجيه الحرب ياالغباء محد انتصر بالحرب وقال خميني سوف اوافق على قبول ايقاف الحرب وكانما اتجرع السم وانا استغرب ليش في تلك الفتره ماكو ازبري ميرنده سفن اب الا يجرع سم على كل حال خلصت الحرب

خلصت الحرب الايرانيه يوم الاثنين صباحا ثاني يوم الثلاثاء الصبح دخل صدام على الكويت والشعب العراق صاح صدام يمعود وين رايح صدك جذب جان يكول صدام لا الحكومه الجديده بالكويت طلبت ندخل الكويت ودخلت مخابرات صدام والبعثيه مال صدام وماكو سوبر ماركت بالكويت الا فاتوا عليه واتسوكوا منه بدون ان يدفعون فلوس حتى تذكر الروايات ان ابن علي كيمياوي دخل الى سوق كبير وشاف علبه نيفيا عباله قشطه وجان يلطع لطعه منها وصاح ابن عزه الدوري وكاله حردان تعال كيمر
جورج بوش الاب جان نايم الضهريه اجو كعدوه كالوله اكعد صدام دخل الكويت جان بوش الاب يكول لا بروح جدك صدك هله والله الا اسويها لطميه على صدام جان يخابر صدام على الصونده كله صدام اطلع حباب من الكويت تره اطلعك بالجلاليق صدام كال والله ما اطلع لو اعرف مطي يركب مطي
صارت الحرب عاصفه الصحراء اربعين يوم من القتال وصارت الاربعينيه مال شعب العراق لانه الصاروخ بحربنا وي ايران جان يدغدغ ويسوي صوت تيت تيت طيط طيط بس عمي صواريخ امريكه طركاعه مالت الله تشاقه شقه ثكيل وتسوي صوت جرااااااااااق مال راشدي الشعب العراق كله خاق من الغارات بس جان اكو واحد اسمه حمودي ابدا ماخاف الحرب كلها جوه الجربايه يهز جتف من وره الخرعه
خلصت الحرب واجانه وراها منو الحصار الاقتصادي واجانه وياه طحين الحصه بما يحويه من عبوات ناسفه كمنا نهلهل من الجه الخلفيه لجسم الانسان وهاي كلها وصدام حسين يكول احنا انتصرنا واني رحت شفت صدام وكتله رحمه على والديك ماتكلي هذا الانتصار شنوه شنو لونه شنو مواصفاته
واستمر الحصار في ضل حصار صدام وانتشر الجوع والحرمان في ضفاف دجله والفرات واتغيرت النفوس وصار كل واحد يصيح ياروحي بس سعدي الحلي جان يصيح وينهم شباب العراق تعالوا نعمر العراق تعالوا اراويكم الخرايط ونشتغل سويه نعمر الطاسه


كان صدام يطلع بالتلفزيون يوميه ينفتح التلفزيون اول شئ السلام الجمهوري وبعدين قران وبعدين صدام يطلع خطابات ولقاءات حتى صدام صار عصبي كال شنو القران يطلع عشر دقائق لعد اني اطلع اقره القران واني اطلع ادك السلام الجمهوري وجان صدام كل مايطلع بالتلفزيون تستفاد محلات ايجار افلام الفديو لانه الشعب كله يروح ياجر افلام حتى مايشوف صدام
الى ان اجه الاحتلال وكمش صدام بالحفره وانتهت فتره صدام

منقول عن لسان حمودي الورد

[شبل حيدر]

ههههههههههههههههههههههه
ههههههههههههههههههههههه
ههههههههههههههههههههههههههه

عز الله اني مت ضحك
ههههههههههههههه